Analityk: Pasoł Babič płanamierna paryruje ŭsie bazavyja tezisy Łukašenki
Intervju Babiča dla ahienctva RIA Naviny «stała adkazami Kramla na arhumienty Łukašenki, ahučanyja im 1 sakavika padčas tak zvanaj «Vialikaj razmovy», — piša palitołah Andrej Jelisiejeŭ.
Na dumku Jelisiejeva, heta «nie prosta adkazy Babiča na pytańni žurnalistaŭ. Heta adkaz mienavita Kramla na arhumienty Łukašenki pa tematycy rasiejska-biełaruskich adnosin».
«U časie «Vialikaj razmovy» adzin z asnoŭnych tezisaŭ Łukašenki, jaki ź siamihadzinnaha dziejstva prakrucili pa ŭsich dziaržaŭnych telekanałach, zaklučaŭsia ŭ tym, što nijakaha subsidavańnia Biełarusi, z boku Rasiei nie adbyvajecca: «Spynicie nas vinavacić u nachlebnictvie. My ŭ vas nikoli nie byli nachlebnikami i nikoli nie budziem. Kali my heta čujem, asabliva ja, nie chočacca nijakich sajuzaŭ».
A voś vytrymka ŭ adkaz ź intervju Babiča: «Ale kali, pačynajučy z 2000 hoda pa 2010 hod, uzrovień štohadovaj finansavaj padtrymki Biełarusi ci vypadajučych dachodaŭ RF u našych ekanamičnych adnosinach znachodziŭsia ŭ dyjapazonie ad sotniaŭ miljonaŭ dalaraŭ da 2—3 miljardaŭ, a ciapier heta ŭžo 5—6 miljardaŭ u hod, pravavych i finansavych mahčymaściaŭ chapała, kab zabiaśpiečyć toj uzrovień ekanamičnaj i pramysłovaj intehracyi, jaki my majem».
Inšymi słovami, Kreml vusnami Babiča paryravaŭ: nie, bacieńka, vy — nachlebniki», — piša Jelisiejeŭ.
Palitołah źviartaje ŭvahu, što heta ŭžo nie pieršy vypadak, kali pasoł Babič adkazvaje na asnoŭnyja arhumienty Łukašenki papunktava. Rasiejski ambasadar, piša palitołah, pieršy raz raźjušyŭ Alaksandra Łukašenku i jaho asiarodździe jašče svaim intervju 17 śniežnia 2018 hoda dla ahienctva TASS.
Sutnaść śniežańskaha intervju zaklučałasia ŭ adkazach Kramla pa ŭsich asnoŭnych arhumientaŭ Łukašenki, jakija jon vykarystaŭ na pres-kanfierencyi dla rasijskich žurnalistaŭ.
U tym śniežańskim intervju Babič nahavaryŭ bolš za ŭsio niazručnaha i pryncypovaha dla Łukašenki, čym jaho papiarednik Surykaŭ za 12 hadoŭ znachodžańnia na pasadzie ambasadara.
Asnoŭnyja punkty Babiča / Kramla byli takija.
— Datacyi Biełarusi z boku Rasiei siońnia składajuć $ 4—4,5 młrd za hod. Toje, što ciapier Łukašenka žadaje pa hazu i nafcie, — heta dadatkovyja $ 3—4 młrd štohod. Heta doraha, i heta zapatrabuje absalutna kankretnych sastupak: «Heta novy ekanamičny pakiet … u hetaj situacyi akazvać padtrymku pa niejkich paniacijnych syravinnych madelach prosta niemahčyma». I jašče jaśniej: «resurs padtrymki … u syravinnych formach datacyj siabie vyčarpaŭ».
— Uvieśčasnyja spasyłki na «niaroŭnyja ŭmovy», «ekanamičnuju dyskryminacyju» niedarečnyja, «apošnim časam my zahulalisia z hetymi słovami i pačynajem vychałoščvać sutnaść hetaha paniaćcia». Łukašenku varta spynić hetyja manipulacyi na svaim, a tym bolš na rasijskim infarmacyjnym poli: «Treba pazbavicca roznaha rodu manipulacyj hramadskaj dumkaj».
— Hazu dla Biełarusi pa canie dla Smalenska ŭ ramkach Jeŭrazijskaha ekanamičnaha sajuza nie moža być u pryncypie, bo «ŭ Rasii pracuje składanaja madel pierakryžavanaha subsidavańnia … i voś hetaja pierakryžavanaja madel u miežach rasijskaha zakanadaŭstva farmiruje canu ŭ Smalensku $ 70. Ale heta nie značyć, što taki jaho sabiekošt».
— Padatkovy manieŭr u naftavym siektary — «suvierennaje prava RF», i abaviazku kampiensavać jaho Biełarusi niama. Rasieja maje namier kampiensavać hrošy svaim NPZ u ramkach madeli «admoŭnaha akcyza», ale da Biełarusi jana aŭtamatyčna ŭžyta być nie moža, bo ŭ Biełarusi svaje padatkovyja, mytnyja, taryfnyja, akcyznyja praviły. Kab pretendavać na madel dla rasijskich pradpryjemstvaŭ, Biełarusi daviadziecca ŭnifikavać hetyja režymy (toje, što prapisana ŭ Dahavory 1999 hoda).
— Nijakaha dysbałansu va ŭzajemnym handli ŭ suviazi z abmiežavańniami z boku Maskvy niama: kali adniać košt enierharesursaŭ, to ekspart z 140-miljonnaj Rasii ŭ Biełaruś mienšy, čym impart z 9,5 miljonnaj Biełarusi: «nie prosta niama dysbałansu, a jość admoŭnaje salda dla rasijskich vytvorcaŭ».
— Niahoža biełaruskim čynoŭnikam skažać infarmacyju, treba było b im hetaha nadalej nie rabić: «Na sajuznym Saŭminie ŭ Breście z vusnaŭ namieśnika ministra zamiežnych spraŭ prahučała, što nibyta 55 biełaruskich pradpryjemstvaŭ na biahučy momant całkam zakryty dla pastavak, a 18 — začynienyja častkova … usio pravieryli. Vyśvietliłasia, što ŭsiaho try pradpryjemstvy začynienyja całkam i siem — častkova».
— Praz hadoŭ 5—7 Rasieja zmoža sama zadavolić svaje patreby ŭ małočnaj pradukcyi, i tady biełaruski ekspart nakryjecca: «U kaho ŭ Rasii zmoža padniacca ruka na ŭłasnaha vytvorcu na karyść chaj bratniaj, ale zamiežnaj dziaržavy?»
— Davać biełaruskim pradpryjemstvam dostup da rynku dziaržzakupak u ramkach zakazaŭ rasiejskaha vajskovaha viedamstva nie buduć: «Što tyčycca dziaržabaronzakazu, to heta abaronieny artykuł vydatkaŭ va ŭsim śviecie … u hetym pytańni nijakija ekśpierymienty nie darečnyja».
Ciapier što čakajecca ad Biełarusi, dakładniej, ad «haranta niezaležnaści» (jak pramym tekstam, tak i pamiž radkoŭ).
— Uzhadnić z Rasijaj pamiery akcyzaŭ na tytuniovuju pradukcyju: «rasijski biudžet niedaatrymlivaje miljony dalaraŭ».
— Spynić reekspart zachodniaj sankcyjnaj pradukcyi.
— Puścić rasijski kapitał u małočnuju pramysłovaść.
— Pravieści reviziju sumiesnych pramysłovych prajektaŭ, bo raniejšy śpis (MAZ / KAMAZ dy inš.) užo sastareŭ i nie aktualny.
— Pravieści invientaryzacyju Damovy pra sajuznuju dziaržavu 1999 hoda i vyznačycca z darožnym płanam pa ŭnifikacyi mytnaj, padatkovaj, hrašova-kredytnaj palityki, kali chočacca atrymać značnyja kampiensacyi: «treba vyznačycca, u jakoj madeli my raźvivajemsia: albo pa praviłach Sajuznaj dziaržavy, albo pa praviłach JEAES».
Palitołah padsumoŭvaje:
«Vychodzić, što płanamiernaje abviaržeńnie Kramlom arhumientaŭ Łukašenki z pravodžanych im vialikich pres-kanfierencyj stanovicca rehularnaj dadzienaściu. Dy jašče i ŭ pieryjad prezidenckaj kampanii, kali vialikija kanfierencyi i papulizm asabliva darahija. Reakcyja Łukašenki nie prymusiła siabie doŭha čakać».
