«Apazicyi varta sustrecca z Babičam. My — nie Ukraina». Dźmitryjeŭ padrabiazna raspavioŭ pra 1,5-hadzinnuju razmovu z pasłom Rasii
Fota z fejsbuka
Rasijski pasoł u Biełarusi Michaił Babič pryniaŭ lidaraŭ hramadska-palityčnaha ruchu «Havary praŭdu» Andreja Dźmitryjeva i Taćcianu Karatkievič. U intervju Svabodzie Dźmitryjeŭ raspavioŭ, jak i navošta sustrakaŭsia z rasijskim pasłom i što pačuŭ z vusnaŭ śpiecyjalnaha pradstaŭnika Uładzimira Pucina ŭ Biełarusi.
Pra matyŭ i metu sustrečy
«My sustrakajemsia z roznymi pasłami. Heta narmalnaja mižnarodnaja praca. Ja dumaju, što vas nie ździŭlaje, kali my pryjaždžajem vystupać u Jeŭrapiejski parłamient. Rasija — vielmi važnaja dla Biełarusi kraina. Jana na nas upłyvaje i my ŭsie heta razumiejem. Pa-druhoje, my danieśli jamu svaju pazicyju. Adnosiny z Rasijaj siońnia — heta samyja zakrytyja dla hramadstva stasunki. My ličym, što važna razmaŭlać i zrazumieć pazicyju Rasii. Treba padklučać hramadzianskuju supolnaść, pašyrać kolkaść placovak dla dyjałohu. Treba pazbaŭlacca ad iluzii, što prezidenty pra ŭsio damoviacca».
Pra toje, jak trapić da śpiecpradstaŭnika Pucina
«Heta było niaprosta. Ale pracedura była absalutna zvyčajnaj, jak i ŭ vypadku ź inšymi pasłami. Mižnarodnaja słužba «Havary praŭdu» dasłała ŭ pasolstva list z prośbaj ab sustrečy. Uzhadnialisia pytańni razmovy, jakija my chočam zakranuć. Usia pierapiska ciahnułasia kala troch miesiacaŭ».
Pra vybary ŭ Biełarusi
«Surjoznaj razmovy pra heta nie było».
Pra Babiča jak čałavieka
«Jon pakinuŭ uražańnie palityka novaj hienieracyi, vielmi prahmatyčnaha i dziełavoha, jakija ŭmieje vieści biznes-pieramovy i nie lubić nieprahmatyčnaści. Babič adroźnivajecca ad inšych pasłoŭ. Jon nie dypłamat. Jon nam tak i skazaŭ, što pryjechaŭ siudy vyrašać tyja prablemy, jakija nazapasilisia za 20 hadoŭ u sajuznych adnosinach. Tak heta i adčuvajecca. Jon skłaŭ sabie śpis pytańniaŭ i prasoŭvaje tut rasijski pohlad taho, jak jany pavinny vyrašacca. A my možam tłumačyć jamu naš pohlad i našyja intaresy».
Pra ahresiju suprać Biełarusi
«U nas była karotkaja pramova pra mahčymaści ahresii Rasii. Jon całkam heta vyklučyŭ i skazaŭ, što heta niemahčyma. Jany bačać asnovu sajuznaj dziaržavy ŭ ekanomicy i chočuć raźviazać vuzły mienavita ŭ ekanomicy, a nie brazhatać zbrojaj adzin pierad druhim. My skazali, što dla biełarusaŭ tema suvierenitetu vielmi važnaja i što biełaruskaje hramadstva niervova reahuje na napady i staŭleńnie pad sumnieŭ našaj niezaležnaści. Jon na heta adkazaŭ, što Rasija nia stavić pad sumnieŭ niezaležnaść Biełarusi. Što Rasija nie ličyć mahčymym adkrucić 25 hadoŭ historyi. Ale Maskva choča zrazumieć, jakoj maje być budučynia adnosinaŭ».
Pra biełaruskuju movu
«Zakranuli pytańnie movy — što my vystupajem za jaje šyrejšy ŭžytak. My skazali, što nie ličym heta pahrozaj. I adnosiny z Zachadam — heta nie pahroza Rasii, a narmalnaja praca. U Rasii, darečy, damova ź ES takaja, što nam tolki maryć. Jon zapeŭniŭ, što nie maje niehatyŭnaha staŭleńnia da biełaruskaj movy i što nijakaj prablemy ŭ tym, kab biełarusy jaje papularyzavali, jon nie bačyć».
Pra krytyku «Havary praŭdu» za prarasijskaść
«Krytykavacca kim? Tymi, dla kaho ŭsio, što b my ni zrabili, my i tak praŭładnyja abo prarasijskija. My na ich nie aryjentujemsia. Ludzi, jakija razumiejuć, jak žyvie i jak budzie žyć Biełaruś, viedajuć, što biez narmalnych adnosinaŭ z Rasijaj nam nie zachavać ni biaśpieku, ni krainu, ni ekanomiku. Jany razumiejuć, što my robim narmalnuju palityčnuju pracu, i sustreča z pasłom — heta nie vykazvańnie padtrymki pasłu, a palityčnyja praca».
Pra novyja sustrečy
«Ja byŭ by rady, kali b paśla nas z pasłom pasprabavali sustrecca i biznesoŭcy, i pramysłoŭcy, i ŭsie astatnija apazicyjnyja i palityčnyja partyi, jakija b vykazali jamu svaju pazicyju nakont adnosinaŭ z Rasijaj. Siońnia zašmat mitaŭ pra apazicyju, jakija pieraškadžajuć narmalna raźvivacca. Treba tak pracavać, kab zakidy, što apazicyja choča vysłać ź Biełarusi ŭsich rasijcaŭ, byli b nievierahodnyja. Siońnia my niedapracoŭvajem na ŭschodnim kirunku, jakija dla nas, dla biełaruskich intaresaŭ vielmi važny».
Pra toje, što Biełaruś — nie Ukraina i nie ZŠA
«Šmat jakija palityki bajacca, što jany sustrenucca z rasijskim pasłom, a paśla na ich vyljecca stolki ŭsiaho. Časam ludzi błytajuć, dzie my žyviem. My žyviem nie va Ukrainie i nie ŭ ZŠA. My biełarusy, u nas svaje stasunki z Rasijaj i nam treba ich vybudoŭvać. Treba mianiać paradyhmu. Ja nie vyklučaju, što kali b jany prasili ab takoj sustrečy, to i Ryhor Kastusioŭ sustreŭsia b ź im i davioŭ, čamu Rasii vyhadna pabudavać ścianu, jak Amierycy. Ale heta nie pytańnie voli pasła, a našaj voli. U «Havary praŭdu» takaja vola jość».
