U Biełarusi ŭpieršyniu zaŭvažyli palarnuju čajku FOTA
9 sakavika na sažałcy ŭ rajonie Šabanoŭ u Minsku była adznačanaja palarnaja čajka — marskaja ptuška, jakaja redka zalataje ŭhłyb sušy. Nazirańnie novaha dla krainy vidu zrabiła arnitołah Iryna Samusienka, siabra centralnaj rady hramadskaj arhanizacyi «Achova ptušak Baćkaŭščyny».
Palarnaja čajka hniazdujecca na skałach na paŭnočna-ŭschodnich uźbiarežžach Kanady i ŭ Hrenłandyi. Zimujuć ptuški na poŭnačy Atłantyki, taksama na Paŭnočnym mory. A voś na Bałtyku zalatajuć paraŭnalna redka.
Redaktar sajta «Ptuški štodnia», arnitołah Dźmitry Vinčeŭski zaŭvažaje, što palarnaja čajka ŭ Litvie adznačałasia tolki adnojčy, u 1954 hodzie na marskim uźbiarežžy, a ŭ Polščy ŭpieršyniu adznačanaja ŭ 1974 hodzie, z taho času rehistravałasia 40 razoŭ, pryčym amal 70 % usich sustreč adbylisia na marskim uźbiarežžy ci ŭ partach i pieravažna ŭzimku.
«Chutčej za ŭsio, ptuška trapiła da nas razam z mocnymi zachodnimi viatrami, jakija byli na minułym tydni, — kaža Iryna Samusienka. -— Hety zalot — jašče adno śviedčańnie klimatyčnych źmienaŭ. Čajki — cikavaja i vielmi płastyčnaja hrupa ptušak, jakaja ŭ apošnija dziesiacihodździ značna evalucyjanuje, adaptujecca da źmienaŭ va ŭmovach žyćcia».
Dziakujučy aktyŭnym nazirańniam arnitołahaŭ i biordvočaraŭ, tolki za apošnija hady ŭ Śpis ptušak krainy dadalisia kamčackaja čajka, žoŭtanohaja čajka i čajka-burhamistr, pryčym apošnija dva vidy ŭpieršyniu adznačany ŭ navakolli Minsku i ŭ abodvuch vypadkach rehistracyi adbylisia z udziełam Iryny Samusienka. Palarnaja čajka — vypadkova zalotny vid. Nastupny raz ptuška moža zalacieć u Biełaruś praz hod, a moža i praz 50 hadoŭ.