Trenier zbornaj Niamieččyny vyklučyŭ z kamandy troch zornych futbalistaŭ «Bavaryi»
Fota z instahrama zbornaj Niamieččyny
Joachim Leŭ paviedamiŭ forvardu Tomasu Miuleru, a taksama abaroncam Matsu Chumielsu i Džeromu Baatenhu, što bolš nie płanuje vyklikać ich u zbornuju Niamieččyny. Trenier zajaviŭ futbalistam pra svajo rašeńnie ŭ aŭtorak na sustrečy ŭ Miunchienie, paviedamlaje pres-słužba niamieckaj zbornaj.
«My chočam praciahnuć źmieny, jakija pačali ŭ minułym hodzie. Miuler, Chumiels i Baatenh bolš nie buduć vyklikacca ŭ zbornuju. Mnie było važna rastłumačyć hetaje rašeńnie futbalistam «Bavaryi» pry asabistaj sustrečy. Nastaŭ čas vyznačycca z budučym zbornaj Hiermanii, dać kamandzie novaje abličča. Pierakanany, što heta pravilny krok», — cytuje Lova Bild.
«Ja zasmučany hetaj navinoj, bo dla mianie zaŭsiody było važna vystupać za kamandu Niamieččyny», - napisaŭ Baatenh.
Baatenh vystupaŭ za zbornuju z 2009 hoda. 30-hadovy futbalist pravioŭ u nacyjanalnaj kamandzie 75 matčaŭ, zabiŭšy adzin hoł. Chumiels debiutavaŭ u zbornaj u 2010-m, zhulaŭ 70 matčaŭ i zabiŭ piać miačoŭ. Na rachunku 29-hadovaha Miulera 38 hałoŭ u 100 hulniach.
U 2014 hodzie jany zavajavali ŭ składzie zbornaj Hiermanii załatyja miedali na čempijanacie śvietu ŭ Brazilii.
Niamieččyna — supiernik zbornaj Biełarusi ŭ adboračnym turniry da Jeŭra-2020. Kamandy hulajuć u adnoj hrupie z Hałandyjaj, Paŭnočnaj Irłandyjaj i Estonijaj. U Barysavie zbornyja Niamieččyny i Biełarusi zhulajuć 8 červienia.
