«Bruśnička» spyniaje svaju pracu?
Kampanija «Jeŭrahandal» zhortvaje svaju sietku dyskaŭntaraŭ «Bruśnička». Takuju vysnovu možna zrabić z dynamiki kolkaści handlovych abjektaŭ, zarehistravanych u handlovym rejestry, a taksama ź infarmacyi na aficyjnym sajcie sietki.
Mabyć, najbujniejšy ŭ Biełarusi rytejler rasčaravaŭsia ŭ farmacie miakkaha dyskaŭntara i vyrašyŭ zasiarodzicca na raźvićcio svajho najbujniejšaha brenda «Jeŭraopt» i novaj sietki žorstkich dyskaŭntaraŭ «Chit! Ekspres», zapuščanaj u kancy minułaha hoda.
Kali paraŭnoŭvać dadzienyja handlovaha rejestra za lipień i listapad 2018 hoda, to kolkaść kram, jakija pracujuć pad HM «Bruśnička», skaraciłasia sa 102 da 70 handlovych abjektaŭ.
U roznych ŚMI ŭ apošni čas źjaŭlajucca naviny pra toje, što kramy, jakija pracavali pad šyldaj «Bruśnička», pierajmianoŭvajucca ŭ «Jeŭraopt» abo atrymlivajuć nazvu novaj sietki dyskauntaraŭ «Chit! Ekspres».
Tak, da prykładu, jašče ŭ śniežni minułaha hoda vydańnie «Miedyja-Paleśsie» paviedamiła, što «Jeŭrahandal» zakryŭ u Pinsku kramu «Bruśnička» na vulicy Centralnaj i adkryŭ na jaho miescy «Jeŭraopt Markiet». Supracoŭniki paviedamili vydańniu, što handlovy abjekt u starym farmacie nie prynosiŭ prybytku.
Niekalki dzion tamu hrodzienski partał NewGrodno.by paviedamiŭ, što dyskaŭntar «Bruśnička» na vulicy Savieckich Pahraničnikaŭ, 118 pamianiaŭ šyldu i atrymaŭ raniejšuju nazvu «Jeŭraopt». Takim čynam, paśla 16 miesiacaŭ pracy novaj sietki ŭ Hrodnie nie zastałosia ni adnoj kramy sietki «Bruśnička».
Na aficyjnym sajcie «Bruśnički» ŭ raździele «Kramy» na 2 sakavika 2019 hoda značycca tolki adzin mahazin u Homielskaj vobłaści.
U kampanii pakul nie kamientujuć situacyju i nie paviedamlajuć ab płanach rytejlera nakont dalejšaha losu «Bruśnički».
Nahadajem, što sietka kram sietki «Bruśnička» była zapuščana ŭ žniŭni 2017 hoda. Sietka pracavała ŭ dvuch farmatach — mini-dyskaŭntar i zvyčajny dyskaŭntar. U mini-dyskaŭntarach asartymient uklučaŭ 1800 najmieńniaŭ, uklučajučy małočnyja, miasnyja i kaŭbasnyja vyraby, śviežuju harodninu i sadavinu, a taksama bakaleju i niecharčovyja vyraby. Asartymient standartnaha dyskaŭntara — 2700 tavarnych pazicyj.
U kramach sietki prapanoŭvaŭsia bolš vuzki asartymient tavaraŭ pa akcyjnych cenach u inšych sietkach. Roźnica cen składała da 40%.
Adnak dadzieny farmat, chutčej za ŭsio, nie apraŭdaŭ siabie, i rytejler ŭ śniežni minułaha hoda vyrašyŭ zapuścić novuju sietku dyskaŭntaraŭ pad nazvaj «Chit! Ekspres».
Novaja sietka pracuje ŭ farmacie žorstkaha dyskaŭntara z vuzkim asartymientam i adsutnaściu na palicach skorapsavalnych praduktaŭ. U asartymiencie — bakaleja, kandytarskija vyraby, pramtavary, ałkaholnaja pradukcyja.
Da kanca zimy rytejler abiacaŭ zapuścić bolš za 40 mahazinaŭ pad hetaj handlovaj markaj pa ŭsioj Biełarusi.
