Parłamienckija vybary ŭ Estonii vyjhrała apazicyja: premjeram stanie 41-hadovaja byłaja pamočnica režysiora
Budučy premjer: 41-hadovaja Kaja Kałas. Što praŭda, jak papiaredni Jury Ratas staŭ premjeram u 38 hadoŭ, a Tajvi Ryvas, eks-kiraŭnik centrystaŭ, naohuł u 34 hady. Fota: Raul Mee, Postimees
Prava-libieralnaja apazicyjnaja Partyja reformaŭ Estonii atrymała pieramohu na parłamienckich vybarach u krainie, jakija prajšli ŭ minułuju niadzielu.
Partyja reformaŭ atrymała 34 mandaty ŭ estonskim parłamiencie, pavialičyŭšy svaju prysutnaść na čatyry mandaty. Heta najlepšy vynik u historyi partyi, stvoranaj u 1994 hodzie. Da hetaha jaje maksimum byŭ u 2011 hodzie — 33 mandaty.
Kiroŭnaja Centrysckaja partyja atrymlivaje 26 mandataŭ, na adzin mienš, čym było raniej. Jašče adna apazicyjnaja partyja — Kansiervatyŭnaja narodnaja partyja (EKRE) — značna ŭmacavała svaje pazicyi ŭ parłamiencie, atrymaŭšy 19 mandataŭ, na 12 bolš, čym raniej. Asłabiła svaje pazicyi i inšaja kirujučaja partyja — Isamaa (Ajčyna), u jaje zaraz 12 mandataŭ (minus dva), u Sacyjał-demakratyčnaj partyi — 10 mandataŭ (minus piać).
Kiraŭnik Centrysckaj partyi i premjer Estonii Jury Ratas pryznaŭ pieramohu Partyi reformaŭ na vybarach.
Jon zajaviŭ, što treba ŭmieć prajhravać, pakolki projhryšy naradžajuć pieramohi.
«Ja abiacaju, što budu pracavać nad tym, kab Centrysckaja partyja była ŭ nastupnaj kaalicyi», — pryvodzić jaho słovy Delfi.
Lidar Partyi reformaŭ Kaja Kałas skazała, što za ich pieramohaj staić mocnaja kamanda i kamandnaja praca. Jana adznačyła, što padatkovaja palityka ciapierašniaha ŭrada ŭ mnohich ludziej vyklikała niehatyŭ, što taksama adbiłasia na vynikach. Toje, jak buduć raźmierkavany ministerskija partfieli, partyja jašče nie abmiarkoŭvała, udakładniła jana.
Partyja reformaŭ i Centrysckaja partyja vyklučyli mahčymaść stvareńnia kaalicyi razam z EKRE, zajaviŭšy, što papulistam niama miesca va ŭradzie Estonii. Staršynia EKRE Mart Chielmie zajaviŭ, što nie suprać hetaj idei.
Kaja Kałas nazvała dva varyjanty budučaj kaalicyi: udvaich kiravać lahčej, čym ŭtroch, ale pry farmiravańni kaalicyi nielha kiravacca tolki matematykaj.
Kai Kałas — 41 hod. Jejny baćka — viadomy estonski palityk Sijm Kałas, jaki ŭ 1994 h. zasnavaŭ Partyi reformaŭ, a ŭ 2002—2003 hh. byŭ premjeram. Pradzied Eduard Alvier — pieršy načalnik palicyi Estonskaj Respubliki.
Pavodle adukacyi jana juryst, pracavała advakatam, skončyła taksama Estonskuju škołu biznesu, niekatory čas pracavała pamočnikam režysiora. Deputat parłamienta z 2011 hoda.
