«Viniłavy karol Viciebskaj vobłaści». Biełaruski piśmieńnik sabraŭ kalekcyju ź niekalkich tysiač płaścinak FOTAFAKT
Piśmieńnik i vydaviec Aleś Arkuš raspavioŭ «NN», što naźbiraŭ kala 2-ch tysiač viniłavych płaścinak. Zachoŭvajucca jany ŭ piaci punktach troch pakojaŭ jaho kvatery ŭ Połacku.
Aleś Arkuš.
«Nabyvać zachodnija viniłavyja kružełki ja pačaŭ u 17-hadovym uzroście, kali vučyŭsia ŭ Žodzinskim palitechnikumie. Dobra pamiataju pieršuju surjoznuju pakupku: albom «Queen II». Kupiŭ płaścinku za 50 rubloŭ, prytym što stypiendyja składała 30 rubloŭ. Mienavita tyja hurty i albomy, jakija trapili da mianie ŭ maładości, pa siońniašni dzień samyja darahija i lubimyja. Što heta byli za hurty? Pink Floyd, Led Zeppelin, Queen, Black Sabbath, Deep Purple, Nazareth, Uriah Heep, Electric Light Orchestra, Fleetwood Mac, Bad Company, Suzi Quatro, Rod Stewart, Kate Bush…» — raskazvaje Aleś.
Paśla hetaha chłopiec pajšoŭ słužyć u vojska i razdaŭ častku svajoj kalekcyi znajomym. Zachapleńnie abudziłasia ŭžo padčas navučańnia ŭ narhasie, ale pry pierajeździe ŭ Połack z Žodzina Aleś raźbiŭ u prajhravalniku strabaskop.
Samyja kaštoŭnyja płaścinki.
«Na hetym majo «fiłafanictva» pačało čachnuć. Kałonki ja addaŭ połackamu hurtu «Miascovy čas». Kružełki i aparat viarnulisia ŭ Žodzina. I ničoha nie pradvieściła, što zachapleńnie junactva da mianie moža viarnucca. Ale ŭ 2010-m hodzie ja pačaŭ pisać svoj pieršy raman «Palimpsest». Jon jakraz pra toj čas — hady maładości. Kab abudzić pamiać, ja kupiŭ na polskim allegro.pl niekalki kružełak z majoj samaj rańniaj kalekcyi. Zatym jašče niekalki. Zatym jašče. A vyjści z hetaha viru ŭžo nie zdoleŭ».
Spačatku Aleś sabraŭ kalekcyju asnoŭnaj kłasiki, a paśla pačaŭ palavać na hurty, jakija nie dasiahnuli finansavaha pośpiechu i zapisali ŭsiaho 1—2 albomy.
«Jość u mianie i vielmi redkija kružełki, pieravažna z 60-ch hadoŭ. Naprykład, albom «At Home» (1969) hurta Shocking Blue. Redkija vydańni albomaŭ The Beatles z roznych ekzatyčnych krain, naprykład ź Filipin».
Niešta mužčyna nabyvaje ŭ polskich kramach praz allegro.pl. Čas ad času baćku raduje kružełkami z-za miažy starejšy syn Anton.
Małaja častka kalekcyi.
«Pry majoj najnoŭšaj fazie zachapleńnia ja ŭžo źmianiŭ treci aparat. Ciapier u mianie prajhravalnik Sherwood, uzmacnialnik Nakamichi, kałonki Nitachi. Kłasičnyja, staryja fiłafanisty lubiać staruju japonskuju techniku. Choć siońnia vypuskajecca i novaja, ale pa joj bačna, što jana kitajskaja. Niejki čas pobač z maim domam u Połacku pracavała kramka, dzie možna było kupić staruju techniku i kružełki. Ale jana pratrymałasia ŭsiaho niedzie hod. A voś u Polščy viniłavyja kružełki z tryumfam viartajucca. Jany ŭžo navat pačali pradavacca ŭ supiermarkietach», — dzielicca padrabiaznaściami kalekcyjanier.
Kali Aleś sabraŭ pieršuju tysiaču kružełak, to padumaŭ, što staŭ «viniłavym karalom» Viciebskaj vobłaści. Ale chutka heta «karaleŭstva» prajšło: navat u susiednim domie z Alesiem žyvie mužčyna, jaki naźbiraŭ užo 3400 kružełak. Praŭda, afišavać heta jon nie choča.
