Pamior Uładzimir Anculevič, jaki kiravaŭ kampanijaj BNF za refierendum u 1992 hodzie
Viera Čujko, Uładzimir Anculevič i Zianon Paźniak pierad zdačaj podpisaŭ za refierendum u CVK, 1992 hod. Fota haziety «Svaboda»
Pamior adzin z aktyvistaŭ Biełaruskaha narodnaha frontu Uładzimir Anculevič. Raźvitańnie ź im adbudziecca 28 lutaha ŭ Minsku pa adrasie Kulman, 33a, paviedamiŭ u fejsbuku były deputat Viarchoŭnaha savieta Leanid Dziejka.
Mienavita Uładzimir Anculevič u 1992 hodzie byŭ staršynioj inicyjatyŭnaj hrupy, kali BNF sprabavaŭ arhanizavać refierendum nakont daterminovych vybaraŭ u Viarchoŭny Saviet. Tady było sabrana bolš za patrebnyja 350 tysiač podpisaŭ, adnak Viarchoŭny Saviet admoviŭsia ad praviadzieńnia refierendumu.
Voś što kaža kolišni paplečnik Uładzimira Anculeviča pa BNF Vincuk Viačorka:
«Kali stvaraŭsia Biełaruski narodny front, Uładzimir Anculevič byŭ navukoŭcam, fizykam, pracavaŭ u łabaratoryi Juryja Chadyki ŭ Akademii navuk. Dakładny, vydatna arhanizavany, absalutna nadziejny i prytym ścipły, jon usiu svaju enierhiju achviaravaŭ na frontaŭskuju spravu. Arhanizoŭvaŭ vydańnie masavaj pieryjodyki BNF, ładziŭ pracu ŭ rehijonach, a kali nastaŭ vyrašalny momant baraćby za niezvarotnaść demakratyčnych źmienaŭ, Uładzimir Anculevič uznačaliŭ inicyjatyŭnuju hrupu zboru podpisaŭ za refierendum ab daterminovych vybarach i kanstytucyjnych źmienach. Heta jahonaja praca dapamahła i arhanizavać akcyju, i nie zmarnavać nivodnaha z 446 tysiačaŭ podpisaŭ, sabranych aktyvistami Frontu pa ŭsioj krainie. Heta jamu naležali vydatnyja idei jurydyčnaj abarony kampanii za refierendum ad atakaŭ namenklaturnaj ułady.
I paśla reakcyi 1994 hoda Uładzimir Anculevič praciahły čas zastavaŭsia na vastryi baraćby za svabodu ŭ Biełarusi jak u palityčnych, tak i ŭ hramadzkich, analityčnych strukturach. Urešcie viarnuŭsia da fiziki — užo jak vykładčyk kafiedry mietodyki vykładańnia fiziki BDPU i 5-j himnazii. I tut jon vyjaŭlaŭ svoj usiebakovy talent: pisaŭ dapamožniki, padrychtavaŭ bolš za sotniu pieramožcaŭ alimpijadaŭ. Viedaju, što vučni vielmi lubili svajho nastaŭnika… Śvietłaja pamiać».
