Šeść kampanij ź biełaruskaj nazvaj, pra jakija varta viedać
Na biełaruskim rynku nie tak šmat kampanij, jakija vykarystoŭvajuć u nejminhu słovy na rodnaj movie i jašče mienš tych, u kaho, akramia nazvy, biełaruskaja mova zadziejničanaja ŭ kamunikacyjach, servisie ci ŭpakoŭcy. Tamu siońnia, u honar Mižnarodnaha dnia rodnaj movy, uzhadvajem ajčynnyja kampanii, jakija padkreślivajuć nacyjanalnuju identyčnaść u naźvie ci svaich praduktach, a taksama prasoŭvajuć kaštoŭnaści biełaruskaj movy.
Miłavica
Nazva pachodzić ad staražytnasłavianskaha imia bahini Vieniery. U 1991-m kampanija vyrašyła pierajmienavacca, i zamiest «Kamsamołki» na śviet źjaviłasia «Miłavica», bolš adpaviednaja novaj eposie i novym kaštoŭnaściam. Aŭtaram nejminhu staŭ piśmieńnik Uładzimir Paŭłaŭ.
Za apošnija hady «Miłavica» ŭdzielničała ŭ niekalkich cikavych prajektach pa pryciahnieńni novaj aŭdytoryi. U pryvatnaści, u 2018 byŭ zapuščany fotaprajekt z žančynami-madelami roznaha ŭzrostu. Takim čynam kampanija padtrymała trend na baraćbu z ejdžyzmam u madelnych fotasiesijach.
Ciapier kampanija ŭvachodzić u estonski chołdynh Silvano Fashion Group i pracuje nie tolki na rynku Biełarusi, ale i šmatlikich jeŭrapiejskich krain. Darečy, dola biełaruskaha rynku pa dadzienych chołdynhu pastupova skaračajecca — u kancy 2018 hoda prodažy ŭ Biełarusi skaracilisia na 12,3%, a ahulnaja suma prodažaŭ, jakaja prychodzicca na Biełaruś, źniziłasia da 25,5%.
Śvitanak
Ajčynny vytvorca trykatažu źmianiŭ nazvu na zvykłaje biełaruskamu vuchu «Śvitanak» u 1994 hodzie. U toj ža čas kampanija źmianiła i formu ŭłasnaści, pieratvaryŭšysia ŭ akcyjaniernaje tavarystva.
Bolšaja častka prodažaŭ kampanii idzie na ekspart, na biełaruski rynak prypadaje prykładna 30%. Samaje aktyŭnaje raźvićcio idzie na rasijskim rynku, kudy kampanija pradaje franšyzy dla raźvićcia kram firmiennaha handlu. U 2019 hodzie atrymana bolš za 50 zajavak na adkryćcio takich kram.
U svajoj pradukcyi «Śvitanak» vykarystoŭvaje i nacyjanalnyja matyvy, ale časam tut zdarajucca kanfuzy.
Tak, u 2016 hodzie kampanija vypuściła na rynak futbołki ź biełaruskim arnamientam. Akazałasia, što ich dyzajn mocna nahadvaje kalekcyju takich ža futbołak repiera Snup Doha. U kampanii rastłumačyli supadzieńnie vypadkovaściu i tym, što biełaruskija arnamienty ŭ pryncypie padobnyja.
Słodyč
Mienavita słodyčami i słavicca kampanija, jakaja vypuskaje sotni vidaŭ piečyva na ŭnutrany i źniešni rynki. «Słodyč» atrymała novaje imia ŭ 1994-m, źmianiŭšy niepryvabnuju nazvu «Minskaja kandytarskaja fabryka №2».
Asnoŭny rynak dla kampanii — biełaruski, na dolu ekspartu prypadaje tolki 10% prodažaŭ. Tamu ŭ pakavańni piečyva aktyŭna vykarystoŭvajecca nacyjanalnaja simvolika: arnamienty, vałoški, uzory.
Lidskaje
Na biełaruskuju movu vytvorca piva i kvasu pierajšoŭ u 2016 hodzie. Pryčym zrabiŭ heta maštabna: łahatyp, etykietki, sajt, nejminh, kamunikacyi i fiestyvali stali z hetaha momantu biełaruskamoŭnymi.
Vyniki 2017 hoda paćvierdzili pravilnaść abranaj stratehii: prodažy piva vyraśli na 9,2%, kvasu — na 6%. A fiestyval Lidbeer nazvali samym biełaruskim mierapryjemstvam hoda za košt poŭnaha pierachodu na biełaruskuju movu: nalepki, karty, ukazalniki, płakaty i navat ceńniki zrabili pa-biełarusku.
Akramia hetaha, kampanija zajmajecca i sacyjalnymi prajektami pa prasoŭvańni biełaruskaj movy. «Ahulnaja dyktoŭka» źbiraje sotni achvotnych napisać dyktoŭku pa biełaruskaj movie i pravieryć svaje viedy. Letam 2018 hoda tekst dyktoŭki byŭ pryśviečany 400-hodździu pieršaha biełaruskaha bukvara, a začytvała dyktoŭku śpiavačka Rusia.
Bank Dabrabyt
Bank Maskva-Minsk pravioŭ u 2019-m rebrendynh i staŭ biełaruskim Bankam Dabrabyt. Hety krok u banku patłumačyli pašyreńniem aŭdytoryi i pieradprodažnaj padrychtoŭkaj. Pa słovach staršyni praŭleńnia banka Ihara Lichahruda, rebrendynh pavinien zrabić bolš sučasnym usprymańnie banka, pryvieści jaho ŭ adpaviednaść ź siońniašnim časam.
Akramia nazvy, bank atrymaŭ novy firmovy styl ź biełaruskaj nacyjanalnaj simvolikaj, pamianiaŭ sajt, zrabiŭ jaho biełaruskuju viersiju, rychtuje abnoŭleny mabilny dadatak.
Bank Dabrabyt uvachodzić u Top-10 biełaruskich bankaŭ pa pamiery aktyvaŭ i zajmaje pieršaje miesca pa abjomie valutnych tarhoŭ na biełaruskaj valutna-fondavaj biržy.
Bulba Ventures
Asobna varta ŭzhadać kampaniju, jakaja prasoŭvaje Biełaruś na suśvietnaj scenie nie stolki svajoj biełaruskaściu, kolki ŭdałymi ŭhodami z IT-hihantami. Bulba Ventures — adna ź niešmatlikich ajčynnych inviestycyjnych IT-kampanij, jakaja vykarystała ŭ naźvie biełaruskuju movu.
Stvaralniki kampanii — zasnavalnik AIMatter i Maps.me Juryj Mielničak i były top-mieniedžar «Atłant-M» Andrej Aŭsijevič patłumačyli, što nazva kampanii pryjšła ŭ hałavu praktyčna ŭ apošni momant pierad rehistracyjaj. Na dumku Andreja Aŭsijeviča, słova «bulba» — pryhožaje i dobraje, takoje ž, jak apple pa-anhlijsku.
U žniŭni 2017 hoda AIMatter byŭ nabyty kampanijaj Google, a u 2018 adzin z prainviestavanych Bulba Ventures startapaŭ FriendlyData byŭ pradadzieny ServiceNow.