Była Daša, staŭ Jaŭhien: transhiendar ź Minska źmianiŭ poł u pašparcie i raskazvaje, čaho heta jamu kaštavała
22-hadovy minčuk Jaŭhien Siańkoŭ, viadomy pad tvorčym psieŭdanimam Ženia Vialko, padzialiŭsia sa svaimi siabrami i padpisantami navinoj: «Ja atrymaŭ pašpart ź imiem Jaŭhien Dźmitryjevič i paznakaj «M» u hrafie «poł». Kab dasiahnuć hetaha, Jaŭhien vydatkavaŭ na abśledavańni i pierapisku try hady.
Śviežańki pašpart Jaŭhiena.
«NN»: Jak adbyvałasia ŭsia pracedura pa źmienie pašpartnych dadzienych?
Jaŭhien Siańkoŭ: Źmianić pašpart u našaj krainie možna pa roznych pryčynach, naprykład, kali vy chočacie inšaje proźvišča (umoŭna kažučy, vy tvorčy čałaviek i karystajeciesia psieŭdanimam). Ja spačatku tak i chacieŭ zrabić, bo nie byŭ upeŭnieny, što dajdu da źmieny ŭsich inšych dadzienych. Dla hetaha treba było b pakazać tvorčyja pradukty, na jakich dzieści budzie napisanaja toje proźvišča, jakoje vam patrebna.
Jaŭhien Siańkoŭ.
Ale ŭ vyniku ja źmianiaŭ pašpart na padstavie «źmieny pałavoj prynaležnaści» — tak u Biełarusi nazyvajecca pracedura karekcyi połu. U jaje ŭvachodzić šmat čaho, i źmienaj pašparta jana čaściej za ŭsio nie abmiažoŭvajecca. Spačatku treba stać na ŭlik u adpaviednuju miedycynskuju instancyju. U maim vypadku heta byŭ Centr pamiežnych stanaŭ u Minsku, na vulicy Miendzialejeva.
Ciapier ludziej, jakija płanujuć karekcyju połu, prymajuć u RNPC u Navinkach. Zapisvaješsia na pryjom da seksołaha, prychodziš i kažaš, što chočaš zrabić pierachod.
Jak i što kazać — sprava kožnaha kankretnaha čałavieka, ničoha raić nie budu. Kali raspaviadać, što chočuć i nie chočuć pačuć śpiecyjalisty, atrymajecca jašče adno intervju.
Dalej ty chodziš na ŭsie mahčymyja abśledavańni, zdaješ usialakija analizy i paralelna, u siarednim raz na try miesiacy, naviedvaješ seksołaha i psichołaha, kab dakazać, što ty sapraŭdy adčuvaješ siabie jak čałavieka inšaha akušerskaha połu. Kolki było hetych abśledavańniaŭ — užo nie pamiataju, ale dosyć šmat. Niekatoryja ź ich prachodzili ŭ stacyjanary (potym viesieła raskazvać ludziam, što ty lažaŭ u sapraŭdnaj psichbalnicy).
Tam abśledujuć usio tvajo cieła i psichiku, pačynajučy z hienietyki i endakrynałohii i zakančvajučy testami na ŭvažlivaść.
Kali ŭsie daktary zrobiać vysnovu, što ty «sapraŭdny», to adpraviać na pieršuju kamisiju — tam roznyja śpiecyjalisty (niekatoryja naohuł nie źviazanyja ź miedycynaj i hiendarnymi pytańniami, naprykład, čałaviek ź Ministerstva ŭnutranych spraŭ) vyrašajuć, ci možna tabie mianiać pašpart. Voś mnie i dazvolili.
Rašenńnie kamisii vyhladaje jak papierka z pastaŭlenym tabie dyjahnazam («transseksualizm»), dazvołam «źmianić takuju pałavuju prynaležnaść na takuju» i podpisami členaŭ kamisii. Z hetym rašeńniem ja pajšoŭ u ZAHS, aformiŭ novaje paśviedčańnie ab naradžeńni, a potym u pašpartnym stale zamoviŭ novy pašpart. Usie hetyja pracedury, ad pieršaha pryjomu i da atrymańnia pašparta, zaniali ŭ mianie kala troch hadoŭ.
«NN»: Što z hetaha ŭsiaho dałosia tabie najbolš składana?
JAS: Składanaść chutčej nie ŭ jakich-niebudź kankretnych punktach, a ŭ ich kolkaści: pastajanna sutykaješsia ź situacyjami, u jakija ty nie ŭpisvaješsia. U ciabie jość šaniec źlicca ź inšymi, kali ty dobra adyhryvaješ cyshiendarnaha (kali hiendarnaja identyčnaść supadaje ź bijałahičnym połam). A kali ŭ ciabie andrahinnaja źniešnaść ci niejkija fieminnyja rysy charaktaru, kožny — što doktar, što kasir u mahazinie, — budzie ličyć svaim abaviazkam niejak na heta adreahavać. Vyhnać z prybiralni, naprykład, ci pažadać chutčej pamierci.
Na ščaście, maja maci mianie pryniała i padtrymlivała na kožnym etapie pierachodu. Taksama padtrymlivaŭ moj partnior — jon pravodziŭ sa mnoj bolš času, čym luby inšy, i litaralna vyciahvaŭ mianie ź isteryk paśla ŭsich hetych abśledavańniaŭ. A kansultavaŭsia ja vyklučna ŭ svaich znajomych, bo ŭ aficyjnych dziaržustanovach takuju infarmacyju atrymać amal niemahčyma.
«NN»: Ci byli niejkija prykoły ŭ zahsie, kali ty pryjšoŭ pa novy pašpart?
JAS: Tam i ŭ pašpartnym stale sa mnoj razmaŭlali na dziva pazityŭna. Asabliva paviesialili zvaroty typu «žančy… to bok, Jaŭhien Dźmitryjevič». Razumieješ, što hetyja ludzi nie chočuć ciabie abrazić — prosta ŭ ich sapraŭdy niama instrukcyj, jak heta ŭsio robicca.
«NN»: Ty kazaŭ, što tabie ciapier značna praściej, kali hrafa ŭ pašparcie supadaje z tvaim unutranym adčuvańniem siabie, u čym heta kaknretna prajaŭlajecca?
JAS: Amal va ŭsim. Pa-pieršaje, jurydyčnaja biaśpieka: možna padpisvać dakumienty svaim sapraŭdnym imiem, možna ŭvachodzić u patrebnuju prybiralniu i razumieć, što ciabie nie vykinuć achoŭniki. Na hetym fonie i psichałahična stanovicca lahčej: niama adčuvańnia, što ludzi nie bačać ciabie, nie ŭsprymajuć usurjoz, što ty pavinien hrać niejkuju rolu, ź jakoj tabie zabaroniena vychodzić.
U mianie ŭsio jašče kliničnaja depresija, na žal. Ja ŭžo niekalki hadoŭ prymaju antydepresanty, paru miesiacaŭ tamu pačaŭ chadzić da psichaterapieŭtki. Terapija — kłasnaja štuka. Pačynaješ bolš razumieć toje, adkul biarucca tvaje emocyi i kudy ich potym padzieć. Mnie ŭsio jašče ciažka davać rady hetamu, ale ja baču, što jość zruchi. Jak minimum majo žyćcio ŭžo stała lepšym — a pašpartu tolki dva dni. Tak što ŭ mianie jość usie šansy adnojčy pazbavicca razładu całkam.
«NN»: Ci viedaje pra novy pašpart tvaja babula, ź jakoj vy žyviacie i mocna kanfliktavali paśla tvajho kaminh-aŭtu? Vy nie pamirylisia?
JAS: Babula ŭ kursie… Viedajecie, tut nie ŭ «mirycca» sprava — my ŭžo čužyja ludzi. Ja nikoli nie adčuju ŭ adnosinach da jaje niešta siamiejnaje. Jana niekalki hadoŭ ckavała mianie i maju maci, jana stajała i hladzieła na toje, jak moj dziadźka mianie źbivaje, jana praklinała nas z maci i kazała, što ŭ jaje niama bolš dački i ŭnučki… Siońnia jana ŭžo amal nie prajaŭlaje ahresiju, my pieryjadyčna kantaktujem pa pobytavych pytańniach. Ale ni pra jakuju blizkaść razmova, viadoma ž, nie idzie.
«NN»: A na pracy ŭspryniali navinu narmalna? Bo na žurfaku BDU, jak ty sam raskazvaŭ, padčas navučańnia chapała prablem z vykładčykami…
JAS: Nasamreč, ja čakaŭ čahości bolš žorstkaha. Ale nie budziem zahadvać — mnie jašče damovu nie pieraaformili. Voś padpišu kantrakt — tady budu ŭpeŭnieny.
Na hety momant mahu skazać, što, napeŭna, bolšaja častka majho vydaviectva albo viedała, albo zdahadvałasia pra toje, što ja nie zusim dziaŭčyna. Pra novy pašpart na pracy viedajuć usiaho dva dni, i pakul jašče ničoha nie zdaryłasia — usie kazali, što zrazumieli mianie.
Ja čakaŭ skandałaŭ, tamu što, naprykład, maja načalnica amal paŭhoda pryncypova dapisvała litaru «a» ŭ moj podpis «Sieńkov», a adnojčy zładziła z hetaha sapraŭdny skandał. Nu, ciapier užo nie dapiša.
«NN»: Na jakim etapie pytańnie z apieracyjaj pa vydaleńni toj ža matki i harmanalnaj terapijaj? Heta ŭsio patrabuje hrošaj (navat na momant reabilitacyi), adkul ty ich budzieš brać?
JAS: Pakul ja nie zrabiŭ nivodnaj apieracyi, tamu što na ich i na harmonaterapiju ŭ nas taksama patrebny dazvoł ad kamisii — užo nastupnaj (tak, jana ŭ nas nie adna). Što tyčycca harmonaterapii, ja sam ciapier nie ŭpeŭnieny, što jana mnie nieabchodnaja. Heta składanaje pytańnie: u adzin pieryjad ja adčuvaju siabie sa svaim ciełam bolš-mienš narmalna, a ŭ druhi bačyć siabie ŭ lusterku nie mahu.
Apieracyi pa rašeńni kamisii ŭ Biełarusi robiacca biaspłatna, ale i na harmony, i na reabilitacyju patrebnyja hrošy. Ale, viedajecie, apieracyi mnie dazvolać tak niachutka (mabyć, jašče praz paru hod), što ja nie mahu kazać, jaki ŭ mianie tady naohuł budzie zarobak. U hety momant ja pracuju pa raźmierkavańni, atrymlivaju vielmi-vielmi mała. Spadziajusia, što heta praca nie nazaŭždy. Chočacca vieryć.
«NN»: Ci sustrakaješsia ty i siońnia z chłopcam, kali nie sakret? Nakolki vam składana być adkrytymi ŭ pačućciach, asabliva paśla zajaŭ Šunieviča pra «dziravych»?
JAS: Tak, ja sustrakajusia z chłopcam. Heta, darečy, adzin z punktaŭ, jaki ludzi časta nie razumiejuć. Tranśludzi nie pavinny być tolki hieteraseksualnymi, ich identyčnaść nie zaležyć ad aryjentacyi, i dla mnohich heta akazvajecca navinaj. Dyk voś, ja sustrakajusia z chłopcam, i ŭ jaho było praz heta šmat niepryjemnych razmoŭ z baćkami. Jaho babula cikaviłasia, kali ja «nahulajusia» i budu «znoŭ Dašaj». Nie viedaju, kolki pavinna prajści hadoŭ, kab ludzi zrazumieli, što heta nie prykoł.
A Šunievič — heta naohuł niejki sumny miem. Nie viedaju, adkul takija biarucca. Napeŭna, nie ŭsio ŭ žyćci čałavieka dobra, kali jon metanakiravana razburaje žyćcio inšych. Ź nieciarpimaści dziaržavy pačynalisia samyja strašnyja i samyja kryvavyja padziei va ŭsim śviecie.
Ja i moj partnior adkrytyja, i toje, što my kachajem adzin adnaho, — najlepšy adkaz Šunieviču i ŭsim astatnim.
Jaŭhien aktyŭna zajmajecca muzykaj, jakuju stvaraje sam, jak i teksty. U dadzieny momant jon pracuje nad niekalkimi trekami, zapisvaje vakał dla mietał-prajekta siabra. 21 lutaha jaho možna budzie pabačyć na konkursie vakalistaŭ Rock Song 2019 u kłubie PRISMA. Sačyć za ŭsimi navinami možna ŭ jaho supołcy.
