U babrujskim šmatpaviarchoviku ledź nie abvaliŭsia lift. Unutry była dziaŭčyna
Žychary doma № 27 pa vulicy Zavodskaj u Babrujsku ŭ niadzielu bačyli kala padjezda № 4 chutkuju dapamohu i MNS. Akazałasia, što adbyłasia avaryja lifta ŭ padjeździe.
Dziaŭčyna, jakaja ŭ momant avaryi znachodziłasia ŭ kabinie, nie atrymała surjoznych paškodžańniaŭ i na paniadziełak 11 lutaha ŭžo vypisana z balnicy. Akramia taho, abvalvańnia kabiny nie adbyłosia, jaje zafiksavali fiksatary.
Pavodle abjavy na došcy la padjezda № 4, lift zapracuje jašče nie chutka. Miarkujecca, što pałamaŭsia hałoŭny pryvad lifta.
Jak paviedamili va USK pa Mahiloŭskaj vobłaści, ciapier na miescy pravodzicca pravierka dla taho, kab vyśvietlić pryčynu avaryi.
Načalnik Mahiloŭskaha abłasnoha ŭpraŭleńnia Dziaržpramnahladu MNS Pavieł Siarbantaŭ raspavioŭ, što rasśledavańnie taksama budzie pravodzić ułaśnik lifta, heta značyć tavarystva ŭłaśnikaŭ «Zavadčanie», adnak Dziaržpramnahlad voźmie ŭ im udzieł. Jon taksama paćvierdziŭ, što dziaŭčyna, jakaja znachodziłasia ŭ momant avaryi ŭ kabinie lifta, užo nie znachodzicca ŭ špitali.