Jakim sportam u jakim uzroście lepš za ŭsio zajmacca?
Usim viadoma, što sport upłyvaje na zdaroŭje. Adnak pry hetym upłyŭ moža być vielmi roznym, piša Bi-Bi-Si.
Fizičnaja aktyŭnaść źnižaje ryzyku sardečnych zachvorvańniaŭ, abaraniaje ad niekatorych vidaŭ raku i praduchilaje raźvićcio dyjabietu druhoha typu.
Da taho ž, zaniatki sportam padtrymlivajuć naša psichičnaje zdaroŭje: arhanizm vypracoŭvaje bolš endarfinaŭ, što stanoŭča ŭpłyvaje na naš nastroj i samaacenku.
Ale taksama vidavočna, što sport dla 20-hadovaha — heta zusim nie toje ž, što sport dla 40-hadovaha. Kali nie ŭličvać uzrostavy faktar pry vybary fizičnaj aktyŭnaści, možna ŭ šerahu vypadkaŭ nanieści surjoznuju škodu zdaroŭju.
Prafiesarka fizijaterapii Džuli Brodzieryk z Trynici-kaledža ŭ Dublinie raspaviadaje pra ahulnyja rekamiendacyi navukoŭcaŭ dla pradstaŭnikoŭ roznych uzrostavych hrup.
U dziacinstvie
Fizičnyja praktykavańni dapamahajuć dzieciam raźvivacca, umacoŭvajuć ich ciahlicy, raźvivajuć upeŭnienaść u sabie i svaich siłach, a taksama spryjajuć padtrymańniu zdarovaha režymu snu.
U dziacinstvie važna sprabavać zajmacca roznymi vidami sportu, kab raźvić roznyja zdolnaści. Padydzie ŭsio — ad płavańnia da hulniaŭ ź miačom i baraćby. Taksama važna, kab u dziciaci byŭ čas na «svabodnuju» fizičnuju aktyŭnaść — na hulniu ŭ parku ci na dziciačaj placoŭcy.
Padletkavy ŭzrost
Pa miery staleńnia cikaŭnaść da sportu, jak praviła, zhasaje, asabliva heta charakterna dla dziaŭčynak, kaža Brodzieryk.
Adnak sport u hetym uzroście dapamoža nie tolki zastavacca ŭ dobraj fizičnaj formie, ale i źnizić uzrovień stresu, a taksama pazbavicca ad strachaŭ, charakternych dla padletkaŭ.
U hetym uzroście pieravahu lepš addavać kamandnym vidam sportu. Heta dapamoža zachoŭvać matyvacyju pry zaniatkach sportam, pašyryć kruh znosin padletka i navučyć jaho dyscyplinie.
Kali vybirać ź niekamandnych vidaŭ sportu, to heta moža być płavańnie, himnastyka i lohkaja atletyka.
U 20 hadoŭ
U hetaje dziesiacihodździe našaha žyćcia my možam pakazać svaje najlepšyja vyniki ŭ sporcie, kažuć śpiecyjalisty.
Chutkaść reakcyi ŭ hetym uzroście znachodzicca na piku, čas na adnaŭleńnie sił patrabujecca minimalny, kisłarod traplaje ŭ kroŭ značna chutčej, čym kali vy bolš małady ci bolš darosły.
Kali vam 20 hadoŭ ci kala taho, pasprabujcie dasiahnuć svaich maksimalnych vynikaŭ. Pasprabujcie samyja roznyja vidy sportu: rehbi, hreblu, ciažkuju i lohkuju atletyku.
Pasprabujcie, kab vašy treniroŭki byli raznastajnymi: čarhujcie aerobnyja nahruzki z anaerobnymi i siłavymi praktykavańniami.
U 30 hadoŭ
U hetym uzroście važna zachavać ciahlicy mocnymi, a sardečna-sasudzistuju sistemu — zdarovaj.
Treba dziejničać z rozumam. Nie kidać treniroŭki praź niedachop času, a pravodzić karotkija, ale vielmi intensiŭnyja intervalnyja treniroŭki. Heta rovar, bieh, łyžnyja honki i płavańnie.
Žančynam u hetym uzroście, asabliva paśla naradžeńnia dziciaci, rekamiendujecca rabić praktykavańni Kiehla, skiravanyja na ŭmacavańnie i raźvićcio ciahlic tazavaha dna.
Taksama vielmi važna rabić treniroŭki raznastajnymi, kab jany prynosili radaść. Kali hetaha nie rabić, tady cikavaść da sportu chutka zhaśnie.
U 40 hadoŭ
U hetym uzroście my zvyčajna pačynajem nabirać vahu, tamu siłavyja treniroŭki — mienavita toje, što treba.
Siłavyja treniroŭki dapamohuć nie tolki nie nabrać vahu, ale i zapavolić stratu myšačnaj masy. Straty myšačnaj masy ŭ siarednim składajuć ad 3 da 8% za 10 hadoŭ.
Kali vy nikoli raniej nie rabili siłavych praktykavańniaŭ, lepš pačać z hantelaŭ, a ŭžo paźniej pierajści na siłavyja trenažory.
Kali vy jašče nie pačali biehać, to ciapier samy čas. Bieh dapamoža zachavać zdaroŭje sardečna-sasudzistaj sistemy, kaža Brodzieryk. A kali da hetaha dadać piłates, to možna jašče i vydatna ŭmacavać ciahlicy śpiny.
U 50 hadoŭ
Našy fizičnyja zdolnaści asabliva prykmietna źmianšajucca ŭ hetym uzroście. My ŭsio čaściej sutykajemsia z bolem, dyskamfortam, dajuć pra siabie viedać roznyja chraničnyja zachvorvańni. U tym liku ŭ hetym uzroście časta vyjaŭlajuć dyjabiet druhoha typu.
Žančyny stanoviacca asabliva schilnyja da sardečna-sasudzistych zachvorvańniaŭ praź źmieny ŭ harmanalnym fonie — hałoŭnym čynam praź źnižeńnie ŭzroŭniu estrahienu.
Rašeńnie — jak minimum dźvie treniroŭki na tydzień pavinny być siłavymi, kab vy mahli zachavać myšačnuju masu. Taksama jak minimum dźvie treniroŭki na tydzień varta pryśviačać kardyjopraktykavańniam — heta moža być chutkaja chada ci lohki bieh. Taksama hetyja treniroŭki možna spałučać z zusim inšaj nahruzkaj — nakštałt johi ci himnastyki taj-čy, jakija dapamohuć raźvić pačućcio bałansu i raŭnavahi.
U 60 hadoŭ
Paśla 60 hadoŭ ryzyka ŭźniknieńnia ci abvastreńnia chraničnych zachvorvańniaŭ jašče bolš uzrastaje. Jak adznačajuć śpiecyjalisty, fizičnaja aktyŭnaść dapamoža jaje źnizić.
Samaja karysnaja fizičnaja aktyŭnaść u hetym uzroście, z punktu hledžańnia śpiecyjalistaŭ, — heta balnyja tancy. Taksama jany rajać dźvie treniroŭki na tydzień pryśviačać nieskładanym praktykavańniam na raźvićcio siły i hnutkaści.
Idealny vybar — akvaaerobika, pakolki padčas zaniatkaŭ u vadzie možna dobra ŭmacavać ciahlicy, pry hetym nahruzka na sustavy budzie minimalnaj.
I nie zabyvajcie pra kardyjonahruzki. Padydzie špacyr chutkim krokam.
U 70 hod i starejšym uzroście
Važna nie spyniać aktyŭnaść i nie dapuskać traŭmaŭ. Da taho ž, fizičnyja nahruzki dapamahajuć padtrymlivać kahnityŭnyja zdolnaści na raniejšym uzroŭni.
Pasprabujcie na praciahu tydnia špacyravać i rabić nieskładanyja siłavyja praktykavańni. Ale pierad hetym abaviazkova prakansultujciesia sa svaim lekaram.
Samaje hałoŭnaje — padtrymlivać fizičnuju aktyŭnaść ŭsio žyćcio.
