Śledčy kamitet zavioŭ kryminalnuju spravu pa fakcie razbureńnia łavy Klintana
Pra zaviadzieńnie kryminalnaj spravy Svabodzie paviedamiła aficyjny pradstaŭnik Śledčaha kamitetu pa Mienskaj vobłaści Taciana Biełanoh, piša «Radyjo Svaboda».
«Pa pieršym fakcie paškodžańnia «łavy Klintana» Mienskim rajonnym adździełam Śledčaha kamitetu zaviedziena kryminalnaja sprava pa 1 častcy 344 artykuła Kryminalnaha kodeksu.
Što da apošniaha faktu — viadziecca pravierka, pa vynikach budzie pryniata pracesualnaje rašeńnie».
Pieršaja častka 344 artykuła praduhledžvaje pakarańnie ad hramadzkich pracaŭ da troch hadoŭ źniavoleńnia za naŭmysnaje źniščeńnie ci paškodžańnie historyka-kulturnych kaštoŭnaściaŭ abo materyjalnych abjektaŭ, jakim moža być prysvojeny status historyka-kulturnaj kaštoŭnaści.
Druhoje za sioleta razbureńnie «łavy Klintana» śledčyja pakul praviarajuć.
«Zaŭtra, u subotu, my zabiarom z Kurapataŭ kavałki łavy Klintana, jakuju razburyli nieviadomyja vandały, i schavajem ich da lepšych časoŭ. Jość prapanova, kab jany stali asobnym ekspanatam u budučym muzei Kurapataŭ», — paviedamiŭ Svabodzie kiraŭnik hramadzkaj dyrekcyi narodnaha memaryjału Kurapaty, aktyvist KCHP-BNF Aleś Čacholski.
Pavodle Alesia Čacholskaha, śledčyja, jakija zajmajucca pravierkaj faktu vandalizmu ŭ Kurapatach, nia suprać taho, kab aktyvisty zabrali z Kurapataŭ kavałki łavy Klintana.
«Siońnia ja byŭ na dopycie ŭ Śledčym kamitecie, davaŭ pakazańni jak śviedka pa kryminalnaj spravie ab apahańvańni memaryjalnaha znaku i adkazvaŭ na pytańni adnosna łavy Klintana. Pra jaje śledčyja skazali, što nieabchodnyja śledčyja dziejańni z kavałkami ŭžo zroblenyja, ich možna zabrać.
Miarkujem, lepš kavałki zabrać i zachavać. Vyrašyli pasprabavać łavu adnavić. Pakul u Kurapatach ich pakidać nielha — raściahnuć ci źniščać kančatkova».
