Top-10 biełaruskamoŭnych vydańniaŭ, jakija varta nabyć na Minskim knižnym kirmašy
U budynku «Biełekspa» praciahvaje pracu Minski knižny kirmaš. Bolš za paŭsotniu vydaviectvaŭ pradstaŭlajuć tut svaju pradukcyju. Najlepš pradstaŭlenyja, naturalna, biełaruskija stendy i rasijskija.
«Naša Niva» prapanuje rejtynh samych cikavych vydańniaŭ, što možna znajści na razvałach «Biełekspa».
Alena Brava, «Sadomskaja jabłynia»
Cana: 15 rubloŭ
«Heta vielmi žorstkaja proza, ale intelektualnaje čytvo. Tut niama padmieny paniaćciaŭ, kali bulvarnyja ramany padajucca jak intelektualistyka. Alena Brava pracavała nad ramanam niekalki hadoŭ. Za paru dzion da vystavy ministr infarmacyi Aleś Karlukievič nazvaŭ Alenu Bravu siarod svaich lubimych aŭtaraŭ. Proza ciažkaja i dramatyčnaja. Čytać jaje vialikimi ŭryŭkami vielmi składana, praściej nievialikimi», — raskazvaje vydaviec Źmicier Višnioŭ.
Milenka Jerhavič, «Arechavy pałac»
Cana: 25 rubloŭ
Čarhovy pierakład viadomaha charvackaha piśmieńnika ŭ vykanańni Siarhieja Šupy. Pieršaj vyjšła kniha «Inšała, Madona, inšała». Sam Šupa pryjedzie 10 lutaha na vystavu, kab prezientavać knihu.
Kadzua Isihura, «Nie adpuskaj mianie»
Cana: 20 rubloŭ
Raman apošniaha na siońniašni momant nobieleŭskaha łaŭreata. Kali raptam Nobiela bolej nie buduć uručać, to kaniec premii budzie pastaŭleny mienavita na hetym aŭtary. Aryhinalny raman vyjšaŭ u 2005. Heta pieršaja kniha anhlijskaj litaratury XXI stahodździa, jakaja vyjšła pa-biełarusku. Pierakładčyca — Hanna Jankuta.
Alaksandr Brakiel, «Pad čyrvonaj zorkaj i svastykaj: Baranaviččyna ŭ 1939—1944 hh. Zachodniaja Biełaruś pad niamieckaj i savieckaj akupacyjaj»
Cana: 14,9 rubloŭ
«Manahrafija niamieckaha historyka Alaksandra Brakiela pryśviečanaja Baranavickamu rehijonu pad niamieckaj i savieckaj akupacyjaj. Užo sama nazva pakazvaje, što aŭtar inačaj usprymaje, čym našy aficyjnyja historyki, anieksiju Zachodniaj Biełarusi ŭ 1939 hodzie, — a mienavita jak akupacyjny režym. Kniha pryśviečanaja nie vuzkamu Baranavickamu rajonu, a administracyjnaj adzincy, jakaja ŭ mižvajennaj Polščy nazyvałasia Navahradskim vajavodstvam, a z 1939 pa 1941 i z 1945 pa 1954 nazyvałasia Baranavickaj vobłaściu. Heta vielmi vialiki rehijon, jaki ŭklučaŭ samyja roznyja ziemli: ad Stoŭbcaŭ i Vałožyna da Ščučyna i Voranava. Saviety, kali akupavali hety rehijon, to karystalisia polskim administracyjnym padziełam. Aŭtar piša, što niahledziačy na istotnyja adroźnieńni ŭ ideałohii, praktyki ŭstalavańnia ŭłady ŭ Savietaŭ i niemcaŭ byli padobnymi — heta teror, departacyja, pravavoje biaźmiežža», — raskazvaje redaktar časopisa ARCHE Valeryj Bułhakaŭ.
Alhierd Bacharevič, «Maje dzievianostyja»
Cana: 19 rubloŭ
«Hetuju knihu Alhierd Bacharevič napisaŭ za adzin hod. Kniha ŭspaminaŭ pra jaho maładość. Vialikaja ŭvaha ŭ knizie nadadziena nie samoj asobie aŭtara, a jahonamu rodnamu Minsku. Bacharevič adzin z samych čytanych biełaruskich aŭtaraŭ», — raskazvaje supracoŭnik vydaviectva «Januškievič» Siarhiej Makarevič.
Jaŭhienija Janiščyc, «Kachańnia sad i łastaŭka viasny»
Cana: 20 rubloŭ
«U sieryi «100 vieršaŭ» vyjšła cudoŭnaja kniha Jaŭhienii Janiščyc, jakuju ŭkłaŭ Viktar Šnip. Kniha azdoblenaja vydatnymi karcinami mastaka Mikoły Kazakieviča. Kniha pryciahvaje da siabie piaščotaj. Navat vokładka takaja ramantyčnaja. Vieršy Jaŭhienii Janiščyc dobra viadomyja», — raić knihu supracoŭnica «Mastackaj litaratury» Aksana Sprynčan.
Halina Mycyk, «Po-biełorusski? Požałujsta! Pa-biełarusku? Kali łaska!»
Cana: 23 rubli
Daŭno marycie pačać razmaŭlać pa-biełarusku albo vaš siabra choča, ale nie viedajecie, z čaho pačać? Tady hetaja kniha dla vas. Praktyčnyja zaniatki, ruska-biełaruski słoŭnik, vialiki śpis prykazak i prymavak.
Valeryj Hapiejeŭ, «Pazł»
Cana: 15 rubloŭ
«Valeryj Hapiejeŭ — viadomy aŭtar, jaki piša dla padletkaŭ. Apošnija hady jon, kali tak možna skazać, pierajšoŭ u darosłuju prozu. Papiarednija jahonyja ramany «Noč cmoka» i «Praklon» razyšlisia całkam. «Noč cmoka» pierakłali na ŭkrainskuju movu. Treci raman taksama nie rasčaruje čytačoŭ. Jon abjadnoŭvaje mistyku, detektyŭ, pryhody», — pradstaŭlaje knihu Źmicier Višnioŭ.
Siarhiej Piasecki, «Minskaja tryłohija»
Cana: kožnaja kniha pa 9,36
Jakim byŭ Minsk sto hadoŭ tamu? Knihi poŭnyja pryhody, dzie sapraŭdnyja fakty źmiešvajucca z aŭtarskaj vydumkaj. «Pieršaja suśvietnaja vajna pieraŭtvaryła Miensk u pryfrantavy horad, kudy z usich kancoŭ Jeŭropy i byłoj Rasijskaj impieryi z nadziejaj chutkaha zarobku ściahnulisia zładziei, prastytutki i machlary», — havorycca ŭ apisańni pieršaj knihi «Jabłyčak».
Śviatłana Aleksijevič, «U vajny nie žanočy tvar»
Cana: 19 rubloŭ
Paśla istotnaha pierapynku knihu nobieleŭskaj łaŭreatki vyjšła ŭ dziaržaŭnym vydaviectvie. Na biełaruskuju movu tvor pierakłaŭ Valancin Akudovič.
«Naša historyja», № 2—5, 2018, № 1 — 2019
Cana 5,50 rubloŭ
Nu a absalutny chit prodažaŭ hetaha hoda — cudoŭny časopis «Naša historyja». Na vystavie možna nabyć piać apošnich numaroŭ hetaha vydańnia.
