Rasija prychoŭvała infarmacyju pra svaje straty ŭ Siryi
Reuters praviało rasśledavańnie pra sproby Kramla zamieści svaje straty padčas boju ź siryjskimi kurdami, jakich padtrymlivaje ZŠA, u rajonie Dejr ez-Zor u noč z 7 na 8 lutaha 2018 hoda.
Tady ŭ vyniku dziejańniaŭ amierykanskaj artyleryi i avijacyi likvidavali kala 100 rasijskich vajskoŭcaŭ ź nieaficyjnaj PVK Vahniera.
U svaju čarhu ŭ Ministerstvie zamiežnych spraŭ Rasii śćviardžali, što padčas boju zahinuli tolki niekalki hramadzian Rasii.
Jak adznačajecca, pierad pieraabrańniem Uładzimira Pucina Maskva sprabavała ŭchilicca ad ahałoski strat pad Dejr ez-Zoram, z-za čaho svajaki zahinułych zmahli daviedacca pra ich śmierć amal praz dva miesiacy paśla hetych padziej.
«Było składana vieźci adrazu stolki cieł, tamu što ŭžo ich u Rastovie sustrakali žurnalisty, sustrakali barty, nam skazali», — raspavioŭ adzin z udzielnikaŭ boju.
Žurnalisty ahienctva znajšli, jak minimum, šeść siemjaŭ, jakim cieły rodnych viarnuli tolki praź siem tydniaŭ paśla sutyknieńnia rasijan z amierykancami i kurdami.
Va ŭsich vypadkach u paśviedčańni ab śmierci byli paznačany nie tolki iłžyvyja danyja pra čas hibieli, ale taksama i pra miesca, dzie heta adbyłosia.
Pry hetym blizkija inšych zahinułych adznačajuć, što viarboŭščyki, jakija paviedamlali pra hibiel rodnych, patrabavali nie vydavać abstaviny, pry jakich heta adbyłosia.