Rasijskaje PR-ahienctva prapanavała «Našaj Nivie» apublikavać zamoŭny artykuł, jaki ačarniaje «Štadler»
Z rekłamnym adździełam «Našaj Nivy» źviazaŭsia niechta Maksim Citoŭ, supracoŭnik rasijskaj pijar-kampanii «Michajłaŭ i partniory». Jon prapanavaŭ za hrošy raźmiaścić infarmacyju pra biełaruskaje adździaleńnie kampanii «Štadler», jakoje źbiraje ciahniki i tramvai pad Fanipalem.
«Mianie cikavić, ci voźmiecie vy takuju temu? Nie abaviazkova ŭ krytyčnym klučy, moža prosta jak aśviatleńnie fakta ab rašeńni suda», — havaryłasia ŭ liście, dasłanym Maksimam.
Frahmient raboty ŭ cechach «Štadlera».
Jon śćviardžaje, što «Štadler» nie vykonvaje svaje abaviazki ŭ dačynieńni da minskaha mietro, tamu ekanamičny sud Minska abaviazaŭ «Štadler» spłacić mietrapalitenu 561 tysiaču rubloŭ štrafu (praŭda, Maksim Citoŭ pryvodziŭ sumu ŭ rasijskich rublach).
Svoj list rabotnik rasijskaj PR-kampanii skančaŭ takimi słovami:
«Nu heta ŭsio — infarmacyjnaja nahoda. Dalej možna pryšpilić da hetaha inšyja fakty, naprykład, što ŭ ŚMI Biełoruśsii byŭ niekatory niehatyŭ u dačynieńni «Štadler Minsk». Možacie napisać pra skaračeńnie štatu, chamskaje staŭleńnie da rabočych i hetak dalej», — pisaŭ jon.
Viadoma, nijakija zamoŭnyja materyjały «Naša Niva» publikavać nie stała, a źviarnułasia pa kamientar da kiraŭnictva «Štadlera».
Nakolki praŭdzivy źmiest lista i kamu moža być vyhadna ačarnić ich u biełaruskich ŚMI?
Pa śćvierdžańni «Štadlera», adkaz uzhodnieny i ź Minskim mietrapalitenam.
«Adnosiny miž Minskim mietrapalitenam i «Štadler Minsk» nosiać dziełavy charaktar. Sudovy praces byŭ farmalnaj nieabchodnaściu, abumoŭlenaj praceduraj dziaržaŭnych zakupak zhodna z zakanadaŭstvam Biełarusi. Niemahčymaść źmieny ŭmovaŭ zaklučanaj pa vynikach elektronnaha aŭkcyjona damovy patrabavała ad bakoŭ zvarotu ŭ sud dla ŭrehulavańnia ŭsich nieabchodnych farmalnaściaŭ», — patłumačyŭ dyrektar «Štadler Minsk» Filip Brunier.
Dyrektar «Štadler Minsk» Filip Brunier.
Ale Brunier admoviŭsia ad razvah na temu, kamu heta moža być vyhadna.
«My ŭžo bolš za 75 hod zajmajemsia vyrabam sastavaŭ, a nie palityčnymi hulniami», — padsumavaŭ jon.
Pavodle kiraŭnika kampanii, infarmacyja pra skaračeńnie štatu taksama niepraŭdzivaja.
«U 2018 hodzie Stadler Group dadatkova inviestavała 12 miljonaŭ jeŭra ŭ «Štadler Minsk», hetyja hrošy pajšli na pašyreńnie vytvorčaści kuzavaŭ, u 2019-m budzie zapuščany i dadatkovy afarboŭčy cech», — skazaŭ jon.
