TOP palityčnych telehram-kanałaŭ, jakija pišuć pra Biełaruś
Telehram-kanały stali davoli papularnaj źjavaj litaralna ŭ apošnija miesiacy i zaniali asobnuju nišu siarod sposabaŭ dastaŭki infarmacyi.
Miesiendžar Paŭła Durava vyhladaje efiektyŭnym i prostym, pazbaŭlenym stužki: karystalnik harantavana bačyć apublikavanaje paviedamleńnie. Kali padpisaŭsia na kanał, jano nie hublajecca, a visić napaminam.
Taksama telehram pazbaŭleny typovych chibaŭ umoŭnaha tvitara ci fejsbuka — u im niama «botaŭ», jakija vykarystoŭvajucca dla stvareńnia iluzii peŭnaj hramadskaj dumki: u telehramie zvarotnaj suviazi ŭ pryncypie niama, tolki infarmacyja. Tamu možna ličyć, što kolkaść padpisantaŭ blizkaja da realnaj.
Pavyšanaja sistema biaśpieki harantuje aŭtaram kanałaŭ peŭnuju stupień ananimnaści, ich krynicam — taksama.
Padpisvajciesia na telehram-kanał «Našaj Nivy» — apieratyŭna pra samaje važnaje my pišam tut.
Ale heta ž aznačaje, što całkam razmyvajucca standarty padačy infarmacyi: ananimnaść nie vymahaje pilnaj pravierki faktaŭ i adkaznaści za apublikavanaje.
Vidać, takaja raźniavolenaja padača infarmacyi ŭpieramiešku z kanśpirałahičnymi dadumkami i spryjaje šalonamu rostu kalapalityčnych kanałaŭ.
U susiedniaj Rasii, naprykład, takija kanały majuć aŭdytoryi ŭ sotni tysiač čałaviek, va Ukrainie ludzi bolš čytajuć kanały, jakija raskazvajuć pra tannyja padarožžy.
U Biełarusi situacyja pramiežkavaja: u trojcy samych papularnych kanałaŭ u nas adzin palityčny, adzin pra ježu, treci — pra vandroŭki.
«Naša Niva» prapanuje padborku tych kanałaŭ, jakija sprabujuć aśviatlać palityčnyja temy praz telehram. Acenku jakaści i hłybini kantentu prapanujem zrabić čytačam.
Błoh Arcioma Šrajbmana
4 tysiačy padpisčykaŭ. Kanał palityčnaha ahladalnika Tut.by Arcioma Šrajbmana, dzie jon vykładaje svaje dumki.
Adličana
5 tysiač padpisčykaŭ. Kanał pra prablemy, žarty i realii žyćcia biełaruskich studentaŭ. Viadzie student treciaha kursa BDUIRa.
1863x
10 tysiač padpisčykaŭ. Kanał błohiera Eduarda Palčysa.
Kulhavy Čort
750 padpisčykaŭ. Kanał pazicyjanuje siabie jak insajdarski. U apisańni na ahrehatary «Biełaruski telehram» aŭtary nazyvajucca supracoŭnikami šerahu dziaržaŭnych instytutaŭ. Što dakładna za viedamstvy — nieviadoma. Ale infarmacyja achoplivaje roznyja śfiery: ad siłavoj da kulturnickaj.
Paca-Vaca
700 padpisčykaŭ. Ahrehatar kantentu biełaruskich kanałaŭ. Pieršym apublikavaŭ infarmacyju pra toje, što spartsmenkam Nadziei Skardzina i Alaksandry Hierasimieni admovili ŭ rehistracyi radyjostancyj.
Nie BT
2 tysiačy padpisčykaŭ. Pa samaj papularnaj viersii, kanał viadziecca žurnalistam Kanstancinam Prydybajłam, eks-supracoŭnikam «ŁajfŃjuz» i Biełteleradyjokampanii. Ciapier jon pracuje na adnym z rasijskich radyjo. Naturalna, insajdaŭ z terytoryi Biełarusi ciapier niama.
***
Razam z hetym adznačym cikavuju tendencyju — u hetuju dosyć kvołuju, ale pierśpiektyŭnuju infarmacyjnuju nišu Biełarusi sprabujuć prabicca rasijanie.
Kali raniej uschodnija siły ŭkidvali svaju dezynfarmacyju pra Biełaruś praz telehram-kanały, aryjentavanyja pieradusim na ich unutranuju aŭdytoryju — kštałtu «Niazyhara», — to siońnia situacyja źmianiłasia. Rasijskija palityčnyja koły pracujuć na biełaruskim rynku z praduktam, jaki abo naŭprost aryjentavany na Biełaruś, abo jaki mimikryruje pad biełaruski, ale nasamreč pišacca pa rasijskich mietadyčkach.
Prapanujem padborku takich kanałaŭ, a taskama ścisły źmiest taho, pra što jany pišuć. Ich isnavańnie cikava chacia b tamu, što dazvalaje zrazumieć, materyjały ŭ jakim klučy pra Biełaruś zamaŭlajuć ruskija palittechnołahi.
Prykładna ŭ adzin čas źjaviłasia adrazu niekalki takich kanałaŭ. Jany ŭzajemna pijarać adzin-adnaho, u pijary im dapamahajuć i bujnyja rasijskija palityčnyja kanały, u čyjoj aŭdytoryi, možna dumać, jość biełarusy.
Bulba Stalcoŭ
3500 padpisčykaŭ. Kanał «pra Biełaruś i nie tolki», jak havorycca ŭ apisańni. Faktyčna biełaruski filijał «Niazyhara», svaje fantazii tudy piša rasijski nacyjanalist Jahor Chałmahoraŭ, aŭtar termina «Ruskaja viasna».
Chałmahoraŭ, fota politikus.ru
Biełaruski insajdar
500 padpisantaŭ. Nazva kanała nie adpaviadaje źmiestu i vyhladaje aŭtarskimi fantazijami. Najchutčej, jaho viadzie taja samaja kampanija žurnalistaŭ «Rehnuma» i «Carhrada».
Biełaruski hambit
1300 padpisantaŭ. Kanał prykładna toj ža skiravanaści, kantent vydaje rasijski intares i aŭtaraŭ.
Trykataž
Marhinalny kanał, jaki niadaŭna trapiŭ u raskrutku inšych kanałaŭ z rasijskaj sietki. Asobnyja pasty nabirajuć pa niekalki tysiač prahladaŭ.