U škołach uvodziać fakultatyŭ «Asnovy siamiejnaha žyćcia»
Zastavačnaje fota, kupalauski.by
Z novaha navučalnaha hoda vučni dziaviatych, dziaciatych i adzinaccatych kłasaŭ buduć vyvučać «Asnovy siamiejnaha žyćcia». Pastanova ministerstva adukacyi apublikavana na aficyjnym pravavym partale pravo.by.
«Adnym z hałoŭnych kampanientaŭ dziaržaŭnaj siamiejnaj palityki źjaŭlajecca ŭmacavańnie siamiejnych kaštoŭnaściaŭ šlacham farmiravańnia ŭ hramadstvie pazityŭnaha vobrazu siamji, realizacyi mierapryjemstvaŭ, nakiravanych na pavyšeńnie prestyžu siamji i zabieśpiačeńnie siamiejnaha dabrabytu. «Mocnaja siamja — mocnaja dziaržava» — adna z asnoŭnych idej, što kansalidujuć sučasnaje biełaruskaje hramadstva», — skazana ŭ pastanovie Ministerstva adukacyi ad 2 listapada 2018 hoda, jakaja ŭstupaje u siłu 22 studzienia 2019-ha.
«Asnovy siamiejnaha žyćcia» — heta fakultatyŭ, jaki budzie prachodzić adzin raz na tydzień. Prahrama fakultatyva dzielicca na try častki: dla dziaviataha, dziasiataha i adzinaccataha kłasa.
U pieršym raździele «Padrychtoŭka da šlubu i siamiejnaha žyćcia», pryznačanym dla 9-ha kłasa, vučni buduć razhladać hiendarnyja adroźnieńni junakoŭ i dziaŭčat, asablivaści dašlubnych adnosin, faktary i matyvy šlubnaha vybaru, asabistyja jakaści, nieabchodnyja dla siamiejnaha žyćcia.
Vučni 10-ch kłasaŭ buduć prachodzić raździeł «Siamja jak sacyjalny instytut». U im dajecca charaktarystyka asnoŭnych funkcyj siamji, raskryvajucca pravavyja asnovy šlubna-siamiejnych adnosin, asablivaści rolevaj struktury i dynamiki siamji, kultura siamiejnych znosin, haspadarča-ekanamičnaja śfiera siamiejnaha žyćcia, siamiejny biudžet i estetyka pobytu, analizujucca pryčyny i nastupstvy parušeńnia siamiejnych adnosin.
Vypuskniki škoł, himnazij i licejaŭ buduć vyvučać takija temy, jak asablivaści maładoj siamji, płanavańnie siamji, rola baćki i maci ŭ vychavańni dziaciej, styli siamiejnaha vychavańnia, siamiejnyja tradycyi i arhanizacyja siamiejnaha volnaha času, sacyjalnaja padtrymka siamji.
Jak skazana ŭ dakumiencie, meta fakultatyva — spryjać farmiravańniu kaštoŭnasnych adnosin vučniaŭ IX—XI kłasaŭ da instytuta šlubu i siamji.
U prahramie «Asnoŭ siamiejnaha žyćcia» padrabiazna prapisvajucca formy i mietady pracy sa staršakłaśnikami, a taksama prykładajecca prahrama.
Mietady i formy raboty, jakija, na dumku aŭtaraŭ prahramy, dazvolać maksimalna dałučyć vučniaŭ u praviadzieńnie fakultatyŭnych zaniatkaŭ, — heta videaŭroki, uroki-prajekty, uroki-ekskursii, uroki-spabornictvy, uroki-dyjałohi, aktyŭnyja formy navučańnia — kanfierencyi, kruhłyja stały, treninhi, aŭkcyjony, dyskusii, telepieradačy, vusnyja časopisy, «kłuby znaŭcaŭ» i inšyja.
Taksama školnikam buduć prapanoŭvacca hutarki, viktaryny, konkursy vieršaŭ, sačynieńniaŭ, ese, malunkaŭ i płakataŭ, inscenirovak, multymiedyjnych prezientacyj, kancerty, vystavy i fotahalerei, fłešmoby, sustrečy sa šmatdzietnymi maci, baćkami, prezientacyi tvorčych prajektaŭ.
U prahramie fakultatyva «Asnovy siamiejnaha žyćcia» jość i takija temy, jak psichafizijałahičnyja asablivaści junakoŭ i dziaŭčat, repraduktyŭnaje zdaroŭje moładzi, luboŭ jak najvyšejšaje čałaviečaje pačućcio, jak adroźnić kachańnie i zakachanaść, dašlubnyja adnosiny, vybar spadarožnika žyćcia, sakrety siamiejnaha ščaścia, pravy i abaviazki muža i žonki, šlubny dahavor, šlubnaja sumiaščalnaść, siamiejny biudžet, adaptacyja maładych muža i žonki da ŭmoŭ sumiesnaha žyćcia, rola prabaćkoŭ u siamiejnym vychavańni i inšyja.
