Zdareńnie na Vilejščynie: šukali źbitaha ciahnikom mužčynu, a znajšli tolki śled na śniezie
Historyja pačałasia nočču 12 studzienia ŭ Kurancy.
Kala hadziny nočy ŭ milicyju patelefanavaŭ mužčyna, žychar Maładziečna, i skazaŭ, što ŭ Kurancy jaho pabiŭ miascovy žychar, raspaviali «Rehijanalnaj haziecie» ŭ Vilejskim RAUS.
Milicyja vyjechała na miesca. Znajšli taho, chto biŭ, znajšli śviedak. Tolki voś zajaŭnik niedzie zhubiŭsia. I mabilny telefon jaho byŭ niedastupny.
Praź niekatory čas u milicyju patelefanavali supracoŭniki vilejskaha čyhunačnaha vakzała i paviedamili, što ciahnik «Minsk-Viciebsk», mahčyma, źbiŭ čałavieka. Mašynist zaŭvažyŭ jaho na ŭzbočynie.
Milicyjaniery pajšli da miesca, jakoje ŭkazaŭ mašynist, ale tam ubačyli tolki pamiaty śnieh i ślady. Kali pajšli pa śladach, pryjšli ŭ les, dzie znajšli mužčynu.
Im akazaŭsia toj samy žychar Maładziečna, jaki telefanavaŭ z Kuranca. Mužčyna byŭ u stanie ałkaholnaha apjanieńnia. Raskazaŭ, što jon chacieŭ dabracca damoŭ i zabłukaŭ.