Za «radyjo ad Hierasimieni i Skardzina» stajali rasijskija hrošy. I chacieli jany nie adnu, a adrazu try stancyi
U pačatku tydnia stała viadoma, što spačatku Ministerstva infarmacyi, a paśla i Administracyja prezidenta admovili bijatłanistcy Nadziei Skardzina i płyŭčycie Alaksandry Hierasimieni ŭ stvareńni radyjostancyi «Sport-FM».
Alaksandra Hierasimienia ŭ intervju «Trybunie» patłumačyła: «Napeŭna, kamuści nie zusim spadabałasia, što my chočam zrabić taki prajekt. Składana adkazać, čamu ŭsio ž pryjšła admova ad Administracyi. Ja nie baču nivodnaj pryčyny kazać «nie», voś što hałoŭnaje. Mabyć, ŭmiašalisia niejkija asabistyja matyvy, jakija nie dali mahčymaści našamu prajektu realizavacca».
Zboku vyhladała, što «złačynny režym» prosta tak admaŭlaje słavutym spartsmienkam u stvareńni biaskryŭdnaha kanału pra sport. Tym bolej što i sami atletki ŭ svajoj kancepcyi adznačali, što havorka viadziecca pra stvareńnie «mahutnaha infarmacyjnaha pravadnika dziaržavy ŭ halinie sportu i zdarovaha ładu žyćcia». Z usich bakoŭ rašeńnie ŭładaŭ vyhladała niepryvabna. Jak možna zaviarnuć tytułavanych spartsmienak, jakija stolki hadoŭ prynosili słavu krainie?
Na spravie ž historyja atrymała zusim inšy pavarot. Hierasimienia padkreślivała, što nie źbirałasia prasić hrošy na radyjostancyi ŭ dziaržavy, bo mieła svajho inviestara. Ananimny telehram-kanał «Paca-vaca» apublikavaŭ źliŭ, dzie havorycca, što hrupa asobaŭ mieła namier zarehistravać nie adnu, a adrazu try radyjostancyi — «Sport-FM», EUROPA+ i Energy.
Alaksandra Hierasimienia.
Pazicyjanujucca hetyja miedyja jak biełaruskija, ale na spravie heta — adnajmiennyja rasijskija ŚMI. Usie jany, a taksama sajt «Sport Biełaruś» musili abjadnacca ŭ adziny nibyta spartovy chołdynh. Tolki fiška ŭ tym, što spartyŭny kantent zajmaŭ by tam nie bolš za 15% efiru.
Aproč Hierasimieni i Skardzina, za prajekt uziaŭsia bujny ajčynny biznesmien Vital Sinicki (№100 u rejtynhu samych paśpiachovych biznesoŭcaŭ krainy ad «Ježiednievnika»). Sinicki maje biznes u śfiery nieruchomaści. Adnak vielmi sumniŭna, što jon adzin stolki b ukłaŭ u radyjostancyi.
Vital Sinicki.
Rasijskija «Sport-FM» (ciapierašniaja Studio21) i EUROPA+ naležać uralskaj horna-mietałurhičnaj kampanii, a Energy — heta pradukt «Hazprom-miedyja». Možna mierkavać, što za chołdynham stajaŭ by bujny rasijski biznes. Taksama varta adznačyć, što «Hazpromu» naležyć jašče dźvie radyjostancyi ŭ Biełarusi — «HumarFM» i «RełaksFM».
Nadzieja Skardzina ŭ telefonnaj razmovie z TUT.BY adznačyła, što pry admovie ŭ rehistracyi zhadvałasia vialikaja kankurencyja na rynku. Zdahadka ž pra toje, što spartsmieny chacieli takim čynam pryvieści ŭ krainu rasijskija papularnyja radyjostancyi «Jeŭropa Plus» i Energy, stała dla jaje niečakanaściu.
— My ździŭleny tym, što naša inicyjatyva była ŭspryniataja jak sproba pryvieści na biełaruski rynak rasiejskich hulcoŭ. Ad rasijskich radyjostancyj u prajekcie zastavalisia tolki papularnyja nazvy. Kapitał — biełaruski, hrošy iduć u biudžet Biełarusi. Nie išła havorka ab rasijskim biznesie i rasijskich hrošach, tak, adzin zasnavalnik z Rasii — ale jaho dola tolki 10%. Radyjo pavinna było viaščać ź Biełarusi, ź Minska, usie prahramy — biełaruskija. My razumiejem, što «Sport FM» — heta radyjostancyja dla śpiecyfičnaj aŭdytoryi, sacyjalny prajekt, nie zabaŭlalny, i jamu patrebna była b finansavaja padtrymka. Biełaruskaja «Jeŭropa Plus» zadumvałasia mienavita jak finansavy donar dla «Sport FM», — padzialiłasia alimpijskaja čempijonka.
Taja ž Hierasimienia pryznavałasia, što na isnavańnie «SportFM» patrebna 500 tysiač dalaraŭ na hod. Heta zusim niemałyja hrošy. Pa našaj infarmacyi, chołdynh płanavaŭ zabrać sabie bolš za 20% rekłamnaha radyjorynka krainy, hadavy abjom jakoha składaje kala 10 miljonaŭ dalaraŭ. Kali dadać 14%, što majuć «Humar» i «Rełaks» užo ciapier, to atrymlivajecca bolš za tracina ŭsich rekłamnych hrošaj, što kruciacca ŭ hetaj śfiery.
U Ministerstvie infarmacyi «NN» paviedamili sa spasyłkaj na Ministerstva suviazi, što na hety momant dla FM-stancyj niama volnych chvalaŭ. Tym nie mienš nam stała viadoma, što zajaŭniki ŭsio adno prasili ich zarehistravać, kab paśla dačakacca chvali, kali jana źjavicca.
Admietna, što ŭ Rasii, dzie cikavaść da sporta naŭrad ci nižejšaja, čym u Biełarusi, radyjostancyja «SportFM» nie pryžyłasia. I ŭ žniŭni 2018 hoda radyjostancyja była pierafarmatavanaja sa spartyŭnaj u muzyčna-zabaŭlalnuju z nazvaj Studio21. Była ryzyka paŭtareńnia hetaj situacyi i ŭ Biełarusi.
Udzielniki rynku miarkujuć, što heta spłanavanaja ataka bujnych rasijskich chołdynhaŭ na biełaruskuju miedyjnuju prastoru. Maŭlaŭ, ad pieršaj ataki ŭdałosia adbicca, ale heta nie značyć, što za imi nie buduć nastupnyja.
Čym moža być cikavym FM-dyjapazon? Navat nie prybytkami, bo, u paraŭnańni z rasijskim, biełaruski rynak rekłamy nie taki i vialiki. FM-stancyi najpierš biaruć svajoj vialikaj aŭdytoryjaj. Ludzi słuchajuć radyjo, kali jeduć u mašynie, pracujuć ci prosta hatujuć na kuchni.
Jasnaja sprava, nie viadziecca havorka, kab na hetych častotach viałasia b niejkaja palityčnaja prapahanda, ale peŭnaje pramacvańnie hleby ŭ lubym vypadku mahło b vieścisia.
Źviartaje ŭvahu, što tvarami hetaj kampanii byli abranyja takija pazityŭnyja piersanažy, jak alimpijskaja čempijonka Nadzieja Skardzina i pryziorka Alimpijady Alaksandra Hierasimienia. Unutry hramadstva jany majuć vysoki aŭtarytet i prychilnaść roznych płastoŭ nasielnictva, mienavita tamu admova ŭ rehistracyi vyklikała takuju niehatyŭnuju reakcyju.
