Saviet JEFSR źmianiŭ umovy apošniaha tranšu kredytu Biełarusi
Saviet Jeŭrazijskaha fondu stabilizacyi i raźvićcia (JEFSR) uchvaliŭ źmieny umoŭ pradstaŭleńnia siomaha, zaklučnaha, tranšu kredytu Biełarusi. Pra heta havorycca ŭ raspaŭsiudžanym u sieradu pres-relizie fondu.
«Saviet Jeŭrazijskaha fondu stabilizacyi i raźvićcia uchvaliŭ źmieny ŭ Prahramu reformaŭ Respubliki Biełaruś, što padtrymlivajecca finansavym kredytam JEFSR, u častcy ŭmoŭ pradastaŭleńnia zaklučnaha, siomaha, tranšu kredytu, — adznačajecca ŭ paviedamleńni. — Nieabchodnaść karekciroŭki ŭmoŭ paŭstała z pryčyny zruchu ŭ hrafiku realizacyi mier Prahramy ŭ ramkach pieršych šaści tranšaŭ». Pry hetym padkreślivajecca, što ŭ suviazi z hetym Savietam JEFSR byli ŭchvaleny pieranos kantrolnaj daty acenki vykanańnia ŭmoŭ siomaha tranšu i zapyt ministerstva finansaŭ Biełarusi ab pieranosie daty zakančeńnia dastupnaści kredytu z 31 śniežnia 2018 hoda na 31 sakavika 2019 hoda.
U ramkach uchvalenych źmianieńniaŭ, havorycca ŭ paviedamleńni, «aktualizavany parohavyja značeńni kolkasnych pakazčykaŭ i ŭdakładniena redakcyja niekatorych umoŭ».
U pryvatnaści, parohavaje značeńnie pa minimalnym uzroŭni vałavych mižnarodnych reziervaŭ ustanoŭlena z ulikam najaŭnaj dynamiki hetaha pakazčyka ŭ pieršaj pałovie 2018 hoda, prahnazavanych valutnych patokaŭ i z metaj niedapuščeńnia źnižeńnia ŭzroŭniu pakryćcia vałavych mižnarodnych reziervaŭ nižej za dva miesiacy impartu. Akramia taho, parohavyja značeńni pa manietarnych pakazčykach ustanoŭleny na ŭzroŭniach, jakija spryjajuć strymlivańniu inflacyi pa vynikach 2018 hoda ŭ ramkach vyznačanaha šaścipracentnaha metavaha značeńnia.
Niekatoryja inšyja ŭmovy, jakija nie byli vykanany biełaruskimi ŭładami ŭ ramkach šostaha tranšu, byli paŭtorna ŭklučany va ŭmovy pradastaŭleńnia siomaha tranšu. Razam z tym z umoŭ vydzialeńnia tranšu vyklučanyja niekalki kantrolnych pakazčykaŭ, jakija stracili aktualnaść pa stanie na novuju kantrolnuju datu.
