«Haspadar, nie stoj — staŭ litru na stoł!» — vučymsia kaladavać VIDEA
Prahrama «Viaskoŭcy» telekanała «Biełsat» kaladavała z darosłymi i dziećmi ŭ biełaruskich vioskach na Padlaššy.
Viadoŭca Viktar Šukiełovič spačatku pasprabavaŭ ulicca ŭ chor «Cahlinki» ź vioski Staroje Laŭkova, kab navučycca śpiavać kaladki. Tut jamu raspaviali pra kolišnija zvyčai, navučyli «daprošvacca», kab pakaladavać, a taksama pa-daŭniejšamu składać pažadańni haspadaram.
Kaladavać ža Viktar vypraviŭsia ŭ inšuju viosku — Lašuki. Tam viadoŭca pravieryŭ, nakolki maładyja biełarusy viedajuć havorku svaich dziadoŭ i jakija adznaki majuć pa biełaruskaj movie.
Adna z žycharak raspaviała, što vyjšła ŭ Lašuki zamuž ź inšaj vioski i jejnaja mova roźnicca ad havorki muža. Jana, da prykładu, kaža «vadro», a muž — «vidro», praŭda, sužency nie majuć vialikich prablemaŭ z kamunikacyjaj. Viadomaja tut taksama prymaŭka: «Nie pajdu za rečku zamuž — tam čužaja starana, tam havorać «jon, jana». U samich Lašukach kažuć «von» i «vona». Roźnica ŭ movie, praŭda, daŭno ŭžo pierastała być adhavorkaj, kab «za rečkaj» nie šukać sabie pary.
Raskazali Viktaru tut i pra toje, jak časam kaladniki bilisia zorkami i što kazali chcivym haspadaram, jakija praz skupaść nie prymali vinšavalnikaŭ.
