Viktar Marcinovič: Dźvie tektaničnyja padziei schavalisia ŭ śviatočnym kamatozie
Dźvie tektaničnyja padziei schavalisia ŭ śviatočnym kamatozie, niby Dźmitryj Kisialoŭ pad kaladnaj jołkaj.
Fota Voli Aficeravaj
Padziei voś takich pamieraŭ prahramujuć uźlot i padzieńnie impieryj, pačatak i skančeńnie vojnaŭ, pieradzieły kantynientaŭ — nie raŭnujučy sarajeŭskaja stralanina, što pakłała kaniec isnavańniu adrazu čatyroch impieryj.
Pieršaja padzieja — tomas, atrymany ŭkrainskaj pravasłaŭnaj carkvoj (ja ŭpeŭnieny, što chutka ŭsie farmalnaści, źviazanyja z padpisańniem, buduć urehulavanyja); druhaja — adnaŭleńnie varušeńnia pa ŭznaŭleńni SSSR.
Da pieršaj padziei ŭsio išło z 2014 hoda — pačatku vajny va Ukrainie. Druhuju padzieju jak byccam paciahnuła za saboj padrychtoŭka pieršaj. Bo nie taki čałaviek Uładzimir Uładzimiravič, kab biaskryŭdna prahłynuć stratu ŭpłyvu Rasii na «zachadzie ruskaha mira». Tym bolš što pry horšym scenary ŭkrainskaja aŭtakiefalija moža stać tolki pačatkam. Možacie ŭjavić sabie čałavieka, jaki svajoj histaryčnaj misijaj ličyć supraćstajańnie «pindosam» i «adnapalarnamu śvietu»? I jaki voś prosta ciapier bačyć, jak parady «stratehaŭ» u 2014-m pryviali da kanstancinopalskich padziejaŭ?
To nie treba dumać, što tajamničyja pieramovy ŭ Maskvie, pra jakija nam tak staranna ničoha nie kažuć, i miortvanarodžanaja Sajuznaja dziaržava — heta toje, čym budzie nasamreč zajmacca Kreml u 2019 hodzie.
Usio, što možna było vycisnuć z sajuznaj damovy 2000 hod, užo «jak by» isnuje: «Pastajanny kamitet», «Parłamienckaje sabranije», «Saviet ministraŭ SD» i navat, prabačcie, teleradyjoviaščalnaja kampanija. Ale voś ža jon, tomas ukrainskaj pravasłaŭnaj carkvy. A dzie toj sajuz, akramia papiery i biudžetnych vydatkaŭ? To, vidavočna, patrebny niejki novy «sajuz». Adnak da krytyčnaj miažy ŭ zbližeńni biełaruski bok padyšoŭ niedzie ŭ 2006 hodzie, na pytańni adzinaj valuty. Dalej Minsk nie moža. Bo Minsku rasijski rubiel kali i patrebny, to tolki z ułasnym emisijnym centram. Na jaki Maskva nu nijak pajści nie zmoža. To patrebny niejki inšy sajuz. Mahčyma, Sajuz Savieckich Sacyjalistyčnych Respublik? Toj samy, što raspaŭsia ŭ 1991-m?
19-y hod — dobry čas dla pačatku. Bo 19 heta — 91 naadvarot.
Zaŭvažym, što paralelna z uźniknieńniem prablem z kampiensacyjaj padatkovaha manieŭru ŭ Biełarusi «niečakana» trabły ŭźnikli ŭ armian — z canoj na haz. Čamuści ruski bok raptoŭna vyrašyŭ jaho padvysić. Chacia, zdavałasia b, usio daŭno damoŭlena. «DNR», Armienija, Biełaruś, Rasija — niebłahi sajuz dla pačatku? Astatnija padciahnucca: pakul haz i nafta harać — instrumientaŭ na zaachvočvańnie chopić.
I voś praŭda, dziŭnavata dumać, što «Sajuznaja dziaržava», ź jakoj užo 15 hadoŭ śmiajucca i ŭ Rasii, i ŭ Biełarusi, patrebnaja Pucinu tolki kab «pieraabracca ŭ 2024 hodzie». Vy zaŭvažyli, darečy, što ŭ fiederalnych navinach milhanuła dačka Pucina? Taja samaja, jakuju nikoli ŭ efiry nie pakazvali? Dyk siarod śpiecyjalistaŭ ciapier bałbočuć, što Ksiuša Sabčak była patrebnaja nie tolki kab adciahnuć simpatyi libieralnych letucieńnikaŭ ad Navalnaha, ale i dla taho, kab pryvučyć rasijan da dumki, što žančyna — kandydat u prezidenty — heta narmalna. Tym bolš nie niejkaja hłamurnaja kisa, a navukoŭca, daśledčyca, małajčyna. Dy z takim tatam! Dalej dumajcie sami.
U lubym vypadku zaviazvać svaje płany na takuju surjoznuju reč, jak «prablema-2024», na znajomcaŭ, jakija z 2007 hoda abiacajuć uvieści adzinuju valutu, było b z boku Uładzimira Uładzimiraviča kryšačku samanadziejna. I nie toj jon čałaviek, jaki hetaha nie razumieje.
I tak, ja čytaŭ toj śmiešny artykuł na «Rosbałcie» («Absalutna dakładny prahnoz na 2019-y»), u jakim kazałasia, što sacyjalnuju dynamiku ŭ Rasii pradvyznačajuć elity (što słušna), a elity stamilisia ad Pucina, bo voś užo i Abramoviča ŭ Łondan nie puskajuć. I, maŭlaŭ, tamu ruskich čakajuć chutkija pieramieny, ale nie z boku vulicy, a z boku «palitbiuro».
Dyk voś, u hetych razvahach pamyłkovaj jość druhaja častka — tam, dzie havorycca pra «stomu ad Pucina». Takoje adčuvańnie, što aŭtar prahnozu dumaje, nibyta ŭsia aliharchičnaja tusa myślić vobrazami, zhienieravanymi Ksiušaj Sabčak u Instahramie. Što, miakka kažučy, nie tak. Bo Pucin dla ruskich elitaŭ — załoh adnaŭleńnia vieličy i simvał nadziei na revanš. I dumać jak Ksiuša Sabčak jany pačnuć tolki tady, kali Pucin pakinie tomas biez adkazu.
To budziem rychtavacca da SSSR. Na ŭsich uzroŭniach. Tym bolš što paralelnaje zhortvańnie donarskaj dapamohi ŭsim tutejšym nacyjanalnaaryjentavanym prajektam dazvalaje dapuścić, što farmat paktaŭ Mołatava — Rybientropa nie vyčarpany i ŭ XXI stahodździ.
Razumiejecie, Rasija jak takaja — nie impieryja. Impieryjaj jaje rabili dźvie ideałohii: ruski manarchizm i sacyjalizm savieckaha tołku. Pad pryniaćcie druhoj ideałohii Biełaruś staranna vybudoŭvałasia apošnija 15 hadoŭ. Śviatkujecie 100-hodździe ŭtvareńnia VŁKSM i BSSR? Pryznačajecie kamunistaŭ u adukacyjnuju viertykal? Nu-nu. Ščaślivaha vam 1991 hoda naadvarot.
