Na rali «Dakar» biełaruski MAZ na vialikaj chutkaści pierakuliŭsia za 200 mietraŭ da finišu VIDEA
Try ekipažy kamandy «MAZ-SPORTaŭta» prajšli druhi etap rali-rejdu «Dakar-2019», što adbyvajecca ŭ Pieru, i zaniali miescy z 11 pa 13-je. Vyniki mahli być i lepšyja, ale MAZ Siarhieja Viazoviča za 200 mietraŭ da finišu na ŭsioj chutkaści pierakuliŭsia ŭ piaskach, raspaviali ŭ pres-słužbie Minskaha aŭtazavoda.
Na druhim etapie, jaki zbolšaha pralahaŭ uzdoŭž akijana, honščyki prajechali śpiecučastak daŭžynioj 342 km. Trasa ŭklučała ŭ siabie piaščanyja i hravijnyja adrezki. Na ŭčastku ź dziunami i adbyłasia niepryjemnaść z MAZam Siarhieja Viazoviča. Pierad finišam jon vyrašyŭ abahnać «kamazaŭca» Ajrata Mardziejeva, i, vyrvaŭšysia napierad, trapiŭ u piasčanuju pastku.
yadi.sk
Hruzavik na vysokaj chutkaści padskočyŭ, stuknuŭsia ab «prystupku» i loh na bok, honščyki pry hetym nie paciarpieli. Jak pryznaŭsia potym piłot, «baraćba ŭziała vierch nad zdarovym sensam».
VIDEA incydentu
Rasijski ekipaž spyniŭsia pacikavicca pra zdaroŭje, ale dapamahać admoviŭsia. MAZ na koły pastaviŭ ekipaž Alaksieja Višnieŭskaha. Darečy, vykonvać funkcyju vyratavalnika dla jaho nie ŭpieršyniu — padobnaja situacyja zdaryłasia i na letašnim «Dakary».
U vyniku MAZ Siarhieja Viazoviča pieraadoleŭ śpiecučastak za 4 hadziny 21 chvilinu, apynuŭšysia na 11-m miescy pa vynikach etapu i na 12-m — u ahulnym zaliku. Pieramožcam zajezdu znoŭ staŭ rasijanin Eduard Mikałajeŭ, jaki apiaredziŭ biełarusaŭ na 33 chviliny.
Alaksiej Višnieŭski pryjechaŭ 12-m. Jaho čas — amal 4 hadziny 23 chviliny, a adstavańnie — 35 chvilin. U ahulnym zaliku ekipaž znachodzicca na 11-j pazicyi, a roźnica ŭ časie ź lidaram honki składaje 41 chvilinu.
Alaksandr Vasileŭski na druhim etapie finišavaŭ 13-m (takaja ž pazicyja i ŭ «absalucie»), patraciŭšy na trasie 4 hadziny 28 chvilin. Heta na 40 chvilin bolš, čym lepšy kamazaŭski ekipaž.
Treci etap pryviadzie honščykaŭ ŭ Arekipu — akružany vułkanami horad Pieru.
Marafon «Dakar-2019» prachodzić pa terytoryi Pieru. Rali-rejd zojmie 11 dzion i zavieršycca 17 studzienia ŭ Limie. Honščykam treba budzie prajechać kala 5 tys. km. Bolš za pałovu maršrutu pralahaje praź piasčanyja trasy ź vializnymi dziunami i inšymi pieraškodami.
