Biełarus pravoziŭ praź litoŭskuju miažu bolš za 600 pačkaŭ cyharet
Bolš za 600 pačkaŭ kantrabandnych cyharet vyjavili litoŭskija pamiežniki ŭ tajniku, abstalavanym u biełaruskim Fiat Stilo. Biełarusu pahražaje bujny štraf i kanfiskacyja aŭtamabila, paviedamlaje Abw.by sa spasyłkaj na pamiežnuju słužbu Litvy.
U niadzielu ŭ Varanskim rajonie, u vioscy Kaniaviele, što na miažy ź Biełaruśsiu, pamiežniki spynili lehkavy aŭtamabil Fiat Stilo na biełaruskich «numarach».
33-hadovy biełarus, jaki kiravaŭ mašynaj, pakazaŭ dakumienty. Pavodziny kiroŭcy i punkt pryznačeńnia zdalisia pamiežnikam padazronymi, tamu jany vyrašyli pravieryć mašynu bolš staranna — i znajšli schovanku z 655 pačkami cyharet NZ Gold ź biełaruskimi akcyznymi markami.
Raspačata administracyjnaja sprava. Biełarusu pahražaje štraf u pamiery ad 2000 da 5000 jeŭra. Sprava budzie razhledžana sudom.
Paśla dopytu mužčynu adpuścili, a Fiat Stilo zastaŭsia ŭ pamiežnikaŭ, jak i cyharety.