Prakuror patrabuje rasstralać abvinavačanaha ŭ zabojstvie dźviuch dziaŭčat u Babrujsku
U Babrujsku ŭ sudzie prachodziać sprečki bakoŭ pa spravie ab padvojnym zabojstvie. Na łavie padsudnych — 36-hadovy žychar horada. 20 lipienia 2018 hoda ŭ vannaj jaho kvatery znajšli cieły dźviuch dziaŭčat sa śladami hvałtoŭnaj śmierci. 8 studzienia prakuror zapatrabavała dla abvinavačanaha najvyšejšuju mieru pakarańnia, piša Tut.by.
Pavodle papiarednich źviestak, z zahinułymi jon paznajomiŭsia ŭ kafe, adkul usie troje źjechali na taksi da jaho dadomu. Pavodle abvinavačańnia, padsudny nanios adnoj achviary 77 udaraŭ małatkom i rukami ŭ žyćciova važnyja orhany. U druhoj achviary — 16 ran, amal usie — u vobłaść hałavy i šyi. Paśla abvinavačvany «zrabiŭ zachady da rasčlanieńnia i chavańnia trupaŭ».
26 śniežnia na pracesie sudździa Michaił Mielnikaŭ abviaściŭ vyniki sudmiedekśpiertyzy adnoj z zahinułych dziaŭčat, Alesi Klimavaj. U jaje kryvi było vyjaŭlena 3,3 pramile ałkaholu. Praktyčna ŭsie cialesnyja paškodžańni byli naniesieny dziaŭčynie pryžyćciova. Joj, zhodna z zaklučeńniem ekśpiertaŭ, nanieśli 30 paškodžańniaŭ tolki ŭ vobłaść hałavy.
Abvinavačany Alaksandr Asipovič pahadziŭsia z kolkaściu pryčynienych im cialesnych paškodžańniaŭ, paćvierdziŭšy, što nanios ich małatkom z abcuhami.
Druhaja zahinułaja, paviedamiŭ sudździa, taksama była pjanaja: 3,4 pramile ŭ kryvi.
Alaksandr Asipovič zajaviŭ, što dziaŭčaty mieli ŭ dačynieńni da jaho peŭnyja płany — u kafe niešta padsypali ŭ piva i čakali, jak napoj na jaho padziejničaje. Tamu, maŭlaŭ, i pajechali da jaho dadomu.
8 studzienia dziaržabvinavaŭca Volha Ivanova paviedamiła, što abvinavačany ŭ momant zabojstva ŭśviedamlaŭ, što adbyvajecca, a paśla pasprabavaŭ schavać ślady złačynstva, dla čaho nabyŭ u kramie niekalki upakovak pakietaŭ dla śmiećcia. Adnak paśla jon źmianiŭ svajo rašeńnie i źjaviŭsia ŭ milicyju z pavinnaj. Volha Ivanova padkreśliła, što jaŭka z pavinnaj u dadzienym vypadku nie moža być źmiakčalnaj akaličnaściu.
— Paciarpiełyja nie adznačalisia prykładnym pavodzinami, adnak Asipovič tak i nie nazvaŭ pryčynu, pa jakoj było ździejśniena inkryminavanaja jamu dzieja. Zabojstva było ździejśniena naŭmysna i z asablivaj žorstkaściu, — kaža prakuror.
Volha Ivanova zapatrabavała dla abvinavačanaha vyšejšuju mieru pakarańnia — rasstreł, dadaŭšy, što raniej jon užo ździajśniaŭ ciažkija złačynstvy, adnak na šlach vypraŭleńnia nie staŭ.
Maci zahinułaj Alesi Klimavaj źviarnułasia da suda z prośbaj padtrymać dziaržabvinavaŭcy, bo dziaŭčaty byli zabityja z asablivaj žorstkaściu.
