U Habonie armija pasprabavała skinuć dyktatara, čyja siamja kiruje krainaj 50 hadoŭ. Ale ničoha nie atrymałasia
Putčysty zachapili dziaržaŭnuju radyjostancyju i vystupili sa zvarotam pa telebačańni. Lidar arhanizataraŭ pieravarotu zajaviŭ pra zachop ułady z metaj adnaŭleńnia ŭ Habonie demakratyi.
Ali Bonha, kremlin.ru
Vajskoŭcy Habona abviaścili pra zachop ułady ŭ hetaj afrykanskaj dziaržavie z metaj adnaŭleńnia demakratyi ŭ krainie, paviedamlaje Associated Press (AP). Uzbrojenyja ludzi zachapili ŭ stalicy Habona dziaržaŭnuju radyjostancyju, a paźniej u efir dziaržaŭnaha telebačańnia byŭ vypuščany zvarot da naroda, piša RBK.
Začytaŭ zvarot lejtenant Keli Ando Abianh, pa bakach ad jaho stajali ŭzbrojenyja vintoŭkami sałdaty, jon nazvaŭ siabie lidaram «Patryjatyčnaha ruchu vajskoŭcaŭ i śpiecsłužbaŭ Habona», paviedamlaje Reuters. U svaim zvarocie jon zajaviŭ, što pieravarot nakiravany suprać taho, «chto bajaźliva zabiŭ junych patryjotaŭ» u žniŭni 2016 hoda.
Dziejny prezident Habona, 59-hadovy Ali bien Bonha Andzimba, atrymaŭ uładu ŭ spadčynu ad svajho baćki Amara Bonha, jaki ŭznačalvaŭ krainu z 1967 pa 2009 hod. U 2009 hodzie Ali bien Bonha Andzimba vyjhraŭ vybary, a ŭ žniŭni 2016 hoda zajaviŭ ab svajoj pieramozie na novych vybarach. Apazicyja, čyjho kandydata prezident abyšoŭ mienš čym na 6 tysiač hałasoŭ, vyniki vybaraŭ nie pryznała, zajaviŭšy pra falsifikacyi, paśla čaho ŭ Librevili prajšli masavyja biesparadki, padčas jakich byŭ spaleny budynak parłamienta. Adnak Kanstytucyjny sud Habona pryznaŭ pieramohu Ali bien Bonha Andzimby, i ŭ kancy vieraśnia 2016 hoda jon znoŭ byŭ abvieščany kiraŭnikom dziaržavy.
U kastryčniku 2018 hoda Ali bien Bonha Andzimba byŭ špitalizavany ŭ Saudaŭskaj Aravii paśla insultu. Ź listapada taho ž hoda jon prachodzić lačeńnie ŭ Maroka. U navahodnim zvarocie da nacyi prezident pryznaŭ, što maje prablemy sa zdaroŭjem, adnak zapeŭniŭ, što ŭžo papraŭlajecca.
Keli Ando Abianh u svaim zvarocie 7 studzienia zajaviŭ, što vystupleńnie prezidenta, jaki nie moh ruchać pravaj rukoj i ź ciažkaściu vymaŭlaŭ słovy, uzmacniła sumnievy ŭ jaho zdolnaści vykonvać svaje abaviazki.
Pres-sakratar Ali bien Bonha Andzimby zajaviŭ Reuters, što prezident nieŭzabavie vystupić sa zvarotam da nacyi.
Krynica ahienctva, blizkaja da ŭrada Habona, paviedamiła Reuters, što putčysty małakolkasnyja. U toj ža čas žychary Librevila paviedamlajuć AP, što vulicy stalicy patrulujuć tanki i broniemašyny.
Paźniej ułady Habona abviaścili pra zadušeńnie sproby vajennaha buntu ŭ krainie. Pres-sakratar urada Habona Hi-Biertran Maranhu paviedamiŭ radyjo RFI, što ŭłady aryštavali čaćviarych ź piaci aficeraŭ, jakija ŭziali ŭdzieł u sprobie putču. Piatamu ŭdałosia schavacca, u ciapierašni čas jaho šukajuć.
Pa dadzienych Reuters, vajennyja, viernyja ŭładam, užyli ślozaciečny haz, kab razahnać kala trochsot praciŭnikaŭ režymu, jakija vyjšli na vulicy Librevila ŭ padtrymku putčystaŭ.
Habon źjaŭlajecca adnoj z najbahaciejšych krain Afryki pa VUP na dušu nasielnictva. Ekanomika Habona ŭ značnaj stupieni zaležyć ad ekspartu syraviny, u tym liku nafty.
