Pad Hrodnam «Ford» i «Opiel» sutyknulisia z zubrom — jon zahinuŭ ŽORSTKIJA FOTA
1 studzienia kala 18:30 na aŭtadarozie Hrodna — Aziory zubr zahinuŭ ad sutyknieńnia z dvuma aŭtamabilami, paviedamlaje newgrodno.by.
«Ford» ruchaŭsia z boku abłasnoha centra. Niedaloka ad vioski Stryjeŭka na šlachu ŭ kiroŭcy apynuŭsia zubr. Ale, niahledziačy na toje, što kiroŭca rezka nacisnuŭ na piedal tormazu, sutyknieńnia paźbiehnuć nie ŭdałosia. Paśla ŭdaru žyvioła ŭstała i navat pasprabavała syści. U hety čas z boku Azioraŭ jechaŭ «Opiel». Kiroŭca hetaha aŭto taksama nie zdoleŭ paźbiehnuć sutyknieńnia. Paśla druhoha ŭdaru zubr pamior na miescy.
Na miesca DTZ prybyli supracoŭniki DAI i chutkaj dapamohi. Kiroŭcu «Forda» ahledzieli na miescy i adpuścili, kiroŭcu «Opiela» špitalizavali. Pahrozy jaho žyćciu niama. Transpartnyja srodki atrymali značnyja techničnyja paškodžańni.
U studzieni 2018 kala Stryjeŭki byŭ zarehistravany pieršy vypadak, kali źbili naśmierć zubra. Paśla hetaha vypadku na tym učastku pastavili papieradžalnyja znaki, što na darozie mahčymaje źjaŭleńnie dzikich žyvioł.
SVK «Aziory» razvodzić zubroŭ ad 1999 hoda. Ciapier pahałoŭje tut — amal 200 zubroŭ, adna z samych bujnych papulacyj hetych žyvioł u Biełarusi. Usie zubry na volnym vypasie, i całkam mahčyma, što jany mohuć vychodzić da darohi. Heta dzikija žyvioły, jakija nie abmiežavanyja valjerami.
Zubry, zhodna z pastanovaj Savieta ministraŭ, adnosiacca da dzikich žyvioł, uklučanych u Čyrvonuju knihu Biełarusi, i znachodziacca va ŭłasnaści dziaržavy.
DTZ adbyłosia na ŭčastku darohi, dzie stajać papieradžalnyja znaki. Kiroŭcam pahražaje bujny štraf. «Cana» bujnoj žyvioły pa zakonie składaje 400 bazavych vieličyń. Adnak, kali havorka idzie pra žyviołu, uklučanuju ŭ Čyrvonuju knihu, suma moža pavialičycca ŭtraja — da 1200 bazavych vieličyń (30,6 tysiačy rubloŭ, ci amal 14,3 tysiač dalaraŭ u ekvivalencie).
Adnak Pastanovaj Saŭmina mikrapapulacyjam zubroŭ nadadzieny rozny status: dla zubroŭ, jakija žyvuć u zapaviedniku i nacyjanalnych parkach — status asnoŭnaha (strachavoha) hienafondu, a dla zubroŭ, jakija žyvuć na inšych terytoryjach, — reziervavaha hienafondu. Ad rašeńnia DAI, da jakoj papulacyi adnosicca źbity zubr, budzie zaležać pamier štrafu.
