«Biełnaftachim»: Bienzin patańnieje, ale nie 2 studzienia
Anansavanaha źnižeńnia koštu na aŭtamabilnaje paliva 2 studzienia nie adbyłosia. Adnak kancern «Biełnaftachim» abiacaje, što benzin dniami ŭsio ž patańnieje.
U hetym zapeŭniła Svabodu pradstaŭnica kancernu Maryna Kaściučenka.
«Ja nia viedaju, chto kamu abiacaŭ, što mienavita 2 studzienia benzin patańnieje. Staršynia kancernu Andrej Rybakoŭ, naviedvajučy «Naftan» 30 śniežnia, skazaŭ, što 2-3 studzienia budziem abmiarkoŭvać heta pytańnie. Kali vyrašym — tak, panizim. Dakładna nie planavałasia ad 2 studzienia panižać. Ale sapraŭdy my prapanavali krychu źnizić košty. Čakajem, što chutka takoje rašeńnie budzie pryniataje», — udakładniła Maryna Kaściučenka.
30 śniežnia kiraŭnictva kancernu «Biełnaftachim» uniesła prapanovy ab źnižeńni cenaŭ na matornaje paliva na ŭnutranym rynku. Pra heta zajaviŭ staršynia kancernu Andrej Rybakoŭ padčas naviedvańnia AAT «Naftan».
«Kali faktyčny cana barela nafty ŭ studzieni 2019 hodu budzie zachoŭvacca ŭ dyjapazonie 52-55 dalaraŭ, razhladajecca źnižeńnie koštu na 1 kapiejku dla dyzelnaha paliva i na 2 kapiejki dla benzinu. Taksama praduhledžvajecca śviatočnaja źnižkavaja kampanija», — cytuje Andreja Rybakova BiełTA.