Niekalki prostych pravił — i vy nie budziecie chvareć zimoj
Zima, maroz, zavirucha. Ty adčuvaješ, jak choład lezie pad palito, ščyple ruki i ščoki, jak nohi ŭ botach pacichu dranćviejuć. A paśla, u ciopłym pamiaškańni, nie možaš sahrecca, kałocišsia, pješ harbatu i razumieješ, što ŭžo šmorhaješ nosam, a hałava idzie kruham — prastuda.
Fota Shutterstock.
Jak zaścierahčysia ad siezonnych zachvorvańniaŭ i što rabić pry pieršych prykmietach prastudy, raspaviała doktar-terapieŭt miedycynskaha centra «Łade» Natalla Buzynoŭskaja.
Pakul vy nie zachvareli
Lepš za ŭsio, viadoma, zaścierahacca ad zachvorvańniaŭ, pakul zdarovy.
— Abirajcie adzieńnie pa siezonie
«U marazy apranacca treba ciopła. Heta viedajuć navat dzieci, i nichto z hetym spračacca nie budzie. Ale našymi, jak ciapier pryniata havaryć, jeŭrapiejskimi zimami zusim nieabaviazkova zachutvacca z hałavy da noh. Naprykład, u nievialiki maroz nie treba chavać nos u šalik. U nosie znachodziacca varsinki, jakija pieraškadžajuć virusam pranikać dalej u arhanizm. Ale mocnymi marazami nos lepš schavać, kab nie zapaliłasia ślizistaja. I abaviazkova zimoj treba nasić šapku. Hałava mierźnie hetaksama, jak i luby inšy adkryty ŭčastak cieła. Adsiul takija zachvorvańni, jak nieŭryt, zapaleńnie mazhavoj abałonki i hetak dalej», — raskazvaje Natalla Buzynoŭskaja.
— Śpicie nie mienš za vosiem hadzin, hulajcie nie mienš za hadzinu ŭ sutki
«Zimoj nie śpiašajciesia paśla pracy ŭskočyć u pierapoŭnieny hramadski transpart, a prahulajciesia. I spać budziecie lepš, i imunitet umacujecie. Kožny dzień nieabchodna pravodzić na śviežym pavietry nie mienš za hadzinu. Starajciesia taksama nie karystacca ŭzimku liftami. Infiekcyja ŭ ich žyvie vielmi doŭha. Skaracicie čas znachodžańnia ŭ natoŭpie ludziej. Starajciesia čaściej myć ruki i tvar, asabliva paśla taho, jak prajechali u hramadskim transparcie, pabyvali u kramie i h.d. Tamu što virusy zachoŭvajuć svaju aktyŭnaść na ciele čałavieka značna daŭžej, čym u pavietry».
— Charčujciesia zbałansavana
«Nalahajcie na pradukty, jakija źmiaščajuć vitaminy: sadavinu i harodninu (cybulu, repu, kapustu, mandaryny, hranat i inšyja pradukty). U charčavańni pavinny prysutničać stravy z ryby i miasa (ryba nie mienš za 2—3 razy na tydzień). I, biezumoŭna, nie abyścisia zimoj biez vuhlavodaŭ — heta čorny chleb i kašy. Ich lepš užyvać u pieršaj pałovie dnia, a miasa, rybu z harodninaj, małočnyja pradukty — u druhoj. Ni ŭ jakim razie nie treba haładać! Taksama možna pieryjadyčna prymać kompleks polivitaminaŭ, ale pry ŭmovie, što ŭ vas niama supraćpakazańniaŭ».
AAT «EKZON», UNP 200433278
Kali vy ŭsio ž zachvareli
Jak tolki vy adčuli niedamahańnie, picie šmat ciopłaj vadkaści: advary, harbatu, prosta ciopłuju vadu ź limonam, małako ź miodam.
Pieršaja dapamoha pry virusnych infiekcyjach — heta pałaskańnie horła i nosa.
«Horła rekamiendujecca pałaskać rastvoram furacylinu. Nos možna pramyć salanym rastvoram abo hatovymi salanymi sumiesiami, jakija pradajucca ŭ aptekach biez receptu.
Kali padniałasia tempieratura
Pavyšeńnie tempieratury cieła — heta achoŭnaja reakcyja arhanizma, jakaja ŭźnikaje ŭ adkaz na infiekcyju. Pry pavyšeńni tempieratury cieła virusam składaniej razmnažacca. Ale kali źjaviŭsia hałaŭny bol, dryžyki, łamata ŭ ciele, słabaść, tempieratura padniałasia da 38 i vyšej, to rekamiendujecca pryniać haračkapanižalnyja preparaty. Kali na praciahu dvuch dzion hetyja simptomy nie źnikli, nie zajmajciesia samalačeńniem — źviarniciesia da doktara.
Kali vy zachvareli, pamiatajcie ab prostych praviłach: vykonvajcie paścielny režym, nasicie achoŭnuju masku, nie zabyvajcie pravietryvać pamiaškańnie.
Pamiatajcie, što samy pik vostrych reśpiratornych zachvorvańniaŭ prychodzicca na kaniec zimy. Ale bieražycie zdaroŭje i šanujcie siabie kožny dzień, niezaležna ad nadvorja za aknom.