Kiraŭnik «Biełhazprambanka»: My byli ŭ šoku, kali biblijateki admovilisia pryniać u padarunak knihi Aleksijevič
Kiraŭnik «Biełhazprambanka» Viktar Babaryka byŭ šakavany, kali daviedaŭsia, što biblijateki troch abłaściej krainy admovilisia pryniać u padarunak knihi Śviatłany Aleksijevič.
Vydańnie piacitomnika «Hałasy ŭtopii» na biełaruskaj movie — samy paśpiachovy prajekt u historyi kraudfandynha ŭ Biełarusi. Padčas kampanii było sabrana 110 tysiač u ekvivalencie. «Biełhazprambank» zamoviŭ 15 000 asobnikaŭ knih Śviatłany Aleksijevič dla biaspłatnaj pieradačy ŭ abłasnyja i rajonnyja biblijateki pa ŭsioj krainie, piša «Salidarnaść».
Pieršymi atrymali padarunki biblijateki Viciebska i Viciebskaj vobłaści, a taksama Minska i Minskaj vobłaści.
Hrodna i Brest u adkaz na prapanovu banka paviedamili, što nie majuć patreby ŭ knihach Aleksijevič.
«Salidarnaść» stelefanavałasia z kiraŭnictvam biblijatek i zadała prostaje pytańnie: čamu jany admaŭlajucca ad knih nobieleŭskaha łaŭreata.
Adkazy ździvili. Niekatoryja kiraŭniki spasyłalisia na toje, što nie prymajuć takija rašeńni samastojna, i kivali na vyšejšaje načalstva — ideołahaŭ. Tyja, u svaju čarhu, nie zmahli dać vyrazny adkaz, pakolki «nie dajuć kamientary pa telefonie» abo nie vałodajuć situacyjaj.
Kiraŭnictva Biełhazprambanka da hetaha času nie kamientavała vyniki kampanii #NobelNaMove. 20 śniežnia padčas pres-kanfierencyi na placoŭcy ulej.by Viktar Babaryka pryznaŭsia, što byŭ šakavany, kali daviedaŭsia, što biblijatekam troch abłaściej krainy (Hrodzienskaj, Bresckaj i Mahiloŭskaj), knihi Śviatłany Aleksijevič nie patrebnyja, tamu što ŭ ich ich dastatkova.
Viktar Babaryka.
— My daviedalisia, što nul dla biełaruskich čynoŭnikaŭ — heta dastatkova. Ja nikoli nie dumaŭ, što padarunak moža być nie patrebny. Choć by ź vietlivaści ludzi zvyčajna biaruć i kudyści chavajuć nadoŭha… My byli realna ŭ šoku. Čamu nie treba — zadavać pytańni niama kamu i niapravilna.
Pavodle jaho słoŭ, «Biełhazprambank» ŭspryniaŭ hetuju situacyju jak vyklik. U vyniku było pryniata rašeńnie pravieryć, moža być, u Biełarusi jość ludzi, jakim ničoha nie treba. U adkaz bank zapuściŭ kraŭdkampaniju pa raspaŭsiudu knih siarod biblijatek troch abłaściej, «kiraŭnictva jakich ličyć, što nul — heta dastatkova».
— Na sajcie lib.artbelarus.by luby pradstaŭnik biblijateki hetych abłaściej moža zamović tuju kolkaść kamplektaŭ, jakuju jon ličyć patrebnym dla svajoj biblijateki, — raspavioŭ Viktar Babaryka. — Čytačy hetych biblijatek taksama mohuć prapanavać zrabić zakaz ich supracoŭnikam.
Na dumku Babaryki, hetaja kampanija pakaža, ci patrebnyja ludziam knihi Aleksijevič. Mahčyma, ličyć jon, my ŭbačym toje, što časta nazirajem: razryŭ pamiž žadańniem ludziej i razumieńniem hetych žadańniaŭ uładaj, jakaja čamuści ličyć, što knihi nobieleŭskaha łaŭreata, vydadzienyja na rodnaj movie, nie patrebnyja biblijatekam Biełarusi.
- U nas zastałosia krychu bolš za 600 kamplektaŭ. Atrymajecca — dobra. Nie atrymajecca — u lubym vypadku my znojdziem im prymianieńnie, — dadaŭ bankir, udakładniŭšy, što zamović knihi mohuć tolki supracoŭniki biblijatek.