Kolcy Saturna razburajucca i chutka mohuć źniknuć
Navukoŭcy NASA paćvierdzili, što Saturn hublaje kolcy — im zastałosia isnavać usiaho tolki kala sta miljonaŭ hadoŭ. Razbureńnie adbyvajecca z-za dziejańnia hravitacyi i mahnitnaha pola płaniety, paviedamlaje vydańnie Science Daily.
Pavodle acenak daśledčykaŭ, doždž ź ledzianych čaścic pad uździejańniam mahnitnaha pola pryviadzie da źniknieńnia sistemy kolcaŭ praz 300 miljonaŭ hadoŭ. Adnak hravitacyjnyja siły taksama spryjajuć padzieńniu materyjału ŭ rajon ekvatara płaniety, što skaračaje termin žyćcia kolcaŭ jašče na 200 miljonaŭ hadoŭ.
Kolcy składajucca z čaścic i hłyb vadzianoha lodu, jakija ŭraŭnavažany pryciahnieńniem hazavaha hihanta i svajoj arbitalnaj chutkaściu. Adnak stan raŭnavahi parušajecca ultrafijaletavym vypramieńvańniem Sonca abo sutyknieńniem ź mikramietearytami, u vyniku čaho čaścicy atrymlivajuć elektryčny zarad. Na ich pačynaje dziejničać mahnitnaje pole płaniety, i čaścicy pryciahvajucca da atmaśfiery, dzie vyparajucca. Para ŭstupaje ŭ chimičnyja reakcyi sa źjaŭleńniem ionaŭ vadarodu, jakija vypramieńvajuć infračyrvonaje śviatło i mohuć naziracca naziemnymi teleskopami.
Daśledčyki pa infračyrvonym vypramieńvańni vyznačyli kolkaść materyjału, jaki padaje na Saturn. Vyniki pakazali na toje, što kolcy Saturna ŭtvarylisia 100 miljonaŭ hadoŭ tamu, što nie tak daŭno ŭ paraŭnańni z uzrostam płaniety — joj čatyry miljardy hadoŭ.
