Pieramovy pa kampiensacyi padatkovaha manieŭru zahłuchli ŭ vieraśni-kastryčniku pa inicyjatyvie Rasii
Pieramovy pa padatkovym manieŭry skončany, ale ŭsie čakajuć sustrečy kiraŭnikoŭ Biełarusi i Rasii. Pra heta ŭ kułuarach parłamienta žurnalistam paviedamiŭ namieśnik ministra finansaŭ Dźmitryj Kijko, piša Tut.by.
«Naša pazicyja vynikaje z taho, što ŭ nas vyznačany bazavyja ŭmovy pastaŭki i pierapracoŭki nafty pry padpisańni dahavora ab Jeŭrazijskim ekanamičnym sajuzie. Dźvie ŭmovy jość — zaličeńnie ŭ biudžet Biełarusi vyvaznych mytnych pošlin ad naftapraduktaŭ u pamiery da 1,5 młrd dalaraŭ i biaspošlinnaja pastaŭka nafty ŭ pamiery 24 młn ton. Paramietry padatkovaha manieŭru, jaki Rasija płanuje realizavać z 2019 hoda, praduhledžvaje štohod na praciahu 6 hadoŭ źnižeńnie stavak vyvaznych mytnych pošlin na 5 pracentnych punktaŭ. Adpaviedna dla nas budzie źmianšacca suma vyvaznych pošlin, jakaja atrymlivajecca biudžetam až da poŭnaj straty dadzienaj krynicy z 2025 hoda», — rastłumačyŭ jon.
Z ulikam farmiravańnia dla Biełarusi ceny na naftu pa formule «suśvietnaja cana minus pošlina», cana nafty dla nas budzie raści.
«Tamu my ličym, što raz umovy, jakija byli vyznačany pry stvareńni JEAES, paharšacca nie pavinny, to kampiensacyja vyznačajecca dosyć prosta — roźnica vyvaznych pošlin (u paraŭnańni z 2018-m hodam) pamnožanaja na abjom nafty. Heta pamier kampiensacyi. Pry košcie barala nafty kala 70 dalaraŭ heta krychu bolš za 300 młn dalaraŭ u hod. Pryčym suma raście — kožny hod pa 300 młn dalaraŭ», — raspavioŭ Kijko.
Usiaho z ulikam strat NPZ sumu Biełaruś aceńvaje ŭ 10,8 młrd dalaraŭ za ŭvieś pieryjad.
Zaraz pieramovy na ŭzroŭni Minfinaŭ skončany, skazaŭ Kijko.
«Čakajem sustrečy kiraŭnikoŭ dziaržaŭ. My prykłali ŭsie namahańni, kab pieramovy minfinaŭ byli kanstruktyŭnymi. Pytańnie pačało abmiarkoŭvacca jašče ŭ červieni, i my da peŭnaha momantu dosyć kanstruktyŭna ŭzajemadziejničali», — udakładniŭ namieśnik ministra.
Abmiarkoŭvałasia dva varyjanty kampiensacyi, Biełaruś chacieła kampiensacyi praz canu nafty, Rasija — za mižbiudžetny tranśfiert, ale heta nie było pryncypovym roznahałośsiem.
«Užo ŭ vieraśni i kastryčniku pa inicyjatyvie rasijskaha boku jany spynilisia. Pytańnie vyjšła na ŭzrovień urada. Rasijski bok zabłakavaŭ hety praces — my ŭradam nie zmahli prapanavać rašeńni, jakija dapamahli b kančatkova vyznačycca ź miechanizmam kampiensacyi», — udakładniŭ jon.
Pryčyna nie ŭ tym, što, da prykładu, Biełaruś była suprać mižbiudžetnaha tranśfiertu, zapeŭniŭ Kijko.
Nahadajem, Biełaruś i Rasija abmiarkoŭvajuć miechanizm kampiensacyi biełaruskamu boku vypadajučych dachodaŭ z-za pačatku realizacyi padatkovaha manieŭru ŭ naftavaj śfiery. Na praciahu šaści hadoŭ hłabalnyja straty dla Biełarusi składuć kala 10 młrd dalaraŭ. Krainie budzie składana samoj kampiensavać źnikajučyja prybytki, zajaviŭ namieśnik ministra finansaŭ Andrej Biełkaviec.
