Asoby hoda: Pavieł Biełavus, Siarhiej Rumas, Nizkiz
«Naša Niva» tradycyjna nazyvaje ludziej, dziakujučy jakim hety hod zapomnicca i ŭvojdzie ŭ historyju.
Arhanizatar hoda — Pavieł Biełavus
Pavieł Biełavus. Fota facebook.com.
Śviatkavańnie 100-hodździa BNR było adnoj z najbolš zapaminalnych padziej hoda. Dziasiatki tysiač ludziej sabralisia ŭ centry stalicy, kab zaśviedčyć svaju addanaść ideałam niezaležnaści. Usiaho hetaha mahło b nie być, kab nie arhanizatarski talent pradprymalnika i mieniedžara kultury Paŭła Biełavusa.
Mienavita dyrektar kramy symbal.by uziaŭ na siabie arhanizatarskija funkcyi. U vyniku byŭ zapuščany kraŭdfandynh na śviatkavańnie Dnia Voli. Ludzi skidvalisia kolki mahli: niechta 5 rubloŭ, niechta 3 tysiačy. Atrymałasia i kancert pravieści, i zabaŭlalnuju prahramu arhanizavać, i fudkorty pracavali. I ludziej da Opiernaha teatra pryjšło vielmi šmat. Jubilejnaja data nie prajšła niezaŭvažanaj. Dapamahali ŭ arhanizacyi błohiery Eduard Palčys i Anton Matolka.
Čamu Biełavusa my vyłučyli asobna? Užo čatyry hady pracuje jaho krama symbal.by, u vialikaj stupieni dziakujučy namahańniam hetaj inicyjatyvy ŭ krainie źjaviłasia moda na ŭsio biełaruskaje: Adzieńnie, zaplečniki, hadzińniki, upryhožańni. Biełaruskaje moža być modnym i sučasnym.
Inicyjatyva hoda — Hleb Łabadzienka
Hleb Łabadzienka. Fota Nastaśsi Chrałovič.
Šviejcarskija biełarusy letaś uziali i chutka naźbirali hrošy na ŭstalavańnie ŭ siabie pomnika Tadevušu Kaściušku. A voś na radzimie kiraŭnika paŭstańnia 1794 hoda takoha pomnika nie było da apošniaha. I tut spravu ŭ svaje ruki ŭziaŭ žurnalist Hleb Łabadzienka.
Jamu imkliva ŭdałosia naźbirać nieabchodnyja 22 tysiačy rubloŭ, damovicca sa skulptarami, potym z uładami, kab jany dali svajo dabro. U vyniku ad momantu pačatku kampanii da jaje zaviaršeńnia z adkryćciom u Mieračoŭščynie prajšło krychu bolš za paŭhoda. Kaśmičnyja tempy, jak dla sučasnaj Biełarusi.
Nie chaciełasia b, kab na hetym padobnyja inicyjatyvy zahłuchali. Nie adnamu Kaściušku nie było pomnikaŭ u Biełarusi. A prykład Łabadzienki pakazvaje, što ludzi hatovyja ŭkładać hrošy ŭ svaich hierojaŭ. Dy i ŭłady adkrytyja da dyjałohu.
Zmahary hoda — Pavieł Sieviaryniec, Hanna Šapućka i inšyja abaroncy Kurapataŭ
Abaroncy Kurapataŭ. Fota Voli Aficeravaj.
Ad pačatku leta ŭ Kurapatach horača: narešcie zapracavaŭ restaran. Jaho ŭłaśniki ŭsio ž nie advažalisia dać jamu nazvu «Bulbaš-choł», ale ŭstanova ŭsio adno zajmieła zabaŭlalny charaktar. Pić, tancavać, zapuskać fiejervierki la miesca rasstrełu tysiač ludziej — mnohija paličyli heta bluźnierstvam.
Viadomy biznesmien Viktar Prakapienia rašuča zajaviŭ, što nivodzin ajcišnik u «Pajedziem, pajadzim» nie zavitaje. Navat staršyńka CVK Lidzija Jarmošyna i taja skazała, što nahi jaje nie budzie ŭ hetaj ustanovie.
Štodnia la «Pajedziem, pajadzim» praciahvajecca vachta aktyvistaŭ, jakuju pačali Pavieł Sieviaryniec i Hanna Šapućka. Ludzi stajali i pad soncam, i ŭ maroz, i ŭ zalevu, i ŭ škvalisty viecier.
Ułaśniki zryvalisia na ich, byli bojki, sutyčki. Ale ludzi stajali pad bieł-čyrvona-biełymi ściahami. Ułada starajecca nie ŭmiešvacca ŭ hety kanflikt, maŭčyć Łukašenka. Chacia ŭsio ž nie moža być na baku pratestoŭcaŭ — Sieviarynca, Urbanoviča i inšych čas ad času sadžajuć na sutki.
U cełym ža restaran «Pajedziem, pajadzim» isnuje amal biez klijentaŭ. I kali sprava tak praciahniecca dalej, to Sieviaryniec i kampanija sapraŭdy mohuć atrymać pieramohu.
Učynak hoda — Michaił Hramyka
Michaił Hramyka. Fota Voli Aficeravaj.
U adzin ź lipieńskich viečaroŭ da vachty ŭ Kurapatach dałučyŭsia mužčyna, jaki nazvaŭsia milicyjantam. I heta akazałasia poŭnaj praŭdaj. 44-hadovy Michaił Hramyka na toj momant pracavaŭ u centry izalacyi pravaparušalnikaŭ na Akreścina — tam, kudy sadžajuć zatrymanych na sutki.
U milicyi samavolstva Hramyki nie daravali. Amal adrazu jaho aryštavali na 10 sutak, a paśla zvolnili z orhanaŭ. Sam mužčyna nie škaduje pra svoj učynak. Kaža, što rabić inakš nie dazvalaŭ honar.
«Ja milicyjant niezaležnaj krainy, a Šunievič niachaj i dalej pierapranajecca ŭ formu NKVD», — skazaŭ jon u intervju «NN». Za takuju milicyju jaŭna nie soramna.
Piśmieńnik hoda — Uładzimir Arłoŭ
Uładzimir Arłoŭ. Fota Siarhieja Hudzilina.
Apošnija hady Arłova nie adniasieš da modnych piśmienńnikaŭ. Jon nie siadzić u fejsbuku, nie haduje kazu, nie spračajecca pra hiendar i ŁHBT, ale štoraz jahonyja knihi mastackija i histaryčnyja stanoviacca chitami prodažaŭ. Arłoŭ — heta znak jakaści, toj, u kim nie rasčaruješsia.
Sioleta Hiedrojca atrymaŭ mienavita Uładzimir Arłoŭ za knihu «Tancy nad horadam». I, mabyć, ni ŭ kaho nie ŭźnikaje žadańnia kinuć kamień u pracu žury. Usie viedajuć, što kiepskaha Arłoŭ nie napiša.
Miem hod — haradavy
Ihar Šunievič (źleva) na adkryćci pomnika haradavomu.
Mała jakija abjekty ŭ krainie achoŭvajucca tak, jak heta robiać z skulpturaj haradavoha, jaki staić pobač z budynkam Ministerstva ŭnutranych spravaŭ. Minski padletak Arsienij, prachodziačy mima, daŭ pleskača pa bronzavym tvary haradavoha. Milicyja nie prosta złaviła chłopca, ale i prymusiła vybačycca na kamieru pierad… pomnikam. Zdavałasia b, absurd, ale byvaje i takoje. U vyniku efiekt atrymaŭsia advarotnym. Ludzi ŭ sacsietkach pačali masava kpić i iranizavać z hetaj situacyi. To šalik naviazvali haradavomu, to prychodzili całavać. U vyniku za takuju niaŭdałuju pijar-akcyju byŭ zvolnieny pres-sakratar MUS Hieorhij Jaŭčar. Chacia potym Šunievič skazaŭ, što heta była jahonaja inicyjatyva. Skulptura haradavoha časoŭ Rasijskaj impieryi ciapier čaściej usprymajecca jak aniekdot.
Miecenat hoda — Viktar Babaryka
Viktar Babaryka. Fota Siarhieja Hudzilina.
My ŭžo nie pieršy raz tak nazyvajem spadara Viktara, ale jon štohod daje dobry prykład dla inšych bahatych ludziej hetaj krainy. Babaryku ŭdałosia zrabić niaprostaje. «Biełhazprambank» nie ŭsprymajecca niehatyŭna ŭ hramadstvie. I heta najpierš praz kulturnuju dziejnaść staršyni praŭleńnia.
Sioleta «Biełhazprambank» spansavaŭ biełaruskamoŭnaje vydańnie tvoraŭ Śviatłany Aleksijevič. Zrabiŭ heta dla taho, kab knihi našaha nobieleŭskaha łaŭreata možna było znajści ŭ školnych biblijatekach krainy.
Dziakujučy Babaryku, zapracavała kulturnaja prastora Ok16, jakaja prymaje ŭ siabie mnohija kulturnyja imprezy. Bank układajecca ŭ mastackija fiestyvali i vystavy.
Antyhieroj hoda — Arkadź Izrailevič
Arkadź Izrailevič.
Pra heta biznesoŭca jašče viasnoj čuŭ mała chto, chiba što stvaralniki rejtynha «Ježiednievnika», ale Izrailevič zrabiŭ usio, kab jaho imia pačało nasić niehatyŭnuju afarboŭku. Izrailevič śćviardžaje, što nie ŭkładvaŭ svaich hrošaj u budaŭnictva «Pajedziem, pajadzim», ale jon staŭ aktyŭnym abaroncam ustanovy.
Izrailevič padavaŭ u sud na hazietu «Novy čas», ale z treskam prajhraŭ spravu, radavaŭsia, kali na sutki sadžali Paŭła Sieviarynca, asabista biŭsia z abaroncami, zajmaŭ na parkoŭcy miesca dla invalidaŭ. U intervju vykazvaŭsia, što, mahčyma, u Kurapatach lažać tyja, kaho i varta było rasstralać. Jon staŭ vielmi miedyjnaj asobaj, dajučy ŭsim kamientary. U presie źjavilisia navat zdymki ź viasiella Izraileviča ŭ tureckaj Antalji, kudy jon zaprašaŭ hurt «Ivanuški».
U kancy hoda Izrailevič nienadoŭha apynuŭsia ŭ SIZA KDB. Abvinavačvańniaŭ jamu tak i nie vystavili, ale pavodzić siabie biznesoviec staŭ paśla hetaha vielmi cicha.
Premjer hoda — Siarhiej Rumas
Siarhiej Rumas. Fota Siarhieja Hudzilina.
U asobie Rumasa Biełaruś zajmieła kiraŭnika ŭrada z «čałaviečym tvaram». Rumas — bankir, rynačnik, futbolny zaŭziatar, baćka čatyroch synoŭ. Rumas nie vyklikaje ŭ ludziej niehatyŭnych pačućciaŭ.
Praŭda, zadačy pierad novym premjeram stajać, jak zaŭsiody, nie samyja lohkija: pavysić siarednija zarobki, reanimavać pradpryjemstvy, padniać sielskuju haspadarku, damovicca z Rasijaj pra novyja źnižki. Ci adužaje?
Niekali Rumas, budučy kiraŭnikom fiederacyi futboła, dabiŭsia, kab na matčach nie aryštoŭvali ludziej z nacyjanalnaj simvolikaj. Sioleta na ŭručeńni pryzoŭ najlepšym hulcam hoda premjer pramaŭlaŭ pa-biełarusku. Jahony prykład pieraniaŭ i ministr sportu Siarhiej Kavalčuk.
Muzyki hoda — Nizkiz
Hurt Nizkiz. Fota music.yandex.ru.
Mahiloŭski hurt źbiraje poŭnyja kłuby va ŭsich abłasnych centrach krainy. Ich muzyka stała paznavalnaj. Na «Lidbiry» Nizkiz pryniali kudy bolš ciopła za zornych rasijan z «Enimał Džaz». Muzyki dajuć kancerty i ŭ Rasii, ale nie vyrakajucca biełaruskaj movy. Nizkiz byli siarod tych, chto vystupiŭ na kancercie na Dzień Voli, kali mnohija inšyja ci to spałochalisia, ci to nie zachacieli. Nizkiz — hałoŭny praryŭ u našaj muzycy sioleta.
Zvalnieńnie hoda — Ivan Šyła
Ivan Šyła.
Skandalnym atrymaŭsia sychod z telekanała «Biełsat» smm-ščyka Ivana Šyły. U svaim fejsbuku jon pažartavaŭ sa zdymka prezidenta Polščy Andžeja Dudy, jaki stajaŭ, kali Donald Tramp siadzieŭ u kreśle. «Źleva — prezident Polščy», — napisaŭ Šyła. U vyniku kiraŭnictva telekanała paraiła jamu «valić u Biełaruś i tam nasałodžvacca svabodaj słova». Na nastupny dzień Šyłu zvolnili z telekanała. Pra zvalnieńnie supracoŭnika «Biełsata» napisali najbujniejšyja ŚMI śvietu.
Sychody hoda — Kulinkovič, Aniempadystaŭ, Lipaj, Kapski
Aleś Lipaj. Fota BiełaPAN.
U 2018 z žyćcia syšli jašče maładyja mužčyny. Zimoj syšoŭ paet i aŭtar «Narodnaha albomu» Michał Aniempadystaŭ. Naprykancy leta ad pnieŭmanii syšoŭ lidar hurta «Niejra Dziubiel» Alaksandr Kulinkovič.
Nie stała zasnavalnika BiełaPAN Alesia Lipaja, jakoha pierad hetym presavali pa spravie ab niaspłacie padatkaŭ. Zdaroŭja Lipaju heta nie dadało. Ź Lipaja pačynałasia niezaležnaja žurnalistyka.
U pačatku vosieni syšoŭ z žyćcia hienieralny dyrektar futbolnaha kłuba BATE Anatol Kapski. Mienavita dziakujučy jamu biełaruski kłub kolki hadoŭ hulaŭ u hrupavych etapach Lihi čempijonaŭ i Lihi Jeŭropy.
Spartsmienka hoda — Aryna Sabalenka
Aryna Sabalenka.
Nie Azarankaj adzinaj. U biełaruskim žanočym tenisie znoŭ źjaviłasia zorka. 20-hadovaja Aryna Sabalenka sioleta vyjhrała dva pieršych turniry WTA ŭ karjery, a taksama spyniłasia za krok ad pieršaj dziasiatki suśvietnaha tenisa. Nastupny siezon dla Sabalenki pavinien skłaścisia jašče bolš udała. Spartsmienka tolki pačynaje prahresavać i nabirać abaroty.
