Vice-premjer Ukrainy: Niaŭpeŭnienaść ES adnosna pierśpiektyŭ siabroŭstva Ukrainy ihraje na ruku papulistam
Piać hadoŭ tamu va Ukrainie pačaŭsia Jeŭramajdan — masavy ruch, jaki vystupaŭ za padpisańnie Ukrainaj Pahadnieńnia ab asacyjacyi ź Jeŭrapiejskim sajuzam.
Niahledziačy na pieramohu Jeŭramajdana i padpisańnie pahadnieńnia, pierśpiektyvy paŭnapraŭnaha siabroŭstva Ukrainy ŭ ES zastajucca ćmianymi. Top-čynoŭniki ES zajaŭlajuć, što pytańnie siabroŭstva Ukrainy nie staić na paradku dnia navat u siarednieterminovaj pierśpiektyvie. Častka hramadzian Ukrainy, jakija mieli zavyšanyja čakańni ad asacyjacyi ź ES i spadziavalisia na paŭnapraŭnaje siabroŭstva, adčuvajuć siabie padmanutymi.
«Naša Niva» ŭ hutarcy ź vice-premjeram Ukrainy pa pytańniach jeŭrapiejskaj i jeŭraatłantyčnaj intehracyi Ivanaj Klimpuš-Cyncadze vyśviatlała, ci nie dematyvuje adsutnaść pierśpiektyŭ siabroŭstva Ukrainy ŭ ES ukrainskija ŭłady i hramadstva na praviadzieńnie reformaŭ, jakija, šmat u čym, pravodziacca pa rekamiendacyjach samoha ES.
Vice-premjer Ukrainy pa pytańniach jeŭrapiejskaj i jeŭraatłantyčnaj intehracyi Ivana Klimpuš-Cyncadze.
Vice-premjer zajaviła, što niaŭpeŭnienaść ES adnosna jeŭrapiejskaj budučyni Ukrainy ŭskładniaje dziejnaść i zabiraje arhumienty ŭ prychilnikaŭ jeŭraintehracyi va Ukrainie, a taksama źjaŭlajecca pažyŭnym asiarodździem dla papulistaŭ.
«Idzie vajna, ludzi stamilisia, idzie składany praces transfarmacyi. Ludzi źniasilenyja, jany šukajuć prostyja adkazy na składanyja pytańni. Tamu papulizm va Ukrainie maje spryjalnuju hlebu»,
— skazała Klimpuš-Cyncadze.
Adnak jana ličyć, što pryncypova nieabchodna pabudavać Jeŭropu va Ukrainie, kab ni ŭ kaho nie było takich pytańniaŭ, ci pavinna Ukraina stanavicca siabram ES abo nie.
Na zaŭvahu karespandenta NN, što pierśpiektyvy siabroŭstva krainy ŭ ES zaležać nie tolki ad samoj Ukrainy, ale i ad unutranaha stanovišča ŭ ES, jaki siońnia abjektyŭna nie hatovy da pašyreńnia, vice-premjer zajaviła, što paśla składanych vyprabavańniaŭ, źviazanych z BREXIT'am i mihracyjnym kryzisam, moc Jeŭrapiejskaha sajuza budzie tolki pavialičvacca.
«Tym bolš, my bačym roznyja mahčymaści, jakija zakładzieny ŭžo isnujučym Pahadnieńniem ab asacyjacyi adnosna siektaralnaj intehracyi Ukrainy ŭ jeŭrapiejskija rynki. Kali my budziem častkaj roznych miechanizmaŭ, jakija biez nas buduć horš funkcyjanavać, vidavočna, pytańnie jeŭraintehracyi vyrašycca», — skazała vice-premjer.
Jana pryznała, što šmat u čym heta palityčnaje pytańnie, a taksama vykazała ŭpeŭnienaść, što apietyt dla pašyreńnia ŭ ES jość — Klimpuš-Cyncadze nahadała pra stratehiju Jeŭrasajuza adnosna intehracyi Zachodnich Bałkan.
«Heta značyć, što ŭ nas jość absalutna ŭsie mahčymaści pretendavać na siabroŭstva ŭ ES», — padahulniła Ivana Klimpuš-Cyncadze.