Hienprakuror Kaniuk: Sumy praterminavanych daŭhoŭ pa ekspartnych pastaŭkach u Rasiju skłali $189 miljonaŭ
Alaksandr Kaniuk. Fota pasolstva Biełarusi ŭ Rasii
Sumy praterminavanych abaviazacielstvaŭ pa ekspartnych pastaŭkach u Rasiju skłali $189 miljonaŭ. Takija ličby hienprakuror Biełarusi Alaksandr Kaniuk pryvioŭ siońnia ŭ Maskvie na naradzie z kiraŭnikami subjektaŭ tavarapravodnaj sietki biełaruskich pradpryjemstvaŭ, pieradaje BIEŁTA.
Havorka išła ab skaračeńni praterminavanaj debitorskaj zapazyčanaści i viartańni valutnaj vyručki ŭ Biełaruś.
Alaksandr Kaniuk nahadaŭ, što z 2015 hoda praviedziena bolš za 470 pravierak vykanańnia zakanadaŭstva ab źniešnieekanamičnaj dziejnaści, 477 słužbovych asob pryciahnutyja da dyscyplinarnaj i materyjalnaj adkaznaści. raspačata 85 kryminalnych spraŭ, 26 ź ich — u dačynieńni da zamiežnych hramadzian.
Tak, pa słovach hienprakurora, biełaruski małočny zavod pastaviŭ svaju pradukcyju ŭ Sankt-Pieciarburh na adras struktury, da hetaha pryznanaj bankrutam.
Naniesienaja škoda aceńvajecca ŭ pamiery $500 tysiač. Hienprakuror dadaŭ, što ŭ machlarskuju schiemu z pastaŭkami hetaj ža sankt-pieciarburhskaj struktury, jak vyśvietliłasia, akazalisia zaviazanyja i niekatoryja inšyja biełaruskija miasa- i małakapierapracoŭčyja pradpryjemstvy. Ahulny pamier škody skłaŭ $1,5 miljona.
Havoračy ab ciapierašniaj situacyi, hienprakuror adznačyŭ, što bolš za 40% ad ahulnaj sumy praterminavanych abaviazacielstvaŭ pa ekspartnych pastaŭkach ($189 miljonaŭ) prypadaje na arhanizacyi Rasijskaj Fiederacyi.
Pałova praterminavanaj debitorskaj zapazyčanaści prypadaje na pradpryjemstvy Ministerstva pramysłovaści Biełarusi. Naściarožvaje taksama rost praterminavanaj zapazyčanaści ŭ pradpryjemstvaŭ kancerna «Biełnaftachim», adznačyŭ hienprakuror.
U naradzie taksama ŭdzielničali vice-premjer Biełarusi Ihar Lašenka, pasoł Biełarusi ŭ Rasii Uładzimir Siamaška, ministr pramysłovaści Pavieł Uciupin, pradstaŭniki Ministerstva zamiežnych spraŭ, Ministerstva architektury i budaŭnictva. Byli zaprošanyja kiraŭniki raźmieščanych na terytoryi Rasii subjektaŭ tavarapravodnaj sietki (ź biełaruskim kapitałam) biełaruskich arhanizacyj-eksparcioraŭ (handlovyja damy, aficyjnyja dystrybjutary, pradstaŭnictvy, bujnyja dylery).
