Nacyjanalny instytut adukacyi: Jakaja pamyłka? Paŭstańnie Kalinoŭskaha pačałosia na etničnych polskich terytoryjach
Nacyjanalny instytut adukacyi daŭ aficyjny kamientar nakont situacyi sa skandalnym padručnikam pa ruskaj litaratury za 8 kłas.
Čytajcie: U novych padručnikach pa litaratury paŭstańnie Kalinoŭskaha nazvali «polskim». Siarod recenzientaŭ — aktyvisty fondu «Russkij mir»
«U navučalnym dapamožniku pa ruskaj litaratury dla 8 kłasa (aŭtary — S. Zacharava, T. Marozava, H. Cybulskaja) u raździele «Litaratura druhoj pałovy XIX stahodździa» paŭstańnie 1863—1864 hadoŭ zhadana jak «polskaje».
Pakolki paŭstańnie 1863—1864 hh. było arhanizavana i pačałosia na etničnych polskich (padkreślena śpiecyjalistami instytuta adukacyi — Red.) terytoryjach, a zatym raspaŭsiudziłasia na ziemli Litvy i Biełarusi, ličym, što infarmacyja ab dadzienym paŭstańni ŭ navučalnym dapamožniku, jaki nie praduhledžvaje zasvajeńnie źmiestu histaryčnaj adukacyi, nie źjaŭlajecca pamyłkaj.
Akramia taho, u adpaviednaści z vučebnaj prahramaj pa vučebnym pradmiecie «Historyja Biełarusi» paŭstańnie 1863—1864 hh. vyvučajecca ŭ toj ža čas, što i tema «Litaratura druhoj pałovy XIX stahodździa», što dazvalaje stvaryć u navučencaŭ poŭnaje i abjektyŭnaje ŭjaŭleńnie pra hety histaryčny pieryjad», — havorycca ŭ adkazie, atrymanym «Kamsamolskaj praŭdaj».
Nacyjanalny instytut adukacyi — ustanova, jakaja vydaje školnyja padručniki. Jaho dyrektarka — 50-hadovy historyk Valancina Hinčuk. Jana naradziłasia va Ukrainie, skončyła Minski dziaržaŭny piedahahičny instytut pa śpiecyjalnaści «historyja i zamiežnaja mova». Pracavała nastaŭnikam i zavučam u Ašmianach i Minsku. Z 2002 hoda pracuje ŭ Nacyjanalnym instytucie adukacyi. Nastaŭnik hoda — 1997.
Dyrektarka Nacyjanalnaha instytuta adukacyi Valancina Hinčuk. Fota adu.by
