12-hadovaja biełaruska vyjhrała ŭ ZŠA telekonkurs junych kucharaŭ
Amierykanka Niki Bidun stała pieramožcaj druhoha siezona konkursu TopChef Junior, jaki pakazvajuć na amierykanskim telekanale Universal Kids. U Niki biełaruskija karani, jaje mama naradziłasia ŭ našaj krainie, piša Tut.by sa spasyłkaj na New York Post.
U finale Bidun pryhatavała try stravy: sup ź pielmieniami, rahu z rebraŭ ź fietučyni i chatniaj rykotaj, a taksama limonnaje sufle. U vyniku jana vyjhrała 50 tysiač dalaraŭ.
Jaje supiernikami byli 12 chłopčykaŭ i dziaŭčynak va ŭzroście ad 10 da 13 hadoŭ.
Jak adznačaje vydańnie, dziaŭčynka pačała dapamahać baćkam na kuchni, kali joj było dva hady. Vuzkaja kuchnia, jakoj karystałasia jaje siamja, dazvoliła joj atrymać vialikuju pieravahu ŭ budučyni. «Kali vy možacie hatavać u telefonnaj budcy, vy možacie hatavać u lubym miescy», — žartuje Niki.
Dziaŭčynka — adzinaja dačka biełaruski Volhi, jakaja pracuje ahientam pa nieruchomaści, i amierykanca Majkła, jaki robić u śfiery finansaŭ. Darečy, na YouTube-kanale apošniaha možna znajści videa, jak dziaŭčynka hatuje pielmieni razam z babulaj u Biełarusi.
Hetyja ŭroki nie prajšli darma. «Ja lublu biełaruskuju ježu - heta siamiejnaje. Smak ježy nasyčany, šmat smažanaha. Ale pry hetym Ńju-Jork mianie raśpieščvaje, ja lublu hatavać absalutna ŭsio», - pryznavałasia dziaŭčynka ŭ adnym ź intervju. Jana ŭdakładniała, što hatuje lubyja stravy — ad biełaruskich da japonskich.
Pa słovach Niki, jana nie płanuje tracić vyjhranyja hrošy i ŭ budučyni maryć adkryć svoj restaran.
