Prakuratura cpyniła budoŭlu 25-paviarchovika pad Minskam. Zabudoŭščyk: «Łukašenka zahadaje znosić — źniasiem»
Kopišča — vioska pad Minskam, jakaja ŭščylnuju miažuje sa staličnym rajonam Uručča.
Kampanija «SI-trejdynh» buduje ŭ Kopiščy žyły kvartał «Urucki-2». Čarhovy sprajektavany abjekt ŭ im — 25-paviarchovy dom pobač z užo isnujučymi.
Budoŭla ŭžo pačałasia, kvatery raspradali zahadzia, ale prakuratura pastanaviła — pabudovy źnieści, ziamlu vyzvalić. Jak tak atrymałasia?
«SI-trejdynh» spačatku źbiraŭsia budavać 16-paviarchovik, paźniej vyrašyli zamachnucca až na 25 pavierchaŭ. Pabudavali padziemny parkinh — i pakul usio.
Budoŭla nie spadabałasia miascovym žycharam. Novy dom sapraŭdy musiŭ paŭstać nadta ščylna da inšych, a nijakaha hramadskaha abmierkavańnia nie było.
Zabudoŭščyk pačaŭ zahadzia pradavać kvatery, a miascovyja žychary pačali pisać skarhi.
Prakuratura praviała pravierku i znajšła, što nadzieł vykarystoŭvajecca niametava. Vypisali pastanovu — budoŭlu spynić, a toje, što ŭžo pabudavali — źnieści.
A jak tak? I što budzie z kvaterami, jakija ŭžo nabyli budučyja žychary?
Dyrektar kampanii-zabudoŭščyka kaža, što vina nie na ich, a na vykankamie Minskaha rajona.
«Atrymałasia pamyłka. Vykankam Minskaha rajona — kalehijalny orhan, i tam jurydyčnaja słužba nieŭvažliva pačytała dakumienty. My atrymali dva nadzieły. Zaprasili dazvoł na prajektnyja pracy na nadziełach. Nam dazvolili. My zrabili prajekt, prajšli ekśpiertyzy. I atrymali dazvoł na hetych dvuch nadziełach budavać. Ale vyśvietliłasia, što heta «niametavaje vykarystoŭvańnie nadzieła», bo my budujem dom №35, a tam pa papierach musić być tolki №32. Treba było adkarektavać dakumienty vykankama, dapisać, što tam buduć damy i №32, i №35, a jon hetaha nie zrabiŭ. I taki kazus», — tłumačyć Mikałaj Vaškievič, dyrektar «SI-trejdynh».
Vaškievič kaža, što skarhi tut ni pryčym, jany, maŭlaŭ, pastajanna pišucca:
«Jość takaja katehoryja hramadzian, jakija pastajanna pišuć. Spačatku pišuć, što niama miescaŭ dla parkoŭki. My atrymali dazvoł na budoŭlu parkinha, pačynajem rasčyščać terytoryju —tyja ž ludzi pišuć novyja skarhi, što my piłujem drevy».
Pakupnikoŭ kvater Vaškievič supakojvaje, kaža, hrošy addaduć usim, užo pačali. A los budoŭli ciapier budzie vyrašać Łukašenka.
«Pakul znosić nie budziem. Napisali prezidentu list. Pa zakonie pamyłku vykankama moža vypravić tolki jon. Skaža znosić — budziem znosić. Skaža budavać — budziem budavać».
