Pieršy ŭ Biełarusi daviednik pa nacyjanalnaj hastranomii vydaduć praz kraŭdfandynh
Na kraŭdfandynhavaj płatformie Ulej.by startavaŭ novy prajekt «Biełorusskaja kuchnia. Hastronomičieskij putievoditiel» ad vydaviectva «Reniesans Pablišynh».
Pra daviednik
Novaje vydańnie pryśviečanaje bahataj histaryčnaj spadčynie biełaruskaj kuchni: bolš za 40 straŭ i 8 napojaŭ, ich recepty i historyi ŭźniknieńnia.
Nad daviednikam u kamandzie vydaviectva pracuje viadomy ekśpiert hastranamičnaj historyi Biełarusi Aleś Bieły. Jon napisaŭ nie adnu knihu na temu biełaruskaha kulinarnaj spadčyny, ale hetaja praca adroźnivajecca ad inšych, tamu što maje nie tolki adukacyjnaje, ale i prykładnoje značeńnie. Aproč historyi i receptaŭ, tut sabranyja restarany, ahrasiadziby i pryvatnyja majstry, jakija adradžajuć biełaruskija tradycyi syrarobstva, chlebapiačeńnia, pivavarstva i pieraasensoŭvajuć nacyjanalnyja stravy.
— Nacyja pavinna čymści abjadnoŭvacca. I na moj pohlad, raźvićcio kultury i tradycyj (a kuchnia - nieadjemnaja častka tradycyj i kultury) — heta vydatnaja asnova! Hetym prajektam my pačynajem cykł inicyjatyŭ pa adradžeńni nacyjanalnaj samaśviadomaści biełarusaŭ, — adznačyŭ kiraŭnik vydaviectva «Reniesans Pablišynh» Uładzimir Piłat.
Struktura daviednika
Pieršaja častka hastranamičnaha daviednika pryśviečana aŭtentyčnym i važnym u biełaruskaj spadčynie stravam. Usiaho ŭ hetym «mieniu» ich bolš za sorak. Druhaja častka paznajomić ź biełaruskimi napojami, biezałkaholnymi i ałkaholnymi. Starka, zubroŭka, raznastajnyja nastojki, biarozavik i navat kava — jakimi jany byli ŭ minułym i što stałasia ciapier.
Vydańnie imkniecca da taho, kab raźviejać stereatypy pra vyklučana viaskovaje minułaje biełaruskaj kuchni i jaje adnastajnaść i pakazać žyćciazdolnaść «starych» receptaŭ u śviecie sučasnaj hastranomii. Unikalnaja častka prajekta, jaje samyja malaŭničyja i apietytnyja zamaloŭki pryśviečany hastraparam — spałučeńniam tradycyjnych straŭ z trendavymi siońnia napojami.
Kali čakajecca vychad
Daviednik pa biełaruskaj kuchni budzie poŭnakalarovym vydańniem na krejdavanaj matavaj papiery farmatam 170ch225 mm, u miakkaj łaminavanaj vokładcy sa śpiecyjalnym advarotam, jakija vykonvajuć funkcyju zručnaj zakładki. Vychad novaha vydańnia płanujecca na kaniec śniežnia 2018 hoda.
Paspryjać raźvićciu nacyjanalnaj hastranomii i viartańniu jaje skarbaŭ možna, paŭdzielničaŭšy ŭ kraŭdfandynh-kampanii na Ulej.by i zamoviŭšy ekzemplar u asabistuju biblijateku abo ŭ padarunak (asablivaja padarunkavaja ŭpakoŭka).
Taksama prajekt «Biełorusskaja kuchnia. Hastronomičieskij putievoditiel» zaprašaje da supracoŭnictva kaviarni, restarany, ahrasiadziby i inšyja kampanii, nieabyjakavyja da biełaruskaj historyi i kultury.
