Ceny na naftu abrynulisia, ale rasijski rubiel trymajecca. Ci nadoŭha?
Na naftavym rynku praciahvajecca spad kacirovak. Analityki abmiarkoŭvajuć, ci mahčyma paŭtor situacyi 2014 hoda, kali ceny na naftu abrynulisia ŭ dva razy - i śledam adbyŭsia abvał rubla, piša bbc.com.
Rasijski centrabank ličyć, što źnižeńnie kacirovak da 35 dalaraŭ małavierahodna, ale papiaredžvaje, što inflacyja ŭ hetym vypadku budzie dvuchznačnaj.
Na tarhach 20 listapada kaciroŭki ŭpali na rekordnyja 7% da 62 dalaraŭ. Syravina tańnieje z pačatku kastryčnika, kali ceny dasiahnuli pika ŭ 85 dalaraŭ.
Što budzie z rublom?
Rasijski rubiel dosyć ustojliva adreahavaŭ na abvał naftavych kacirovak, adznačajecca ŭ spravazdačy «VTB Kapitał». Na tarhach 20 listapada kurs dalara na Maskoŭskaj biržy vyras na 0,7% da 66,2 rubla, kurs jeŭra pavialičyŭsia na 0,1% da 75,2 rubla.
«Dumaju, što ŭ karotkaterminovaj pierśpiektyvie rasijanam nie varta chvalavacca, pakolki suviaź pamiž rublom i naftaj u apošni čas značna asłabła, — kaža hałoŭny ekanamist banka «Urałsib» Alaksiej Dziaviataŭ. — Ź inšaha boku, mnohija zamiežnyja inviestary, jakija inviestavali ŭ šyroki kłas rublovych aktyvaŭ, syšli. Zastalisia najbolš ustojlivyja, najbolš doŭhaterminovyja inviestary, i jany taksama adčuvalna reahujuć na naftavyja ceny».
Čamu tańnieje nafta?
Spad na tarhach 20 listapada staŭ rekordnym, adznačaje «Urałsib» u svajoj spravazdačy. Vidavočnych tryhieraŭ dla takoha rezkaha abvału nie było, kaža hałoŭny ekanamist banka Alaksiej Dziaviataŭ: «Pa ŭsioj bačnaści, heta davoli spantanny ruch rynku, i jon źviazany z tym, što mnohija inviestary zaniepakojenyja pierśpiektyvaj lišku prapanovy nafty na rynku».
Taksama ceny mohuć padać u suviazi z pavieličeńniem zapasaŭ i zdabyčy ŭ ZŠA, havorycca ŭ spravazdačy banka «Nardea». Zapasy syraviny rastuć vosiem tydniaŭ zapar.
Aściaroha nakont lišku nafty źjaviłasia paśla publikacyi ŭ pačatku kastryčnika paviedamleńniaŭ pra toje, što Saudaŭskaja Aravija i Rasija damovilisia pavialičyć zdabyču syraviny, kab spynić rost cen (zanadta darahaja nafta nie vyhadnaja u tym liku i vytvorcam, jak pryznavaŭ prezident Rasii Uładzimir Pucin). Tady kaciroŭki dasiahnuli 85 dalaraŭ - i paśla hetaha pačaŭsia spad.
Pačatak spadu naftavych kacirovak analityki tłumačyli taksama aściarohami taho, što suśvietny ekanamičny rost zapavolvajecca. Hetyja aściarohi zachoŭvajucca i siońnia.
Kali skončycca spad?
Jašče adnym faktaram ŭpłyvu na nastroi inviestaraŭ mahli stać zajavy Donalda Trampa, jaki 20 listapada vykazaŭ padtrymku uładam Saudaŭskaj Aravii, padazravanym u zabojstvie saudaŭskaha žurnalista Chašohi ŭ Turcyi. Tramp napisaŭ, što naśledny prync Saudaŭskaj Aravii Muchamied bin Sałman moh i nie viedać ab padrychtoŭcy zabojstva.
Pry hetym Tramp raniej prasiŭ Saudaŭskuju Araviju i APIEK nie skaračać zdabyču, kab ceny na naftu źnižalisia i dalej. U takoj situacyi, ličać analityki, kali Saudaŭskaja Aravija zachoča skaracić zdabyču, kab spynić spad cen, naŭrad ci jana pojdzie na taki krok, jaki moža źniervavać jaje sajuźnika. Heta ŭsprymajecca rynkami jak sihnał da dalejšaha źnižeńnia cen.
Udzielniki rynka čakajuć 6 śniežnia, kali pavinna adbycca čarhovaje pasiadžeńnie APIEK. Inviestary aścierahajucca, što vytvorcy nie buduć skaračać zdabyču, i tady jość ryzyka, što paŭtorycca situacyja listapada 2014 hoda, piša Bloomberg. Tady Saudaŭskaja Aravija zabłakavała płany pa źnižeńni vytvorčaści, i spad cen praciahnuŭsia. Kaciroŭki ŭpali z 71 dalara da 35 dalaraŭ da pačatku 2016 hoda.
Prezident Rasii Uładzimir Pucin kamientavaŭ mahčymaje skaračeńnie vytvorčaści nafty 13 listapada. Jon nie skazaŭ, ci hatovaja Rasija pajści na źnižeńnie zdabyčy, ale adznačyŭ, što ciapierašniaja cana - tady heta było kala 70 dalaraŭ - Kreml całkam zadavalniaje. Rasijski biudžet budzie zbałansavany pry canie ad 40 dalaraŭ.
Ahienctva «Rejter» pisała sa spasyłkaj na nienazvanych vysokich čynoŭnikaŭ, što na hety raz Rasija nie choča źnižać zdabyču.
