Žančyna z Horak trapiła ŭ kałoniju: nie addała psichatropy, jakija zastalisia paśla śmierci muža
Žycharka Horak Alena paśla śmierci muža, chvoraha na ankałohiju, vyrašyła pakinuć sabie jaho leki. Skončyłasia ŭsio sumna.
Padrabiaznaści raspaviadaje miascovy partał horki.info.
Muž Aleny u 2016 hodzie daviedaŭsia, što chvory na rak u 4 stadyi. Pačaŭ atrymlivać «tramadoł» — mocnaje abiazbolvalnaje, jakoje pryroŭniena da psichatropaŭ. Daktary vydavali recepty spačatku mužu, paśla Alenie. Žančynu papiaredzili: kali muž nie vyžyvie, leki, jakija zastanucca, abaviazkova treba viarnuć u balnicu.
U kancy hoda muž skanaŭ. Ale Alena častku lekaŭ vykinuła, a «Tramadoł» vyrašyła pakinuć sabie. Vykarystoŭvała jaho, kab źniać bol u nahach.
Navat prapanoŭvała pačastavacca svajačcy, praŭda, taja admoviłasia. Vykarystoŭvała Alena i tabletki, i navat ampuły.
Ale ŭžo ŭ krasaviku 2017 hoda da žančyny zavitała milicyja — siamju žančyny praviarali, bo Alena mieła prablemy z ałkaholem i siamja ličyłasia ŭ sacyjalna niebiaśpiečnym stanoviščy. Padčas adnoj z takich pravierak i zaŭvažyli pustuju ampułu ŭ śmietnicy.
Ahułam u Aleny znajšli 60 ampuł i 210 tabletak «Tramadoła», a taksama «Deksamietazon».
Žančynu zatrymali i sudzili. Na sudzie jana śćviardžała, što nie viedała nijakich praviłaŭ abychodžańnia z padobnymi miedycynskimi rečyvami.
U vyniku traich dziaciej u žančyny zabrali. Samu jaje asudzili na 2 hady kałonii ahulnaha režymu. U kałonii žančynu buduć prymusova lačyć ad ałkahalizmu.
