Vzhlad: Paśla zapusku AES Biełaruś vymušanaja budzie inviestavać vializnyja srodki ŭ pieravod kacielniaŭ z hazaŭ na elektryčnaść
Rasijskaje vydańnie «Vzhlad» vyrašyła praanalizavać, kudy Biełaruś mahła b padzieć liški elektraenierhii paśla pačatku ekspłuatacyi Biełaruskaj AES.
Prablema sapraŭdy surjoznaja. Uskładniajecca jana tym, što spažyvańnie elektraenierhii ŭ Biełarusi vyrasła nie tak značna, jak hetaha chaciełasia siem hadoŭ tamu, dy i Litva kateharyčna admoviłasia kuplać elektryčnaść ź Biełaruskaj AES.
«Tady prahnazavali davieści spažyvańnie da 47 młrd kVt·hadzinu, adnak u realnaści niedaciahvaje i da 40 młrd kVt·hadzina. Rost ekanomiki idzie nie tymi tempami, jakija byli zapłanavany ŭ 2011 hodzie», — kaža ŭ kamientary «Vzhladu» Alaksiej Anpiłohaŭ, jaki šmat hadoŭ pracavaŭ va ŭkrainskaj atamnaj enierhietycy.
U teoryi pradavać elektraenierhiju možna było b Ukrainie. Z adnaho boku, płany pa madernizacyi i budaŭnictvie novych AES va Ukrainie faktyčna zamarožanyja. Z druhoha boku, elektraspažyvańnie va Ukrainie padaje.
«Akramia taho, Ukrainie kali i budzie patrebna dadatkovaja elektraenierhija, to ŭ hadziny pik, tady jak Biełarusi treba kudy-niebudź padzieć načnuju elektraenierhiju. Heta tak zvanaja prablema načnoha minimumu, jakaja abvostrycca z zapuskam atamnaj stancyi. AES niemahčyma razhružać u sutačnym režymie — i dniom, i nočču budzie adna i taja ž nahruzka, vahańni mahutnaści nie bolš za pracent», — kaža staršy ekśpiert fondu «Instytut enierhietyki i finansaŭ» Siarhiej Kandraćjeŭ.
«Vzhlad» piša, što ŭ Biełarusi zastajecca, pa sutnaści, dva varyjanty pa zahruzcy svajoj AES. Pa-pieršaje, jak i zapatrabavaŭ Łukašenka, treba pavialičyć spažyvańnie elektraenierhii ŭnutry krainy. Naprykład, častka čyhunak Biełarusi da hetaha času nie elektryfikavanaja, a heta padymie popyt na elektraenierhiju. Akramia taho, biełaruskuju elektraenierhiju zmoža kuplać Rasija.
Jość jašče adzin sposab padniać spažyvańnie elektraenierhii ŭnutry krainy, zaŭvažaje Siarhiej Kandraćjeŭ — pierajści na elektryčnaje aciapleńnie.
«Biełarusi treba albo budavać vialikija enierhajomistyja vytvorčaści tolki dziela ŭtylizacyi elektraenierhii atamnaj stancyi. Albo varta pavialičyć spažyvańnie elektraenierhii za košt admovy ad inšych enierhanośbitaŭ. Naprykład, u Biełarusi raspracavali płan pa raźvićci maksimalnaha vykarystańnia elektraaciapleńnia za košt admovy ad hazavych kacielniaŭ», — kaža Kandraćjeŭ.
Ale vyrašyć ekspartnyja prablemy BiełAES biez Rasii budzie vielmi nialohka, ličyć «Vzhlad». I Maskva ŭ hetym dapamoža, upeŭniena vydańnie:
«Pa-pieršaje, biełaruskaja AES pabudavana na rasijskija kredyty, i Rasija zacikaŭlena ŭ viartańni hetych hrošaj. Pa-druhoje, staryja mahutnaści ŭ Rasii vybyvajuć chutčej, čym budujucca novyja, i heta adstavańnie moža ihrać na ruku Biełaruskaj AES».
«I choć u centralnaj Rasii lišak mahutnaściej, vialikaj prablemy dla rasijskaha enierharynku nie budzie. Biełaruskija abjomy ŭ maštabie rasijskaha rynku nievialikija», — dadaje Kandraćjeŭ.
Biełarusi daviadziecca pastaŭlać elektraenierhiju pa ŭnutryrasijskich cenach, tady jak na eksparcie ŭ Jeŭropu biełarusy zmahli b zarablać, viadoma, bolš. U vyniku terminy akupnaści budaŭnictva BiełAES buduć na niekalki hadoŭ daŭžejšymi, čym płanavali raniej, kaža Kandraćjeŭ.
