Navukoŭcy vyjavili zornuju sistemu, jakaja nieŭzabavie moža vybuchnuć
Navukoŭcy vyjavili zornuju sistemu, jakaja ŭ chutkim časie moža vybuchnuć u najmacniejšym hama-ŭsplosku, paviedamlaje Jeŭrapiejskaja paŭdniovaja absiervatoryja.
Sistema składajecca z troch zorak, atočanych vichuraj kaśmičnaha pyłu. Jaje aficyjnaja nazva — 2XMM J160050.7-514245, adnak z-za źvilistych formaŭ, jakija nahadvajuć źmiaju, što skruciłasia vakoł zorak, astranomy dali joj i inšaje imia — «Apop». U staražytnajehipieckaj mifałohii Apop — vielizarny źmiej, jaki ŭvasablaje chaos, adviečny vorah boha sonca Ra. Nieŭzabavie «Apop» moža ŭzarvacca ŭ samaj mocnaj elektramahnitnaj padziei ŭ Suśviecie — hama-ŭsplosku.
Sistema składajecca z zorak Volfa — Raje, dla jakich charakternaja vielmi vysokaja tempieratura i śviacilnaść. Niekatoryja śviaciły, samyja bujnyja, pieratvarajucca ŭ zorki Volfa — Raje pad kaniec svajho isnavańnia. U asnoŭnym heta karotkaja faza, jakaja zajmaje niekalki sotniaŭ tysiač hadoŭ.
«Apop» vyłučaje dzivosnaja chutkaść zornych viatroŭ u 12 miljonaŭ kiłamietraŭ u hadzinu. Hetyja viatry pryviali da stvareńnia vichury vakoł zornaj sistemy. U adroźnieńnie ad viatroŭ, vichor ruchajecca ŭ pavolnym tempie (mienš za dva miljony kiłamietraŭ u hadzinu). Hety razryŭ u chutkaściach, jak miarkujecca, źjaŭlajecca vynikam taho, što adna z zorak u sistemie vypuskaje adnačasova chutkija i pavolnyja viatry ŭ roznych napramkach.
Astranomy pryjšli da vysnovy, što taja zorka znachodzicca ŭ stanie, blizkim da krytyčnaha — krucicca tak chutka, što praktyčna raździraje siabie na častki. Ličycca, što takoje chutkaje kručeńnie zorki Volfa — Raje pryvodzić da praciahłaha hama-ŭsplosku, kali jaje centr vybuchaje ŭ kancy žyćciovaha cykłu.