Polšča źbirajecca płacić kampiensacyju vysłanym u Sibir paśla 17 vieraśnia 1939 hoda
Za kožny poŭny miesiac represij jany atrymajuć pa 200 złotych (bolš za 46,5 jeŭra).
Andžej Duda ŭnios u Sejm prajekt zakonu pa pradastaŭleńni hrašovaj dapamohi hramadzianam, jakija ŭ 1939-1956 hadach byli departavanyja ŭ SSSR, paviedamlaje Polskaje radyjo.
Supracoŭniki polskaj palicyi i cyvilnyja asoby pad kanvojem čyrvonaarmiejcaŭ u vieraśni 1939 hoda. Fota nieviadomaha karespandenta TASS, commons.wikimedia.org
Zakonaprajekt praduhledžvaje vypłatu paciarpiełym dapamohi ŭ pamiery, jaki budzie zaležyć ad času ssyłki. Za kožny poŭny miesiac represij jany atrymajuć pa 200 złotych (bolš za 46,5 eŭra). Ahułam dapamoha nie pavinna być mienšaja čym 2 400 złotych (amal 559,5 eŭra).
Pra pamier hrašovaj dapamohi, jakuju moža atrymać dadzieny hramadzianin, budzie vyrašać Fond sacyjalnaha strachavańnia.
Dapamohaj zmohuć skarystacca jak departavanyja, tak i tyja, chto naradziŭsia ŭ vyhnańni.
Dla taho, kab atrymać dapamohu, ssylnym nieabchodna budzie vykanać peŭnyja ŭmovy.
Pa-pieršaje, jany pavinny pradastavić adpaviednaje paśviedčańnie ab tym, što byli departavanyja j znachodzilisia ŭ vyhnańni. Pa-druhoje, u momant padačy zajavy na atrymańnie dapamohi jany pavinny mieć polskaje hramadzianstva.