Piedahohu z-pad Hrodna, jakaja raskazała pra muzyčnuju škołu bieź śviatła, pryjšłosia zvolnicca
Piedahohu, jakaja sfatahrafavała, jak dzieci zajmajucca bieź śviatła ŭ muzyčnaj škole pad Hrodnam, u adździele kultury Hrodzienskaha rajvykankama prapanavali zvolnicca pa ŭłasnym žadańni. Žančyna zajavu padpisała, ale kaža, što choča pracavać u muzyčnaj škole i dalej, piša Tut.by.
Fota: Anatol Myškievič.
Vučniam muzyčnaj škoły ŭ Padłabieńni davodzicca voś užo niekalki miesiacaŭ zapar zajmacca ŭ pamiaškańni, dzie niama śviatła. Vykładčyki havorać, što prablemu miascovaja ŭłada i rajonny adździeł kultury paabiacali vyrašyć litaralna na dniach, ale pakul što dzieci na zaniatki chodziać ź lichtarykami.
Sfatahrafavała, jak prachodziać zaniatki ŭ ciemry, nastaŭnik pa salfiedžya Alena i pieradała zdymki svaim znajomym. Tak fatahrafii źjavilisia ŭ internecie.
Žančyna kaža, što chacieła prosta pryciahnuć uvahu da prablemy.
— Ja pracuju ŭ prafiesii ź siaredziny 90-ch hadoŭ. I dla mianie prosta dziŭnaja ŭsia hetaja situacyja z adsutnaściu śviatła i z tym, što mianie paprasili «na vychad» u siaredzinie navučalnaha hoda. Ja naŭrad ci znajdu chutka novaje miesca pracy. Dy i maja dziejnaść tut mnie padabajecca, — kaža Alena i dadaje, što ŭ adździeł kultury jaje vyklikali siońnia, 15 listapada, z samaj ranicy i adrazu ž prapanavali napisać zajavu pa zhodzie bakoŭ. — Ja razhubiłasia i padpisała. Potym raspłakałasia, a ciapier supakoiłasia i razumieju, što heta miesca pracy hublać nie chaču. Ź inšaha boku, vielmi bajałasia, što mohuć zvolnić pa artykule — ale atrymałasia voś tak. Ciapier nie viedaju, što z hetym usim rabić.
U adździele kultury Hrodzienskaha rajvykankama zapeŭnivajuć, što piedahohu davali ŭkazańni pravodzić zaniatki pa notnaj hramacie ŭ budynku miascovaj biblijateki, adnak žančyna adkazvaje — tam nie zaŭsiody było miesca dla junych muzykaŭ.