Biełahraprambank: «Arenaj-Sici» kirujem nie my, a «Prastor-Trejd»
Biełahramprambank nie maje dačynieńnia da kiravańnia handlova-zabaŭlalnym centram «Arena-Sici», u jakim učora adbyłosia nadzvyčajnaje zdareńnie. Pra heta TUT.BY zajaviŭ staršynia praŭleńnia Biełahraprambanka Anatol Łysiuk.
«Heta abjekt lizinhu. My farmalna [vałodajem handlovym centram]. Ekspłuatuje i kiruje «Prastor-Trejd», — skazaŭ Łysiuk, kamientujučy dačynieńnie banka da «Arena-Sici».
U 2016 hodzie ŭ kampanii «Prastor-Trejd», jakaja kiruje taksama hipiermarkietami «Prastor», uźnikli prablemy pa raźlikach z pastaŭščykami. Resursy byli znojdzieny ŭ vyniku ździełak zvarotnaha lizinhu z bankami. Tak, «Arena-Sici» adyšła Biełahraprambanku za 75 młn dalaraŭ. Kampanija «Prastor-Trejd» praciahnuła kiravać handlovymi centrami.
Uładalnikami «Prastor-Trejd», pa dadzienych na 2016 hod, byli Jury i Siarhiej Čyžy, Uładzimir i Kaźbiek Japryncavy, Inesa Zacharevič. «Paśla hučnaha kanfliktu pamiž saŭładalnikami realna abjektam kiruje baćka i syn Čyžy», — skazała infarmavanaja krynica.
«Arena-Sici» adkryłasia ŭ 2013 hodzie, źjaŭlajecca adnym z najbujniejšych handlova-zabaŭlalnych centraŭ Minska. Ahulnaja płošča składaje bolš za 85 tysiač kvadratnych mietraŭ. Jaje ŭzvodziła hrupa kampanij «Trajpł». Tahačasny mer Minska Mikałaj Ładućka paśla adkryćcia TRC zajaviŭ, što «pry budaŭnictvie hetaha centra byli vykarystanyja sučasnyja zachodniejeŭrapiejskija technałohii».
Učora ŭ «Arena-Sici» abvaliłasia padviasnaja stol, paciarpieli dźvie žančyny, adna ź ich špitalizavanaja. Śledčy kamitet pačaŭ kryminalnuju spravu.
