Arcybiskup Kandrusievič: 7 listapada — dzień pamiaci achviaraŭ savieckaha režymu
Pra heta mitrapalit Minska-Mahiloŭski, arcybiskup Tadevuš Kandrusievič zajaviŭ u Sankt-Pieciarburhu, dzie biare ŭdzieł u śviatkavańni 25-hadovaha jubileju zasnavanaj im u 1993 h. duchoŭnaj sieminaryi «Maryja — Karaleva apostałaŭ», paviedamlaje catholic.by.
Asnoŭnyja jubilejnyja mierapryjemstvy prachodziać 8 listapada, a napiaredadni tut u kaściole sv. Stanisłava adbyłosia adkryćcio miemaryjała z proźviščami viadomych 425 katalickich śviataroŭ, jakija zahinuli padčas ateistyčnaha režymu ŭ savieckich łahierach.
Paśla sv. Imšy arcybiskup Kandrusievič u karotkaj pramovie padkreśliŭ, što kali jašče nie tak daŭno dzień 7 listapada ličyŭsia «čyrvonym dniom kalendara» — heta aznačaje śviatočnym dniom, — to siońnia ŭ Katalickim Kaściole ŭ Rasii heta dzień malitvy za achviary tatalitarnaha savieckaha režymu i ich prasłaŭleńnia.
U nabaženstvie ŭziali ŭdzieł nastupnik arcybiskupa Kandrusieviča na Maskoŭskaj katalickaj kafiedry arcybiskup Paoła Pecy, apostalki nuncyj u Rasii arcybiskup Čelestyna Miljore, ŭsie rasijskija biskupy, šmatlikija śviatary, taksama pradstaŭniki ŭładaŭ Sankt-Pieciarburha, hienieralnyja konsuły (abo ich pradstaŭniki) ZŠA, Polščy, Litvy, Łatvii, Estonii, Hiermanii i Finlandyi.