Rumas daručyŭ uzmacnić kantrol za cenami
Premjer-ministr Biełarusi Siarhiej Rumas daručyŭ uzmacnić kantrol za situacyjaj z cenami. Ab hetym jon zajaviŭ siońnia na pasiadžeńni Prezidyuma Saŭmina, dzie razhladajucca vyniki raboty ekanomiki ŭ studzieni-vieraśni, paviedamlaje BiełTA.
«Inflacyja znachodzicca ŭ zadadzienych paramietrach - 3,7 pracenta da śniežnia 2017 hoda pry prahnozie na dzieviać miesiacaŭ nie bolšym za 4,3 pracenta. U vieraśni adbyŭsia rezki rost na 0,8 pracenta, da kanca hoda jašče dva miesiacy. Prašu ministra antymanapolnaha rehulavańnia i handlu, usich kiraŭnikoŭ uziać pad uzmocnieny kantrol situacyju z cenami», - skazaŭ Siarhiej Rumas.
Što datyčycca ekspartu tavaraŭ i pasłuh, u studzieni-žniŭni jon pavialičyŭsia na 18,3 pracenta ŭ paraŭnańni z anałahičnym pieryjadam minułaha hoda. Rost pastavak nazirajecca pa ŭsich hrupach tavaraŭ. Salda źniešniaha handlu dadatnaje - $580 młn, u toj ža čas hety pakazčyk na $210 młn mienšy, čym za studzień - žnivień minułaha hoda.
Premjer-ministr padkreśliŭ, što ŭ cełym pa vynikach studzienia-vieraśnia važniejšyja ekanamičnyja pakazčyki znachodziacca ŭ ramkach prahnoznych značeńniaŭ. Temp ekanamičnaha rostu za hety pieryjad skłaŭ 103,7 pracenta pry prahnozie 103,3 pracenta. Zabiaśpiečana dadatnaja dynamika realnych hrašovych dachodaŭ nasielnictva. U studzieni-žniŭni hety pakazčyk skłaŭ 107,8 pracenta pry prahnozie 103,6 pracenta.
«Da zaviaršeńnia kalandarnaha hoda zastałosia dva miesiacy. Siońnia patrabujecca pryniaćcie apieratyŭnych mier, kab aktyvizavać raźvićcio ekanomiki, nie parušajučy jaje zbałansavanaści, i zabiaśpiečyć vykanańnie pastaŭlenych pierad uradam zadač.
Bazavyja padychody viadomy, jany adlustravany ŭ prahramie dziejnaści ŭrada, jakuju zaŭtra jon pradstavić u parłamiencie, - adznačyŭ Siarhiej Rumas. - Staić zadača da kanca hoda jak minimum utrymać dadatnyja tendencyi, što skłalisia ŭ ekanomicy. Ad hetaha zaležyć vykanańnie piacihodki. Prašu skancentravacca na kankretnych mierach, jakija daduć mahčymaść zabiaśpiečyć vykanańnie zadač u hetym hodzie».
