«Jak my pastavili 70 vializnych kryžoŭ vakoł Kurapat»
Piša ŭ siabie ŭ fejsbuku Źmicier Daškievič.
Dźvie tysiačy hadoŭ tamu Isus pasłaŭ siemdziesiat vučniaŭ padrychtavać sabie darohu, nastaŭlajučy ich: «Voś, ja daju vam uładu nastupać na źmiejaŭ i skarpijonaŭ, i na ŭsiu siłu varožuju, i ništo nie paškodzić vam». Siemdziesiat viarnulisia z radaściu, kažučy: «Hospadzie, i demany padparadkoŭvajucca nam u imia Tvajo!» Jano ŭjaŭlałasia niemahčymym dyj i ciapier tak ujaŭlajecca, ale 70 vializnych kryžoŭ uznosiacca ŭ nieba vakoł Kurapataŭ. Nam pahražali raspravaju, sutkami i kryminałkami, śpiłavanymi kryžami, ale navat demany byli vymušany reciravacca — kryžy stajać i hladziać uvyś, i my na voli hladzim — biez administratyvak, biez kryminałak i, pakul, navat biaz štrafaŭ.
Nia viedaju kolki, moža 70, moža try razy pa 70, — dziasiatki patryjotaŭ byli zadziejničany ŭ hetym čynie. Niechta achviaroŭvaŭ hrošy, niechta ŭstaloŭvaŭ kryžy, niechta prynios vady pracaŭnikam u śpiakotny pracoŭny dzień — uznaharoda kožnaha adnolkavaja. Choć ja časta čuju ad roznych ludziej: što ja mahu, u mianie siamja i praca, toje i inšaje — tolki malupasieńkuju spravu mahu ja zrabić, jakaja ci vartaja čaho? Ale hetym letam, kali adzin chłapak padjechaŭ da Kurapataŭ i prynios nam piacilitrovik vady, mnie adkryŭsia sens słovaŭ Chrysta: «Chto prymaje praroka ŭ imia praroka, ŭznaharodu praroka atrymaje».
Nam zdajecca, jak heta moža być, heta niełahična: ty pracavaŭ, źniemahaŭ, jšoŭ da mety dzionna i nočna, a toj, chto pryniaŭ ciabie ŭ imia tvajoj spravy — atrymaje takuju ž uznaharodu. Ale heta našaja mudraść, čałaviečaja. Mudraść žy ź nieba śviedčyć, što hieroj spravy i toj, chto jaho prymaje — majuć adnu ŭznaharodu: i toj, chto achviaravaŭ tysiaču rubloŭ i toj, chto dziesiać; i toj, chto ŭstaloŭvaŭ 70 kryžoŭ i toj, chto prynios vady pracaŭniku. I hetak u luboj spravie, da jakoj kožny patryjot maje mahčymaść dałučycca: abarona Kurapataŭ, pierakład filmaŭ na biełaruskuju movu, padtrymka niezaležnych ŚMI i mnohaje, mnohaje inšaje — było b žadańnie i niachaj jano ŭ kožnaha budzie.
Ahułam na ŭstalavańnie 70 kryžoŭ pajšło 10075 rubloŭ, ź jakich sabrana 8525. Kali chto maje natchnieńnie achviaravać na Kurapackuju spravu, adpisvajciesia mnie pryvatna. Taksama zaklikaju padtrymać i dałučycca da litaraturnych čytańniaŭ «Noč rastralanych paetaŭ», jakija projduć 29 kastryčnika z 20:00 da 24:00 u Kurapatach. Raspaŭsiudžvajcie infarmacyju pra abaronu Kurapataŭ i litaraturnyja čytańni pad cheštehami #Kurapaty2018 i #Nočpaetaŭ2018.
